༄༅།།རྗེ་བཙུན་བླ་མ་དམ་པ་དེའི་ཞབས་ལ་གུས་པ་ཆེན་པོས་ཕྱག་འཚལ་ལོ། །བློ་བཟང་དྲི་མེད་འདྲེན་བྱེད་སྟོང་གིས་རྒྱ་ཆེན་ཤེས་བྱའི་གཟུགས་ཀུན་རྣམ་གསལ་འཆི་མེད་སྒེག་མོའི་མེ་ལོང་བཞིན། ། རྣམ་དཀར་གྲགས་པའི་རྔ་དབྱངས་འབུམ་ཕྲག་ཕྱོགས་ཀྱི་བུ་མོའི་འགྲིན་པར་རྣམ་ བསྒྲགས་དབྱར་དུས་དབྱར་སྐྱེས་རྔ་སྒྲ་བཞིན།།གྲོང་འཇོམས་དབང་པོ་མདའ་ལྔ་བ་དང་གཙུག་ན་ཟླ་བ་མགྲིན་སྔོན་ཅན་སོགས་རལ་བའི་ཐོད་ལ་གཙུག་རྒྱན་བཞིན།། ངལ་གསོ་ཉེར་མཛད་ཞབས་སེན་འཆར་ཀའི་འོད་འཕྲེང་དག་གིས་གཙུག་རྒྱན་རབ་མཛེས་བདག་བློ་པདྨོའི་ དཔལ་གྱུར་ཅིག ། བློ་ཆེན་ལྡན་གང་བྱེ་བས་བསྐལ་པ་བརྒྱར། །སྙན་ངག་ཆུ་ཀློང་སྟོང་གིས་དྲངས་གྱུར་ཀྱང་། ཟད་མེད་ཡོན་ཏན་ ཡིད་བཞིན་མཚོ་ཆེན་པོ། །བདག་བློའི་སྐྲ་རྩེས་དཔག་པར་ཇི་ལྟར་ནུས། །དེ་ལྟ་ན་ཡང་དད་པའི་དྲི་བཞོན་གྱིས། །བདག་བློའི་ལྗོན་ཤིང་རྣམ་པར་བསྐྱོད་པ་ལས། །ངོ་མཚར་ དྲི་བསུང་གཡོ་བའི་མེ་ཏོག་ཕྲེང་། །མགྲིན་པར་བཟུང་སྟེ་དགའ་བའི་གར་བྱེད་དོ། །མ་ལུས་རྒྱལ་བ་ཀུན་གྱི་མཁྱེན་བརྩེའི་གཏེར། །ས་གསུམ་སྐྱེ་རྒུ་ཡོངས་ཀྱི་གཙུག་ རྒྱན་དུ། །གཅིག་ཏུ་བསྡུས་ནས་གཟུགས་ཅན་བཞིན་གྱུར་པ། །འཇམ་དཔལ་སྙིང་པོས་རྟག་ཏུ་སྐྱོང་གྱུར་ཅིག ། ཆ་ཤས་ཡོངས་རྫོགས་ཁྱེད་སྐུའི་རི་བོང་ཅན། །ཆོས་དབྱིངས་ཀུན་གསལ་མཛེས་མའི་ལང་ཚོ་ལས། །གསལ་བར་ཤར་ཚེ་སྐལ་བཟང་ཀུ་མུད་ཚོགས། མཛེས་སྡུག་ཟེའུ་འབྲུའི་སོ་ཕྲེང་ བཞད་པ་དང་།། མཉམ་དུ་ཐུབ་བསྟན་ནོར་འཛིན་བུ་མོའི་ལུས། །སྟོད་གཡོགས་གོས་དཀར་གཡོ་བའི་མཛེས་སྡུག་འཛེན། །རང་གཞན་གྲུབ་མཐའི་ས་ཆེན་མ་ལུས་པ། །བློ་གྲོས་གོམ་པ་གཅིག་གིས་རབ་འགོངས་ཏེ། །ཀུན་མཁྱེན་ཐུབ་པའི་རྒྱལ་ས་འཛིན་མཁས་པ། །གང་ཁྱོད་ རྒྱལ་བ་ཀུན་གྱི་གདུང་འཚོབ་ལགས། །མང་ཐོས་ལུང་རིགས་སྨྲ་བའི་ཁྱུ་མཆོག་ཅེས། ། ཆེན་པོར་མངོན་རློམ་བྱེ་བ་ཕྲག་བརྒྱ་ཡི། །སྤོབས་པའི་མྱོས་བུམ་མ་ལུས་དྲལ་མཛད་པ། །འཇིགས་མེད་གདོང་ལྔའི་དབང་པོ་ཁྱོད་ཉིད་ལགས། །བསླབ་གསུམ་ནོར་བུའི་འོད་ ཕྲེང་གཡོ་བ་ཅན། །ངུར་སྨྲིག་འཛིན་པ་ཀུན་གྱི་ཅོད་པན་ལ།།  ཞབས་སེན་གསལ་བར་འགོད་པའི་རོལ་རྩེད་མཁན། །ཀུན་མཁྱེན་ཐུབ་པ་ཆེན་པོ་ཁྱོད་ཉིད་ ལགས། དགེ་ལེགས་ཀུ་མུད་ཟུམ་པར་མི་བྱེད་ ཅིང་། །མདོ་སྔག་གཞུང་ལུགས་པད་ཚལ་སྟོང་འབྱེད་པའི། ལུང་རིགས་འོད་ཀྱིས་ས་གསུམ་སྣང་བྱེད་པ། །ཀུན་མཁྱེན་ཉིན་མོའི་དབང་ཕྱུག་ཁྱོད་ཤར་ཚེ།། སྨྲ་བའི་ཉི་མ་གཞན་ དག་ཁྱོད་དྲུང་ན། །དམན་པའི་རྒྱུ་སྐར་ཕྲེང་བ་ལྟ་བུར་སྤྱོད། །སྙན་གྲགས་མ་ལ་ཡ་ཡི་དྲི་བཞོན་གྱིས། །ཕྱོགས་ཀྱི་བུ་མོའི་དྲི་འཛིན་སིམ་པའི་དཔལ། ། ལེགས་བཤད་ག་པུར་འཐུལ་བའི་དཔག་བསམ་ཁྱོད། །ཉོན་མོངས་ཚ་བའི་སྲོག་ལེན་གཤིན་རྗེ་ལགས། །ཐབས་ཤེས་གཤོག་རླབས་གཡོ་བའི་ རླུང་ཤུགས་ཀྱིས། །མཐའ་གཉིས་གཡང་སར་ནམ་ཡང་མི་ལྟུང་ཞིང་།། བདག་ལྟའི་ཀླུ་དབང་ཚོགས་ཀྱི་སྲོག་འཕྲོག་པ། །མཁས་མཆོག་གཉིས་སྐྱེས་ཀུན་གྱི་དབང་པོ་ལགས།། སྐྱེ་རྒ་ན་འཆིའི་རྦ་རླབས་སྟོང་འཁྲུག་པའི། །མི་བཟད་འཁོར་བ་ཆུ་སྲིན་འབྱུང་ གནས་ལས།། འགྲོ་ཀུན་ཐབས་མཁས་གྲུ་ཡིས་སྒྲོལ་མཁས་པ། །མཁས་མཆོག་དེད་དཔོན་ཀུན་གྱི་དམ་པ་ལགས།། ཁྱོད་ཀྱི་ཐུགས་རྗེའི་ཕོ་ཉ་བྱེ་བ་ཡིས། །འགྲོ་འདི་ཐར་བའི་གྲོང་དུ་ཁྲིད་ གྱུར་ཏེ། །འཁོར་བའི་གནས་འདི་ངེས་པར་སྟོངས་འགྱུར་ཞེས། །རབ་དགྱེས་རྒྱས་རྣམས་ ཞི་བའི་དབྱིངས་སུ་ཞུགས།། རྒྱལ་བ་ཀུན་གྱི་མཁྱེན་བརྩེའི་ཆུ་ཀླུང་འབུམ། །ཉིན་ བཞིན་སྡུད་བྱེད་རོལ་མཚོའི་དབང་པོ་སྟེ། །ལེགས་བཤད་བདུད་རྩིའི་གྲུ་ཆར་སྟོང་འབེབས་པའི། །སྔོན་མེད་དབྱར་སྐྱེས་ཆུ་འཛིན་དབང་པོ་ལགས། །མཛེས་སྡུག་འོད་འབར་ རབ་ཏུ་བརྗིད་པ་ཡི། །ཁྱོད་ཀྱི་མཛེས་སྐུ་འཆི་མེད་རི་བོ་འདྲ།། མཚན་དཔེའི་རྒྱན་ ཕྲེང་གཡོ་བའི་མཛེས་སྡུག་ལ། །རི་དབང་མཆོག་གིས་འགྲན་པར་ནུས་མ་ལགས། །སྙན་ཅིང་ ཡིད་འབབ་ཆོས་ཀུན་སྒྲོག་པའི་གསུང་། །ཡན་ལག་དྲུག་ཅུའི་དྲིལ་ཆེན་འཁྲོལ་བ་ ན།། མེས་པོའི་དབྱངས་ཀྱིས་འགྲན་པར་མ་བཟོད་ནས། །སྨྲ་བཅད་བསམ་གཏན་ངང་དུ་ཞུགས་ སམ་སྙམ།། རབ་ཡངས་ཁྱོད་ཀྱི་མཁྱེན་པའི་ཕ་མཐའ་ལ། །འགྲན་འདོད་ནམ་མཁའ་འདི་ཡིས་ འོངས་སམ་སྙམ།། འོན་ཏེ་ལྷ་ཡི་ལམ་ཡངས་སྐྱེས་སླད་དུ། །ཁྱོད་ཀྱི་མཁྱེན་པ་བསམ་བཞིན་བཀོད་དམ་ཅི། །ཁྱོད་ཀྱི་མཁྱེན་པ་རབ་ཡངས་ཆུ་གཏེར་བཞིན། །ཀླུང་བརྒྱས་ དྲངས་ཀྱང་ཅུང་ཟད་བྲི་བ་མེད།། འགྲོ་ལ་འདོད་དགུ་སྦྱིན་པའི་དཔག་བསམ་སྟེ། ། སྒྲིབ་མུན་ཀུན་སེལ་སྔོན་མེད་སྣང་བྱེད་ལགས། །གདུལ་བྱའི་གླིང་ཀུན་འོས་པར་འབབ་ པ་ཡི། ཁྱོད་ཀྱི་འཕྲིན་ལས་ཉི་མའི་འོད་དང་འདྲ།། འཆར་ནུབ་བྲལ་ཞིང་སྤྲིན་གྱིས་ མི་སྒྲིབ་པས། །ཉི་ཟླའང་དེ་ཡི་དཔེ་རུ་འོས་མ་ལགས། །གཞན་གྱི་བློ་ཡི་ཡུལ་དུའང་ ཤོང་མིན་པའི། །ཡོན་ཏན་ཕུང་པོའི་ཁུར་ཆེན་འཐའ་ཡས་པ།། འདེགས་བྱེད་ནོར་འཛིན་བུ་ མོ་མཛེས་སྡུག་མ། །ད་དུང་ངལ་བ་མེད་པ་ཨེ་མ་མཚར།། ཕྱོགས་བཅུའི་ཕུན་ཚོགས་མ་ལུས་གྲོས་བྱས་ནས། །རྒྱལ་བའི་དབང་པོ་ཁྱོད་ལ་འདུས་པ་ན།  །མི་བཟད་སྐྱོན་ཀུན་འཁོར་བ་འདིར་ལུས་པས། །འགྲོ་འདི་རྟག་ཏུ་སྡུག་བསྔལ་གྱུར་ མིན་ནམ། །ཁྱོད་ཀྱི་ཡོན་ཏན་ཡིད་བཞིན་མཚོ་ཆེན་པོར། །རིང་ནས་ཞུགས་པའི་དད་པའི་ གཉིས་འཐུང་འདི། །མཁས་གྲུབ་གཞན་གྱི་ཡོན་ཏན་རྫིང་བུ་ལ། །དགའ་བར་འཛིན་པའི་བློ་དེ་དོར་བར་གྱུར། །མིང་ཙམ་ལྷག་མར་གྱུར་པའི་བསྟན་པ་འདི། །རྫོགས་ལྡན་བཞིན་དུ་ཉིད་ཀྱིས་མཛད་པ་ན། །ཨེ་མ་སྙིགས་དུས་རྒྱལ་བ་གཉིས་པ་ ཞེས། །ཕྱོགས་ཀྱི་བུ་མོས་སྲིད་རྩེའི་བར་དུ་བསྒྲགས། །ཕྱོགས་ཀྱི་བདག་པོ་ཀུན་ གྱི་རལ་བ་ལ། །ཞབས་རྡུལ་ནོར་བུས་མཛེས་པའི་དཔལ་སྟེར་བ། །སྔོན་མེད་རྒྱལ་བའི་ ཉི་མ་གཅིག་གིས་ཀྱང་། རྒྱལ་བའི་ཉི་མ་མ་ལུས་ཟིལ་གྱིས་གནོན། །དེ་ཕྱིར་ལྷ་དང་བཅས་པའི་འཇིག་རྟེན་འདི། །མགོན་ཁྱོད་ལྷག་པར་བསྔགས་པའི་བཟླས་བརྗོད་ལ། །ངལ་བ་མེད་པའི་དཀའ་ཐུབ་ལྷུར་བླངས་པས། ། བྱ་བ་གཞན་ལ་འཇུག་པའི་གོ་སྐབས་ཕྲོགས། །སྐལ་བཟང་ཀུན་དའི་གཉེན་གཅིག་རི་བོང་ ཅན། །ཐུབ་བསྟན་པད་ཚལ་རྒྱས་མཛད་ཉིན་མོའི་མགོན། །འདོད་དགུའི་དངོས་གྲུབ་སྦྱིན་ མཛད་དཔག་བསམ་ཤིང་། །བསམ་འཕེལ་དབང་གི་རྒྱལ་པོ་ཁྱོད་ལ་འདུད། །ལེགས་བཤད་བྱེ་ བས་ཁེངས་ཀྱང་ཁེངས་དང་བྲལ། །གཞན་དོན་ཁུར་གྱིས་ངལ་ཀྱང་ངལ་བ་མེད། །རིང་ནས་འཁོར་བ་སྤངས་ཀྱང་འཁོར་བར་ སྤྱོད། ངོ་མཚར་ཀུན་གྱི་གཏེད་ཆེན་ཨེ་མ་མཚར། །པད་ཚལ་དབུས་ན་པངྨ་དཀར་པོ་དང་། ། རྒྱུ་སྐར་དབུས་ན་རྒྱུ་སྐར་བདག་པོ་བཞིན། །རྒྱལ་སྲས་དབུས་ན་རྒྱལ་བའི་དབང་པོ་ ཁྱོད། །འཇིགས་བྲལ་འཇིགས་མེད་ཆོས་འཁོར་བསྐོར་ལ་འདུད། །ལེགས་བཤད་ནོར་འཛིན་ སྒེག་མོའི་ཁྱོན་ཀུན་ལ། །ལུང་རིགས་དཔུང་གིས་འདོད་དགུར་དབང་སྒྱུར་ཞིང་། །ལུས་མེད་བདག་པོའི་གཡུལ་ངོ་ཕམ་མཛད་པ། །ཁམས་གསུམ་ཆོས་ཀྱི་རྒྱལ་པོ་ཁྱོད་ལ་ འདུད། །ས་བཅུའི་དབང་ཕྱུག་རྒྱལ་སྲས་ཀུན་གྱི་ཡབ། །དག་དང་མ་དག་འགྲོ་བ་ཀུན་གྱི་ སྐྱབས། །སྐུ་གསུམ་ལྷུན་གྲུབ་རྒྱལ་བ་ཀུན་གྱི་གཙོ། །ཁྱབ་བདག་རྡོ་རྗེ་འཆང་དབང་ ཁྱོད་ལ་འདུད། །སྙིང་གི་མེ་ལོང་དབུས་སུ་ཁྱོད་ཀྱི་སྐུ། །བྱེད་པོའི་པིར་གྱིས་ གསལ་བར་བྲིས་པ་བཞིན།། བཀོད་ནས་རྟག་ཏུ་གུས་པས་མཆོད་པའི་མཐུས། །འབྲལ་མེད་ རྗེས་སུ་འཛིན་པར་བྱིན་གྱིས་རློབས། །དེ་ཡི་མཐུ་ལས་རྒྱལ་བའི་དམ་ཆོས་ཀུན། ། ཁྱོད་ཞལ་པདྨོའི་སྒོ་ལས་ལེགས་འོངས་པ། །སྙིང་གི་བུམ་པར་རྩེ་ཅིག་བསྟེན་པ་ལས། ། ཉོན་མོངས་ནད་ཀུན་འཇོམས་པར་བྱིན་གྱིས་རློབས།། དེང་ནས་བཟུང་སྟེ་ཚེ་རབས་ཐམས་ཅད་དུ། །རང་ཉིད་གཅེས་པར་འཛིན་པའི་བློ་སྤངས་ནས།   ། བསྟན་དང་འགྲོ་བའི་དོན་ཀུན་སྒྲུབ་པ་ལ། །རྒྱལ་བ་ཁྱོད་དང་མཚུངས་པར་བྱིན་གྱིས་ རློབས། །སེམས་ཀྱི་གཉིས་འཐུང་དད་པའི་ལྕགས་ཀྱུ་ཡི། །དབང་དུ་གྱུར་ནས་ཁྱོད་ཞབས་ རྟག་མཆོད་ཅིང་། །མྱུར་དུ་རྡོ་རྗེ་འཆང་དབང་ཐོབ་གྱུར་ནས། །འགྲོ་ཀུན་ཐར་བར་འཁྲིད་པར་བྱིན་གྱིས་རློབས། །དེ་ལྟར་བསྟོད་པའི་དགེ་བ་དཔག་ མེད་དང་། །གཞན་ཡང་དུས་གསུམ་བསགས་པའི་དགེ་བ་རྣམས།། མགོན་པོ་ཁྱོད་ཀྱིས་རྗེས་ སུ་འཛིན་པ་དང་། །ཁྱོད་ཀྱི་ལུགས་བཟང་རྒྱས་པའི་རྒྱུར་གྱུར་ཅིག །  ཅེས་ རྒྱལ་བ་ཐམས་ཅད་ཀྱི་མཁྱེན་བརྩེ་གཅིག་ཏུ་བསྡུས་པའི་ངོ་བོ། སྙིགས་དུས་ཀྱི་རྒྱལ་བ་གཉིས་པ་མཚན་བརྗོད་པར་དཀའ་བའི་ཁམས་གསུམ་ཆོས་ཀྱི་རྒྱལ་པོ་བློ་བཟང་གྲགས་པའི་དཔལ་ལ། གཞན་ལས་ཁྱད་པར་དུ་འཕགས་པར་བསྔགས་པ། ལྷའི་རྔ་བོ་ཆེའི་སྒྲ་དབྱངས་ཞེས་བྱ་བ་འདི་ནི། རྗེ་ཉིད་ལ་སྐྱེས་ཙམ་ཉིད་ནས་དད་པ་མཆོག་ཏུ་ཐོབ་པའི་ཁ་བ་རི་བའི་སྙན་ངག་མཁན། རྣམ་དཔྱོད་ཀྱི་མགྲིན་པ་ཅུང་ཟད་མཐོ་བའི་བཙུན་པ་དགེ་འདུན་རྒྱ་མཚོ་དཔལ་བཟང་པོས་ལོ་བཅུ་བདུན་ལོན་པའི་ཚེ། གཙང་རྟ་ནག་གི་ས་ཆ། གྲུབ་པའི་དབང་ཕྱུག་ཨ་མོ་གྷ་ངྷྭ་ཚ་ལ་སོགས་པ་དམ་པ་མང་པོས་བྱིན་གྱིས་རླབས་པའི་དབེན་གནས་རྡོ་རྗེ་གདན་ཞེས་བྱ་བར་སྦྱར་བའོ།།

རྩོམ་ཁུངས། ཨེ་མ་ཧོའི་ཟིན་བྲིས།