༼དེ་ལྟར་བྱས་སོ།།༽
༼དེ་ནས་མ་ལ་ཡ་ཅན་མ་དང་།  འབངས་མོ་ཞུགས་ཏེ་སལ་འདུག་ནས་རྒྱུད་མངས་སྦྲེང་བར་བྱེད་དོ།།༽
འདྲེན་མས།  ༼གླུ་ལེན་པ༽ གཽ་རཱི་རབ་རྒྱས་པདྨའི་གེ་སར་གྱི།།  དངུལ་ལྟར་དཀར་བའི་འོད་ཅན་བཅོམ་ལྡན་མ།།  ཁྱོད་ཀྱི་བཀའ་དྲིན་དག་གིས་བདག་གི་ནི།།  མངོན་པར་འདོད་པ་རབ་ཏུ་གྲུབ་པར་མཛོད།།
འདྲེན་པས།  ༼རྣ་གཏད་ནས༽ ཨེ་མ་ཧོ་གླུ།   ཨེ་མ་ཧོ་རོལ་མོ།  འདི་ལ་གསལ་བྱེད་ཀྱི་དབྱངས་རྣམ་པ་བཅུ་བོ་འདིས་གསལ་བ་ཐོབ་ཅིང་།  མྱུར་བ་དང་།   བར་མ་དང་།  དལ་བའི་སྟབས་རྣམ་པ་གསུམ་རབ་ཏུ་གསལ་བར་ཡོངས་སུ་བཅད་དེ།   བ་ལང་གི་རྔ་མ་ལ་སོགས་པ་རྣམ་པ་གསུམ་གྱི་རིམ་པས་ངལ་གསོ་བར་བྱས་པ་དེ་ཁོ་ནའི་ཚོགས་ཀྱི་རྗེས་སུ་འབྲང་བའི་རོལ་མོའི་ཆོ་ག་ཡང་དག་པ་གསུམ་བསྟན་ཏོ།།
འབངས་མོས།  རྗེའི་སྲས་མོ་ངེས་པར་ཡུན་རིང་དུ་གླུ་དག་བླངས་ནས་ཁྱོད་ཀྱི་ལག་རྩེ་དག་ཡོངས་སུ་མི་ངལ་ལམ།
འདྲེན་མས།     གྲུང་མོ།   བཅོམ་ལྡན་མོ(ལྷ་མོ)འི་མདུན་དུ་རྒྱུད་མངས་སྒྲོགས་པར་བྱེད་པ་ལ་བདག་ག་ལ་ངལ།
འབངས་མོས། ༼སྨོད་པ་དང་བཅས་པར༽ རྗེའི་སྲས་མོ་ཀྱེ།  བརྩེ་མེད་མ་འདིའི་མདུན་དུ་རྒྱུད་མངས་བསྒྲགས་པས་ཅི་ཞིག་བྱ་ཞེས་བདག་སྨྲའོ།།   གང་ཞིག་འདི་སྙེད་ཀྱི་དུས་སུ་སྐྱེ་བོ་གཞོན་ནུ་མའི་དཀའ་ཐུབ་བསྙེན་ནས་ངེས་པ་ལ་གནས་པས་བསྟན་ཀྱང་ད་དུང་ཁྱོད་ལ་དང་བར་མི་སྟོན་ནོ།།
བིདཱུཥཀས།  ༼ཐོས་ནས༽ ཀྱེ་གྲོགས་པོ།  འདི་ནི་ངེས་པར་གཞོན་ནུ་མ་སྟེ་ཅིའི་ཕྱིར་མི་ལྟ།
འདྲེན་པས། སྐྱོན་ཅི་ཡོད།   གཞོན་ནུ་མ་ལྟ་བ་ནི་སྐྱོན་མེད་པ་ཉིད་དོ།།  འོན་ཀྱང་གལ་ཏེ་ན་བདག་ཅག་མཐོང་ནས་འཇིགས་ཏེ།  ངོ་ཚ་བ་གཞོན་ནུ་མ་ལ་རྙེད་སླ་བས་འདིར་ཡུན་རིང་དུ་མི་སྡོད་པ་མི་སྲིད་དོ།།  དེས་ན་རེ་ཞིག་འཁྲི་ཤིང་གི་དྲ་བ་འདིས་བསྒྲིབས་ཏེ་བལྟ་བར་བྱའོ།།
༼གཉི་གས་བལྟས་ཏེ༽
 བིདཱུཥཀས། ༼ཡ་མཚན་དང་བཅས་པར༽ ཀྱེ་གྲོགས་པོ།  ལྟོས་ཤིག་ལྟོས་ཤིག   ངོ་མཚར་རོ་ངོ་མཚར་རོ།།   རྒྱུད་མངས་ཀྱི་སྒྲས་རྣ་བའི་བདེ་བ་སྐྱེད་པར་བྱེད་པ་འབའ་ཞིག་ཏུ་མ་ཟད་དེ།   རྣམ་པར་ཤེས་པའི་རྗེས་སུ་མཐུན་པའི་གཟུགས་འདིས་མིག་གི་ཡང་བདེ་བ་སྐྱེད་པར་བྱེད་དོ།།  དེའི་ཕྱིར་འདི་ནི་སུ་ཞིག་ཡིན།  ཅི་ལྷ་མོའམ།   ཀླུའི་བུ་མོའམ།   ཡང་ན་རིག་པ་འཛིན་པའི་བུ་མོའམ།  ཡང་ན་གྲུབ་པའི་རིགས་ལས་འཁྲུངས་པ་ཞིག་གོ།
འདྲེན་པས།  ༼རྣམ་པར་ལྟ་ཞིང་ཆགས་པ་དང་བཅས་པར༽ གྲོགས་པོ།  འདི་སུ་ཞིག་ཡིན་བདག་གིས་མ་རྟོགས་སོ།།  བདག་གིས་འདི་ཙམ་ཤེས་ཏེ། 
གལ་ཏེ་མཐོ་རིས་བུ་མོ་ཡིན་ན་འཕྲོག་བྱེད་མིག་སྟོང་ལྡན་དེས་དོན་བྱས་འགྱུར།།
གལ་ཏེ་ཀླུ་ཡི་བུ་མོ་ཡིན་ནའང་འདིའི་གདོང་ཡོད་ཚེ་ས་འོག་ཟླ་བས་སྟོང་བ་མིན།།
གལ་ཏེ་རིག་འཛིན་མ་ཡིན་གཞན་རིགས་ལས་རྒྱལ་བདག་ཅག་རིགས་ནི་འབྲས་དང་བཅས།།
གལ་ཏེ་གྲུབ་རིགས་ལས་སྐྱེས་དེ་ཕྱིར་གྲུབ་པ་འཇིག་རྟེན་གསུམ་དུ་གྲགས་པར་འགྱུར།།
བིདཱུཥཀས། ༼འདྲེན་པ་ལ་བལྟས་ནས་དགའ་བ་དང་བཅས་ཤིང་རང་ཉིད་ཀྱིས་རྟོགས་པར༽ ཨེ་མའོ།།  ཡུན་རིང་བོ་ཞིག་ནས་ཡིད་སྲུབ་ཀྱི་སྤྱོད་ཡུལ་དུ་ལྷུང་བར་གྱུར་ཏོ།།  བདག་ཉིད་ལ་སྟོན་ཅིང་།  ཡང་ན་མ་ཡིན་ཏེ།  བྲམ་ཟེ་བདག་གིའོ།།
འབངས་མོས། ༼མཛའ་བ་དང་བཅས་པར༽ཀྱེ།  བྲམ་ཟེ་བདག་སྨྲའོ།།
བརྩེ་མེད་མ་འདིའི་མདུན་དུ་རྒྱུད་མངས་བསྒྲགས་པས་ཅི་ཞིག་བྱ།  ༼ཞེས་ཏེ་རྒྱུད་མངས་འཕངས་སོ།།༽
འདྲེན་མས།  བུ་མོ།   བཅོམ་ལྡན་མ་གཽ་རཱི་ལ་མ་སྨད་ཅིག   ཀེ     དིང་བཅོམ་ལྡན་མས་བཀའ་དྲིན་མཛད་པ་བཞིན་ནོ།།  (དེ་རིང་བཅོམ་ལྡན་མས་བདག་ལ་མཆོག་བྱིན་ནོ།།)
འབངས་མོས།  རྗེས་སྲས་མོ།   རེ་ཞིག་ཅི་འདྲ་བ་དག་སྨྲོས་ཤིག
འདྲེན་མས།  བུ་མོ།   ངེས་པར་དེང་རྨི་ལམ་དུ་བདག་འདི་བཞིན་ཉིད་དུ་རྒྱུད་མངས་བསྒྲེང་བ་ལ་བཅོམ་ལྡན་མས་གསུངས་པ།   བུ་མོ་ཁྱོད་ཀྱིས་རྒྱུད་མངས་བསྒྲེང་བ་མཁས་པ་ཁྱད་པར་དུ་འཕགས་པ་འདི་དང་།   བདག་ལ་ཐུན་མོང་མ་ཡིན་པའི་གུས་པ་བུ་མོའི་དངོས་པོ་ལ་རྙེད་དཀའ་བ་འདིས་བདག་ཤིན་ཏུ་ཚིམ་པར་གྱུར་ཏོ།།  དེའི་ཕྱིར་ཡུན་རིང་བོ་མ་ཡིན་པ་ན་རིག་པ་འཛིན་པའི་འཁོར་ལོས་སྒྱུར་བས་ལག་པ་འཛིན་པར་འགྱུར་རོ་ཞེས་སོ།།
འབངས་མོས། ༼དགའ་བ་དང་བཅས་པར༽ རྗེས་སྲས་མོ།   གལ་ཏེ་དེ་ལྟར་ཡིན་ན་རྨི་ལམ་དུ་ཞེས་ཅིའི་ཕྱིར་བརྗོད།  ལྷ་མོས་སྙིང་ལ་འདོད་པའི་མཆོག་བྱིན་པ་ཉིད་ཡིན་ནོ།།
བིདཱུཥཀས།  ངེས་པར་བདག་ཅག་ལྷ་མོ་ལྟ་བའི་སྐབས་སུ་བབ་པོ།།  དེའི་ཕྱིར་ཚུར་ཤེག     ཉེ་བར་འགྲོ་བར་བྱའོ་ཞེས་ཏེ་ཉེ་བར་བཏུད་དོ།།
འདྲེན་པས།  ( རེ་ཞིག་བདག་ཞུགས་པར་མི་བྱའོ།།)                  
བིདཱུཥཀས། ༼མི་འདོད་བཞིན་དུའང་འདྲེན་པ་ཤུགས་ཀྱིས་ཁྱེར་(འཁྲིད་)ནས་དྲུང་དུ་སླེབས་པར་བྱས༽ ཇོ་མོ་གྲུང་མོ།   བདག་བདེན་པར་སྨྲ་སྟེ།   འདི་ནི་མཆོག་བྱིན་པ་ཉིད་དོ།།
འདྲེན་མས།   ༼འཇིགས་པ་དང་བཅས་ཏེ་འདྲེན་པ་མཚོན་ཏེ༽ བུ་མོ།  འདི་སུ་ཞིག་ཅེས་སོ།།
འབངས་མོས། གཞན་དང་ཐུན་མོང་མ་ཡིན་པའི་རྣམ་པ་འདིས་ན།  འདི་ཉིད་བཅོམ་ལྡན་མས་བཀའ་དྲིན་མཛད་པ་ཡིན་སྙམ་མོ།།
འདྲེན་མས། ༼ཆགས་པ་དང་བཅས་ཤིང་ངོ་ཚ་བ་དང་བཅས་པར༽  བལྟས་སོ།།
འདྲེན་པས།   གཡོ་ཞིང་ཡངས་པའི་མིག་ལྡན་དབུགས་འབྱིན་ཅིང་།།  འདར་ཞིང་མཁྲེགས་སྟུག་ནུ་ལྡན་འཁྲུལ་བྱེད་མ།།   ལུས་འདི་དཀའ་ཐུབ་ཉིད་ཀྱིས་ཤིན་ཏུ་ནི།།   ངལ་གྱུར་སླར་ཡང་ཅི་སླད་གདུང་བར་བྱེད།།
འདྲེན་མས།  བུ་མོ།   ཤིན་ཏུ་འཇིགས་པས་འདི་ལ་མངོན་དུ་ཕྱོགས་ཏེ་འདུག་པར་མི་ནུས་སོ།། ༼ཞེས་ཏེ་ལོགས་ལ་བལྟས་ནས་འཁོད་དོ།།༽
བིདཱུཥཀས།  ཇོ་མོ་ཁྱོད་ཀྱི་དཀའ་ཐུབ་ཀྱི་ནགས་ཚལ་འདི་ན་གང་ཞིག་འགྲོན་པོ་འོངས་པ་ལ་ཚིག་ཙམ་གྱིས་ཀྱང་ཕེབས་པར་སྨྲ་བ་མ་ཡིན་པ་འདི་འདྲ་བའི་ཀུན་ཏུ་སྤྱོད་པ་ཡོད་དམ་ཅི།
འབངས་མོས། རྗེའི་སྲས་མོ།  འགྲོན་པོ་ལ་བསྙེན་བཀུར་བྱ་བ་རིགས་པ་ཡིན་ནོ།།  དེའི་ཕྱིར་ཇི་ལྟར་མཐུ་ཆེན་པོ་དང་ལྡན་པ་འདི་དག་ལ་གུས་པར་བྱ་བ་རྨོངས་པར་གནས།  ཡང་ན་ཁྱོད་བཞུགས་ཤིག    ཁོ་མོ་ཉིད་ཀྱི་ཇི་ལྟར་རིགས་པ་དག་བྱའོ།།   ༼འདྲེན་པ་ལ་མཚོན་ཏེ༽ ཇོ་བོ་ལེགས་པར་འོངས་སམ།   ཇོ་བོ་སྟན་ཡོངས་སུ་བཟུང་བས་ཕྱོགས་འདི་བརྒྱན་པར་མཛོད་ཅིག
བིདཱུཥཀས།  ཀྱེ་གྲོགས་པོ།    འདི་ནི་ལེགས་པར་སྨྲའོ།།  ཡུད་ཙམ་ཞིག་འདུག་སྟེ་ངལ་གསོ་བར་བྱའོ།།
འདྲེན་པས། ཁྱོད་ནི་རིགས་པར་སྨྲའོ།།  ༼གཉི་ག་འཁོད་དོ༽
འདྲེན་མས།  ཀྭ་ཡེ།   བཞད་གད་ཀྱི་ངང་ཚུལ་ཅན་མ་དེ་ལྟར་མ་བྱེད།    གལ་ཏེ་དཀའ་ཐུབ་པ་འགའ་ཞིག་གིས་མཐོང་ན་འདི་ལས་བདག་དུལ་བ་མ་ཡིན་པ་དང་ལྡན་པར་དོགས་པར་འགྱུར་རོ།།
༼དེ་ནས་དཀའ་ཐུབ་པ་ཞུགས་ཏེ༽
(དཀའ་ཐུབ་པས།)        རིགས་ཀྱི་བདག་པོ་ཀཽ་ཤི་ཀས་བདག་ལ་བཀའ་བསྒོས་པ།   མཉེས་གཤིན་ཤཱཎྜི་ལྱ།   ཡབ་ཀྱི་བཀས།   རྒྱལ་ཚབ་བཤེས་གཉེན་གྱི་དབྱིག་གཞོན་ནུ་སྤྲིན་གྱི་བཞོན་པ་རིག་པ་འཛིན་པའི་འཁོར་ལོས་སྒྱུར་བར་འགྱུར་བ་དག་རི་མ་ལ་ཡ་འདི་ཉིད་ཀྱི་ཕྱོགས་འགའ་ཞིག་ན་གནས་པ་སྲིང་མོ་མ་ལ་ཡ་ཅན་གྱི་ཁྱིམ་ཐབས་ཀྱི་སླད་དུ་བལྟ་བའི་ཕྱིར་དེ་རིང་འོངས་ཏེ།   གལ་ཏེ་དེ་བལྟ་(སྒུག་ཅིང)ཞིང་མ་ལ་ཡ་ཅན་གྱི་ཉི་མ་གུང་གི་མཆོད་སྦྱིན་གྱི་དུས་ཡོལ་བར་འགྱུར་སྲིད་དོ།།    དེས་ན་དེ་བོས་ལ་ཤོག་ཤིག་ཅེས་སོ།།    དེས་ན་བདག་རེ་ཞིག་གཽ་རཱི་ཁང་བ་ཉིད་དུ་འགྲོའོ།།                         ༼འགྲོ་ཞིང་ས་ལ་རྣམ་པར་བལྟས་ནས༽
ཨ་ཡེ།  རྡུལ་དང་ལྡན་པའི་ཕྱོགས་ན་རབ་ཏུ་གསལ་བའི་འཁོར་ལོས་མཚན་པའི་རྗེས་ཀྱི་ཕྲེང་བ་དག་སྣང་བ་འདི་སུ་ཞིག་གི་ཡིན།    ༼མདུན་དུ་བལྟས་ཏེ་སྤྲིན་གྱི་བཞོན་པ་ལ་ངེས་པར་བརྟགས་ནས་༽འདི་ནི་སྐྱེས་བུ་ཆེན་པོ་འདི་ཡིན་ནམ་སྙམ་མོ།།
                                     གཞན་ཡང་།
མགོ་ལ་གཙུག་ཏོར་འདི་གསལ་སྨིན་མའི་བར་ན་མཛོད་སྤུ་འདི་ནི་རྣམ་པར་མཛེས།།
མིག་ནི་པདྨའི་རྗེས་སུ་མཐུན་ཞིང་བྲང་གདེངས་འཕྲོག་བྱེད་དག་ལ་འགྲན་པར་བྱེད།།
ལག་པ་འཁོར་ལོས་མཚན་པ་ཇི་ལྟར་དེ་ལྟར་སྐྱེས་བུ་དག་ནི་སུ་ཞིག་འདི།།
རིག་པ་འཛིན་པའི་འཁོར་ལོས་སྒྱུར་བའི་གནས་དག་མ་ཐོབ་འདུག་པ་ཡིན་ནམ་སྙམ།།
ཡང་ན་ཐེ་ཚོམ་གྱིས་ཇི་ཞིག་བྱ་སྟེ།  ༼ ཤིན་ཏུ་གསལ་བར་༽ འདི་ནི་སྤྲིན་གྱི་བཞོན་པ་ཡིན་པར་ངེས་སོ།།
༼མ་ཡ་ལ་ཅན་མ་ལ་བལྟས་ནས་༽ ཨ་ཡེ།   འདི་ཡང་རྒྱལ་བོའི་བུ་མོའོ།།   ༼གཉིས་ཀ་ལ་བལྟས་ནས ༽  གལ་ཏེ་ཕན་ཚུན་རྗེས་སུ་འཚམ་པ་འདི་དག་འབྲེལ་བར་བྱེད་ན་བྱེད་པ་པོ་ནི་ཡུན་རིང་བོ་ཞིག་ན་རིག་པར་བྱེད་པར་གྱུར་ཏོ།།   (འདྲེན་པ་ལ་)ཉེ་བར་བཏུད་ནས་༽ཁྱོད་ནི་དགེ་བར་གྱུར་ཅིག 
འདྲེན་པས།   བཅོམ་ལྡན་སྤྲིན་གྱི་བཞོན་པ་ཕྱག་བགྱིད་དོ།།༼ཞེས་ཏེ་ལྡང་བར་འདོད་དོ།།༽
དཀའ་ཐུབ་པས།  མངོན་དུ་ལྡང་(ཡར་ལངས་མི་དགོས་ཞེས་པའི་དོན་ནོ་རང་)མི་དགོས་སོ།།   ཀྱེ།   "མངོན་འོངས་ཀུན་གྱི་བླ་མ་ཉིད་"ཅེས་པས།   ཁྱོད་ཉིད་བདག་ཅག་གི་བླ་མ་ཡིན་ནོ།།  དེས་ན་ཇི་ལྟར་བདེ་བར་བཞུགས་ཤིག
མ་ཡ་ལ་ཅན་མས།  ཇོ་བོ་ལ་ཕྱག་འཚལ་ལོ།། 
དཀའ་ཐུབ་པས།  ༼དེ་མཐོང་ནས༽ རྗེས་སུ་འཚམ་པའི་བདག་པོའི་སྐལ་བ་དང་ལྡན་པར་གྱུར་ཅིག       རྒྱལ་བོའི་བུ་མོ།   ཁྱོད་ལ་རིགས་ཀྱི་བདག་པོ་ཀཽ་ཤི་ཀས་བཀའ་སྩལ་པ།  ཁྱོད་ཀྱི་མཆོད་སྦྱིན་གྱི་དུས་ཡོལ་བར་འགྱུར་གྱིས་མྱུར་དུ་ཤོག་ཤིག་ཅེས་སོ།།
འདྲེན་མས།   ༼མི་དགའ་བ་དང་བཅས་པར༽ གང་བླ་མས་བཀའ་སྩལ་པ་ཉིད་དོ།། 
༼རང་གིས་རྟོགས་པར༽       
 གཅིག་ནི་བླ་མའི་གསུང་དང་གཞན།།  མཛའ་བོ་བལྟ་བའི་རྩེ་དགའ་བཟང་།།
  འགྲོའམ་མི་འགྲོ་འགལ་བ་ལ།།   བདག་སྙིང་འཕྱང་མོ་ཡུག་པར་འགྱུར།།
༼ཤུགས་ཕྱུང་ཞིང་ལངས་ཏེ་ངོ་ཚ་བ་དང་བཅས་ཤིང་ཆགས་པ་དང་བཅས་པར་འདྲེན་པ་ལ་ལྟ་ཞིང་དཀའ་ཐུབ་པ་དང་ལྷན་ཅིག་སོང་བར་གྱུར་ཏོ།།༽
འདྲེན་པས། ༼སྲེད་པ་དང་བཅས་པར་ཤུགས་ཕྱུང་ནས་འདྲེན་མ་ལ་ལྟ་ཞིང་༽
 ཚང་རའི་ཁྱོན་གྱི་ཁུར་ལྡན་ཞིང་།།   དམན་པ་དག་ཏུ་འགྲོ་མ་འདི།། 
  གཞན་དུ་འགྲོ་ཡང་བདག་གི་ནི།།སྙིང་ལ་གོམ་པ་བཀོད་པར་གྱུར།།
འབངས་མོས།    ཚུར་ཤེག   ཚུར་ཤེག    རྗེའི་སྲས་མོ་༼ཞེས་ཏེ་མ་ལ་ཡ་ཅན་མ་འཁོར་དང་བཅས་པ་སོང་བར་གྱུར་ཏོ།།༽
བིདཱུཥཀས།  ཀྱེ།  གང་ཞིག་བལྟ་བར་བྱ་བ་དག་མཐོང་ངོ་།།   ད་ནི་ཉི་མ་གུང་གི་ཉི་མའི་གདུང་བ་ཉིས་འགྱུར་དུ་བྱས་པ་བཞིན་དུ་བདག་གི་ལྟོ་བའི་མེ་དག་ལྷབ་ལྷབ་བྱེད་དོ།།   དེའི་ཕྱིར་འདི་ནས་སོང་སྟེ།   གང་གིས་བྲམ་ཟེ་དག་གི་མགྲོན་དུ་འགྱུར་བར་བྱས་ནས་ཐུབ་པའི་སྐྱེ་བོ་ལས་དངོས་སུ་རྙེད་པའི་རྩ་བ་དང་ཆུ་བ་ལ་སོགས་པས་སྲོག་གཟུང་བར་བྱའོ།།
འདྲེན་པས། ༼སྟེང་དུ་བལྟས་ནས༽ཨ་ཡེ།   བཅོམ་ལྡན་འོད་ཟེར་སྟོང་ཕྲག་ལྡན་ནི་ནམ་མཁའི་དཀྱིལ་ན་འཛེགས་ཏེ་བཞུགས་སོ། །
དེ་ལྟར་ཡང་།
གདུང་བས་དེ་དུས་ཙན་དན་ལ་བདར་ཐང་ཆུས་དཀར་བའི་འགྲམ་པ་འཛིན་བྱེད་ཅིང་།།
རང་གི་རྣ་བ་བསྐྱོད་པའི་རླུང་ནི་ཡང་དག་ཆགས་པས་བཞིན་ལ་གཡོབ་བྱེད་ཅིང་།།
ལག་པས་གཏོར་བའི་ཆུ་ཐིགས་སྙིང་ཁར་ཁྱད་པར་དུ་འདྲེན་གླང་བོའི་བདག་པོ་འདི།།
ད་ནི་བཟོད་དཀའ་ཟུག་རྔུ་དྲག་པོས་ཟུག་པ་ལྟ་བུའི་གནས་སྐབས་འཛིན་པར་བྱེད།།
༼ཅེས་ཏེ་གཉི་ག་སོང་བར་གྱུར་ཏོ།།༽
མཚན་མ་དང་བོ་རྫོགས་སོ།།
        (ཟླ་བ་གཞོན་ནུས་འཕྲུལ་ཡིག་ཏུ་ཕབ)

རྩོམ་ཁུངས། ངེད་དྲ་བ།