དང་པོ། བདེན་པ་ངོ་མ་དང་སངས་རྒྱས་ཀྱི་བདེན་པ།
  མཐོང་རེག་མྱོང་རྒྱུ་ཡོད་པའི་དངོས་པོ་འདི།།
 
  བདེན་པ་མིན་ན་གང་ཞིག་བདེན་པ་ཡིན།།

  ཡ་མཚན་འཕྲུལ་ཐབས་གསར་པའི་ཐོན་དངོས་དག།།
  
བདེན་པ་བདེན་ཐོག་འཁྱོལ་པའི་དཔང་པོ་ཡིན།།
  ཅི་ཞིག་ལ་བདེན་པ་ཟེར་བ་རེད་ཅེས་ང་ཚོར་སུ་ཞིག་ནས་དྲི་བ་དྲིས་པ་ཡིན་ན་ཕལ་ཆེར་དེ་ལ་ལན་འདེབས་འདྲ་མིན་ཞིག་ཡོང་གི་རེད་འདོད། འགའ་རེས་བདེན་པ་ཟེར་བ་གཅིག་མ་གཏོགས་གཉིས་ཡོད་པ་མ་རེད། གཅིག་གི་ཐོག་ལ་གཅིག་མནན་ན་གཉིས་རེད་ཅེས་དང་། ཡང་འགའ་རེས་བདེན་པ་ཟེར་བ་དེ་ནི་འདི་རེད་ཟེར་ནས་གཅིག་གྱུར་ཅིག་མེད་པར་གང་ཟག་སྒེར་བ་སོ་སོའི་འདོད་མོས་དང་དགའ་སྣང་དང་མཐུན་མིན་གྱིས་འཇོག་པའི་མི་སྒེར་ལ་འབྲེལ་བ་ཡོད་པ་ཞིག་རེད་ཟེར་སྲིད། དཔེར་ན། མཛེས་མི་མཛེས་དང་དགའ་མི་དགའ་ལ་བསམ་ཚུལ་ཡེ་ནས་མི་མཐུན་པ་རེད། དེ་ལྟར་ན།མི་སུམ་ཅུ་ལ་བསམ་པ་སུམ་ཅུ་ཡོད་པ་ལྟར་བདེན་པའང་སུམ་ཅུ་ཡོད་པ་རེད། ཡང་། རྟ་ཞིག་བསྟན་ནས་འདི་རྟ་ཨེ་རེད་ཟེར་ན། དེ་རྟ་ཡིན་པར་མི་ཚང་མ་ཁ་མཐུན་པ་དང་དེ་རྟ་ཡིན་པ་བདེན་པར་འཛིན་པའོ། གོང་གསལ་གྱི་དྲི་བ་དང་ལན་མི་འདྲ་བ་འདི་དག་ལས་ང་ཚོས་ཤེས་པ་ནི། ང་ཚོས་བདེན་པའི་སྐོར་ལ་དྲི་བ་འདྲི་གི་ཡིན་ན་ཆོས་དང་དོན་དག་བྱེ་བྲག་པ་ཞིག་གི་ཐོག་ཏུ་བབས་ནས་དེ་བདེན་པ་ཡིན་མིན་དྲི་བ་མ་དྲིས་ན་འབབ་ས་ཅི་ཡང་མེད་པ་རེད།

          ༡ དངོས་ཡོད་ཡིན་ན་བདེན་པ་མ་རེད་དམ།
  སྤྱིར་བཏང་། ང་ཚོའི་མིའི་སྤྱི་ཚོགས་འདིའི་ངོས་འཛིན་སྟངས་ལྟར་བྱས་ན། དབང་པོ་ལྔའི་སྤྱོད་ཡུལ་དུ་གྱུར་པའི་རིག་རྒྱུ། མཐོང་རྒྱུ། རེག་རྒྱུ་ཡོད་པའི་རི་རྭ་བ་ཁང་ཁྱིམ་རྟ་དང་བ་གླང་ལ་སོགས་པའི་སེམས་ལྡན་སེམས་མེད་ཀྱི་དངོས་པོ་འདི་དག་ཐམས་ཅད་ལ་དངོས་ཡོད་དང་བདེན་པར་བརྩི་བ་རེད། ང་ཚོའི་མཐོང་སྣང་དུ་དངོས་སུ་གྲུབ་པའི་མངོན་སུམ་དང་དངོས་ཡོད་བདེན་པའི་ཆོས་འདི་དག་ནི་འཁྲུལ་བའི་རང་བཞིན་དང་བདེན་པར་མ་གྲུབ་པར་འགྲེལ་བརྗོད་གནང་མཁན་ཡང་ཡོད་པ་ཀུན་ཤེས་རེད། དཔེ་བཞག་ན། ཕི་ལ་ཋོ། སྤྱི་ལོ་སྔོན ༤༢༨-༣༤༧དང་ནང་ཆོས་ལྟ་བུ་རེད། ཕི་ལ་ཋོ་ཡིས་དབང་ཤེས་ལྔ་དེ་འཁྲུལ་བའི་རང་བཞིན་ཅན་དང་ཆ་མ་ཚང་བ་ཞིག་ཡིན་པར་ངོས་འཛིན་གྱིས་དབང་ཤེས་ཀྱིས་ཁྱེར་ཡོང་བའི་ང་ཚོའི་མཐོང་སྣང་གི་དངོས་པོ་འདི་དག་ཀྱང་བདེན་པ་མིན་པར་སྒྲུབ་ཡོད་པ་རེད། ནང་ཆོས་སུའང། ་ང་ཚོའི་བདེན་པ་ཡིན་མིན་ངོས་འཛིན་མཁན་གྱི་བློ་འདི་ལ། ཀུན་རྫོབ་ཀྱི་བློ་ཟེར་ནས་ཡང་དག་པ་མིན་པར་བརྗོད་ཡོད་པ་མ་ཟད་མཐོང་སྣང་གི་དངོས་པོ་དེ་དག་ཀྱང་བདེན་པར་མ་གྲུབ་པར་བརྗོད་ཡོད་པ་མ་རེད་དམ།
འདི་ནས་མར་ཡོངས་གྲགས་སུ་དངོས་ཡོད་དང་བདེན་པར་འཛིན་པའི་བློ་དང་མཐོང་སྣང་གི་དངོས་པོ་འདི་དག་དངོས་སུ་ན་ཡང་དག་ཡིན་དང་འཁྲུལ་བ་ཡིན་མུ་མཐུད་དཔྱད་ཞིབ་བྱེད་ན་འདོད། ང་ཚོའི་དབང་ཤེས་ལྔ་དེར་འཁྲུལ་བའི་ཆ་ཡོད་ནའང་རྦད་དེ་འཁྲུལ་བ་ཡིན་པར་བརྗོད་ན་དེ་ནི་ནོར་འཁྲུལ་ཅན་གྱི་ལྟ་ཚུལ་ཞིག་རེད། རྒྱུ་མཚན་ནི། ང་ཚོ་འགྲོ་བ་མི་ཟེར་བའི་ཤེས་པ་དང་ལྡན་པ་འདིས་ནོར་འཁྲུལ་ཡང་ཡང་བཟོ་གི་ཡོད་ནའང་། བཟོས་པའི་ནོར་འཁྲུལ་དེ་བཅོས་བྱེད་ཀྱི་ཤེས་རབ། རྣམ་དཔྱོད། རྒྱུ་མཚན། རིགས་པ། གཏན་ཚིགས། ད་དུང་ལོ་རྒྱུས་ཀྱི་ཉམས་མྱོང་སོགས་ཀྱིས་འཁྲུལ་བ་དེ་བཅོས་ནས་ཡང་དག་པ་དང་བདེན་པར་བཟོ་ཐུབ་པ་རེད། ང་ཚོས་ལོ་རྒྱུས་ཀྱི་དུས་རིམ་རིང་པོ་བརྒྱུད་ད་ལྟ་ལ་ཐུག་གི་བར་མཐོང་སྣང་གི་དངོས་པོ་འདི་དག་བདེན་པར་བཟུང་བ་མ་ཟད་བདེན་པའི་བྱ་དངོས་འདི་དག་ཐམས་ཅད་ཀྱི་ངོ་བོ། རྣམ་པ། བྱེད་ལས། དབྱེ་བ་སོགས་ལ་རྣམ་དཔྱོད་དང་ལྡན་པའི་ངང་ཞིབ་འཇུག་དང་བརྟག་དཔྱད་བྱས་ཏེ་བདེན་པའི་གནས་ལུགས་མང་པོ་ཞིག་ཤེས་ཏེ་ཚན་རིག་དང་མཐུན་པའི་གྲུབ་དོན་རྙེད་ཡོད་པ་རེད། བདེན་པ་ངོ་མ་འཁྲུལ་བར་ལྟ་མཁན་དག་གི་བསམ་པའི་ཡིད་ལས་འདས་པའི་ཚན་རིག་གི་གསར་བཏོད་ཏེ་གནམ་གྲུ། བརྙན་འཕྲིན། རླུང་འཕྲིན། འཕུར་མདའ། ཆུ་གློག སྐམ་གློག རླུང་གློག ཉི་གློག་སོགས་གྲངས་ལས་འདས་པ་ཞིག་ང་ཚོའི་མིག་ངོར་སྤྱོད་དུ་ཡོད་པ་འདི་བདེན་པ་བདེན་པར་ཤེས་པའི་གྲུབ་འབྲས་ཅི་ལ་མིན། འདི་ནི་བདེན་པ་བདེན་ཐོག་འཁྱོལ་བའི་དཔང་པོ་ཞིག་ཀྱང་རེད། ཨ་རེ་སི་ཋོ་ཋལ་གྱིས་སྤྱི་ལོ་སྔོན་ནས། དབང་ཤེས་ལྔ་བརྒྱུད་ནས་ཡོང་བའི་ཤེས་པ་དེ་དངོས་བདེན་མཇལ་བྱེད་ཀྱི་ཚད་ཐིག་མཐོ་ཤོས་དེ་ཡིན་པར་ངོས་བཟུང་བ་དེར་ད་ལྟ་བལྟས་ནའང་ངོ་མ་བདེན་པར་མཐོང་། ནང་ཆོས་སུ། ང་ཚོའི་བློ་འདི་འཁྲུལ་བའི་རང་བཞིན་ཅན་དང་། མཐོང་སྣང་གི་དངོས་པོ་འདི་ཚོ་བདེན་པར་མ་གྲུབ་པར་གསུང་གི་འདུག་ཀྱང་། ཕྱོགས་གཅིག་ནས་ང་ཚོའི་མཐོང་རེག་ཏུ་དངོས་སུ་གྱུར་པ་འདི་དག་ལ་མངོན་སུམ་ཚད་མ་ཟེར་ནས་གལ་ཆེན་དུ་བརྩི་གི་འདུག ད་དུང་སྟོང་ཉིད་ཟེར་བའི་རྟོགས་དཀའ་བའི་གནས་ལུགས་དེའང་ཀུན་རྫོབ་ཟེར་ནས་མཐོང་ཆུང་བྱེད་ཡུལ་དུ་གྱུར་པའི་བློ་འདིས་རྟོགས་དགོས་པ་ཞིག་མ་ཡིན་ནམ། ང་ཚོའི་འཁྲུལ་བའི་བློ་འདིས་འཁྲུལ་གྱིན་འཁྲུལ་གྱིན། བཅོས་གྱིན་བཅོས་གྱིན། ཤེས་རབ་དང་རྣམ་དཔྱོད་ཀྱིས་ཡང་ཡང་བརྟག་ཤིང་དཔྱད་དེ་རྟོགས་དགོས་པ་ཞིག་མ་ཡིན་ནམ
        ༢ ནང་ཆོས་ཀྱི་བདེན་པ་དེ་བདེན་པ་བྱེ་བྲག་པ་ཞིག་མ་ཡིན་ནམ།
  འགྲིག་མིན་མི་ཤེས་ཀྱང་ངའི་ལྟ་ཚུལ་ལྟར་བྱས་ན། ནང་ཆོས་ནི་ནང་སེམས་ཀྱི་བདེ་སྐྱིད་འཚོལ་ཐབས་ཀྱི་ཆོས་ལུགས་གྲུབ་མཐའ་ཞིག་ཏུ་མཐོང་། བདེ་སྐྱིད་དགོས་ན་སྡུག་བསྔལ་མེད་པ་བཟོ་དགོས་པ་རེད། སྡུག་བསྔལ་མེད་པ་བཟོ་དགོས་ན་སྡུག་བསྔལ་གྱི་འབྱུང་ཁུངས་སུ་གྱུར་པའི་ཉོན་མོངས་དང་། སྡུག་བསྔལ་དང་ཉོན་མོངས་ཀྱི་གཞི་རྩར་གྱུར་པའི་སེམས་ཀྱི་འཛིན་པའམ་བདེན་འཛིན་དེ་མེད་པ་བཟོ་དགོས་པ་གསལ་བོ་རེད། དམིགས་ཡུལ་དེ་འདྲ་ཞིག་བཅངས་ནས། བློ་འཁྲུལ་བ་ཡིན་པ། མཐོང་སྣང་གི་ཆོས་འདི་དག་བདེན་པར་མ་གྲུབ་པ། གཟུགས་སྟོང་བ་ཡིན་པ། ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་བ་ཡིན་པ་སོགས་གསུངས་པ་མ་ཡིན་ནམ། དངོས་པོ་རྣམས་རང་བཞིན་གྱིས་གྲུབ་མ་གྲུབ་དང་། དངོས་པོ་དེ་ཕར་འཚོལ་བ་ཡིན་ན་བཙལ་དུ་མེད་པ། དངོས་པོ་ཟེར་ན་དེ་ནི་ཐ་སྙད་ཀྱི་བཏགས་དོན་ཙམ་ལས་མ་འདས་པ་སོགས་ཕྱོགས་གཅིག་ནས་བལྟས་ན་སངས་རྒྱས་ཀྱི་བདེན་པ་དེའང་བདེན་པ་ལྟར་སྣང་ཡང་། མཐར་དེད་ན་བདེན་པ་དེ་ནི་དངོས་པོ་གང་ཞིག་ལ་བྱེ་བྲག་ཏུ་ལྟ་བའི་བདེན་པ་ཞིག་ལས་མ་འདས།
  ད་ནངས་ཅི་བྱས་ད་ལྟ་མི་དྲན་པའི།།
  ཀླད་འཐོམས་འདི་ལ་བསམ་ན་ཡི་ཆད་ཀྱང་།།
  བདེན་པ་བརྗོད་ལ་དགའ་བའི་ཁ་ལྕེ་འདི།།
  བདེན་པའི་ཆེད་དུ་ནམ་ཡང་སྡོད་མ་ཚུགས།།


          གཉིས་པ། བདེན་གླུ་གཅེར་ཉལ་མ།
  དོན་དམ་ཟེར་བ་ཡི་བདེན་པ་སྙིང་རྗེ་བོ།།

  རྟེན་དང་འབྲེལ་འབྱུང་གིས་ཡོད་ཡོད་འདྲ་བ་འདི།།

  རིགས་པས་བདའ་འདེད་ཀྱིས་མེད་མེད་ཟེར་བ་འདི།།

  བདེན་པ་རྣལ་མ་ཞིག་ཡིན་པ་དཀའ་དཀར་སྣང་།།
  ཡོད་པ་འདི་རེད་ཅེས་བསྟན་ན་བདེན་འཛིན་ཟེར།།

  མེད་ཚུལ་སྟོང་ཚུལ་དེ་བཤད་ན་ཆད་ལྟ་ཟེར།།

  ཡོད་མེད་མཐའ་གཉིས་སུ་མ་ལྷུང་ཡ་མཚན་འདི།།
  
ཕུང་གསུམ་པ་ཞིག་ཡིན་ནམ་སྒྱུ་མ་ཡིན།།
  ཡོད་པ་མེད་པར་བརྗོད་པ་འདི་བསླུ་བ་རེད།།

  ཡོད་མེད་འཛིན་རྒྱུ་མེད་པ་འདི་བསླུ་བ་རེད།།

  སྒྱུ་མ་ལྟ་བུའི་བཤད་པ་འདི་བསླུ་བ་རེད།།

  བདེན་པ་ལྟར་སྣང་གིས་བསླུ་བ་འདི་བསླུ་བ་རེད།།
  སྡུག་བསྔལ་གཅོད་ཐབས་ལ་གསུངས་པས་ཐུགས་རྗེ་ཆེ།།

  སྣང་བ་སྐྱིད་ཐབས་དེ་སྒྲུབ་པས་ཐབས་ལ་མཁས།།

  ཐབས་མཁས་ཐུགས་རྗེ་དང་ལྡན་པ་བདེན་མོད་ཀྱང་།།

  བདེན་པ་མཐར་ཐུག་དེ་ཡིན་ཚུལ་ཇི་འདྲ་རེད།།
  དོན་དམ་ཟེར་བ་ཡི་སྤྲུལ་བའི་ལྷ་བུ་འདི།།

  མིག་གིས་ཅེར་བ་ན་མཐོང་རྒྱུ་མེད་པ་འདི།།

  ལག་པས་བསྙབ་པ་ན་རེག་རྒྱུ་མེད་པ་འདི།།

  གནས་ཚུལ་སྣང་ཚུལ་དུ་བདེན་པ་མིན་པ་འདྲ།།
  ཀུན་རྫོབ་ཟེར་བ་ཡི་བུ་ཆུང་རྫོབ་རོ་འདི།།
  
འཁྲུལ་བའི་སྣང་བ་རེད་ཟེར་ནས་སྨོད་མོད་ཀྱང་།།
  
ཡང་ལྕི་རྒྱ་མ་ལ་མཇལ་རྒྱུ་ཡོད་གི་མོད།།

  རིང་ཐུང་འདོམ་པ་ལ་ཚད་རྒྱུ་ཡོད་གི་མོད།།
  མངོན་སུམ་ཚད་མ་ལ་ཚད་ལྡན་རེད་འདུག་མོད།།

  ཀུན་ལ་གཅིག་མཐུན་དུ་དངོས་སུ་སྣང་གི་མོད།།

  རིག་རྒྱུ་རེག་རྒྱུ་དང་མྱོང་རྒྱུ་ཡོད་གི་མོད།།

  ཚན་རིག་གྲུབ་དོན་ཞིག་རྙེད་རྒྱུ་ཡོད་གི་མོད།།
  དོན་དམ་དང་ཀུན་རྫོབ་ཟེར་བའི་བདེན་པ་གཉིས།།
  
མཉམ་གཤིབ་ཏུ་བཞག་ནས་གང་བདེན་བརྟག་པ་ན།།

  ཆེ་ཆུང་རིང་ཐུང་དང་ལྕི་ཡང་གྲུབ་ཚུལ་སོགས།།

  མཇལ་རྒྱུ་ཡོད་པ་དེ་ཀུན་རྫོབ་བདེན་པ་རེད།།
  གྲྭ་ས་འགྲིམས་པ་ཡི་ཨ་ཁུ་དགེ་བཤེས་ཚོ།།

  ཚེ་གང་ཐལ་མོ་རང་རྡབ་ནས་ཡོང་བ་ཚོ།།

  སྟོང་པ་རྩོད་གླེང་གིས་མགོ་སྟོང་མ་བྱེད་ཨ།།

  རྩོད་པ་བྱེད་འདོད་ན་ཡོད་པའི་དོན་དག་རྩོད།།
  མེད་པ་རྐྱང་བརྗོད་ནས་མེད་མུག་མ་འདོན་ཨ།།

  ཡོད་པར་བརྟག་དཔྱད་ཀྱིས་ཚན་རིག་གྲུབ་དོན་ཚོལ།།

  དངོས་པོའི་གཤིས་ཀ་ལ་སྐུར་བ་མ་འདེབས་ཨ།།

  དངོས་ཁམས་སྟོང་ཁམས་དང་སེམས་ཁམས་རིག་པ་སྦྱོངས།།
  མེད་ཚུལ་སྟོང་ཚུལ་གྱིས་ཡོང་རྒྱུ་ཡོད་མ་རེད།།

  སྡུག་བསྔལ་རྩ་བ་ནས་གཅོད་རྒྱུ་ཡོད་མ་རེད།།

  བདེ་སྐྱིད་མཐར་ཐུག་ཅིག་བསྒྲུབ་རྒྱུ་ཡོད་མ་རེད།།

  རུལ་མ་སེམས་སྐྱིད་ཀྱིས་དུས་ཚོད་མ་གཏོང་ཨ།།


           གསུམ་པ། རེས་བདེན་རེས་རྫུན་གོ་ཏ་མ་ཡི་གསུང་།
   མི་རྟག་དུ་ཁ་སྟོང་བ་བདག་མེད་པ།།

  དཔྱད་ན་བསམ་རྒྱུ་ཡོད་པའི་གནད་ཅན་ཆོས།།

   མྱང་ན་ཞི་བསིལ་བདུད་རྩི་ལྟ་བུའི་ཆོས།།

   ཐབས་མཁས་ཐུགས་རྗེ་ཆེ་ལ་ཕྱག་ཅིག་འཚལ།།
  ༡ མི་རྟག
་མི་རྟག་མི་རྟག་ཟེར་བར་བདེན་ཅིག་འདུག།

  ཐམས་ཅད་སྐད་ཅིག་མི་སྡོད་བཞུར་གྱི་འདུག།

  རྦད་དེ་མི་རྟག་ཟེར་ན་སྐྱོན་ཅིག་འདུག།

  དངོས་པོའི་འགྲུབ་བྱེད་ཕྲ་རྡུལ་རྟག་པ་ཡིན།།
  ༢ དུ་ཁ་འཁོར་བའི་སྡུག་བསྔལ་བགྲང་ན་བདེན་ཅིག་མཐོང་།།

  བསམ་ཞིང་བསམ་ན་ངུ་རྒྱུ་ཡོང་གི་འདུག།

  བདེ་སྐྱིད་མེད་པར་བརྗོད་ན་རྫུན་ཞིག་འདྲེས།།

  བདེ་སྡུག་སྤེལ་མ་འཇིག་རྟེན་འཁོར་བའི་ཆོས།།
  ༣ སྟོང་བ་སྟོང་ཉིད་བཤད་ན་གོ་རྒྱུ་ཡོད་གི་མོད།།

  མེད་ཚུལ་བཤད་ན་རྒྱུ་མཚན་མཐོང་གི་མོད།།

  ཡོད་པའི་ཞལ་རས་སྒྲིབ་ན་ཐུ་གི་མོད།།
  
དངོས་ཡོད་བཀག་ན་ངོས་ལེན་དཀའ་གི་མོད།།
  ༤ བདག་མེད་
བདག་གི་མདུད་པ་བཅད་ན་བདག་མེད་རེད།།
  
བདག་ཅེས་གཅེས་འཛིན་ཅན་འདི་བདག་ཡོད་རེད།།

  བདག་འདི་ཡོད་མེད་བདག་གི་རིགས་པར་ཐུག།

  བདག་གི་བསམ་ཚུལ་བཤད་ན་འདི་འདྲ་རེད།།
  བདེན་པ་བདེན་པར་བཟུང་ན་བདེན་ཅིག་ཡོད།།

  གསར་བཏོད་མུ་མཐུད་བྱེད་པར་ཕན་ཞིག་ཡོད།།

  བདེན་འཛིན་མེད་པར་སྒྲུབ་ན་སྐྱིད་ཅིག་ཡོད།།

  སྡུག་བསྔལ་སྣང་བ་ཟློག་པའི་སྐྱིད་ཅིག་ཡོད།།
  དེ་རིང་སྐད་ཆ་ཅུང་ཟད་ཐལ་ལོ་ད།།
  ཤཱཀྱ་ཐུབ་པ་ང་ཡི་ཧེ་རོ་ཡིན།།
  ལྟ་སྤྱོད་གཉིས་ཀ་ཁ་མིག་ཡར་ལྟ་ཡིན།།
  གལ་ལ་ཐུག་ན་ང་ཡི་མགོན་སྐྱབས་ཡིན།།
          2012.05.3

རྩོམ་ཁུངས། ངེད་དྲ་བ།