ཧིན་སངས་གཉིས་ཀྱིས་འདོད་པའི་འཇམ་དཔལ་དང་གཤིན་རྗེ་གཤེད་གཉིས་ཀྱི་འགྲེལ་བཤད་ཅུང་མི་འདྲ་བ་ལས། གཉིས་ཀས་རིག་བྱེད་ཀྱི་གཏམ་རྒྱུད་ལ་གཞི་བཅོལ་ནས་བསྒྲིགས་པ་གཅིག་མཚུངས་ཡིན་ཁར། འཇམ་དཔལ་གཤིན་རྗེ་གཤེད་དུ་འདོད་པ་གཅིག་མཚུངས་རེེད། སངས་ཆོས་ཀྱིས་འཇམ་དཔལ་སངས་རྒྱས་དང་སྲུང་མ། ཡི་དམ་དང་གཤིན་རྗེ་རུ་འདོད་ཚུལ་དང་། ཧིན་ཆོས་ཀྱིས་འཇམ་དཔལ་ཅི་ཞིག་འདོད་མིན་སོགས་ཀྱི་སྐོར་ལ་ཅུང་ཙམ་མཐའ་དཔྱོད་བྱེད་འདོད་བྱུང་།

              སངས་ཆོས་ཀྱི་འཇམ་དཔལ་འདོད་སྟངས།

  གཤིན་རྗེ་གཤེད་ནི་ཤི་རྗེས་ཀྱི་རྒྱལ་པོ་ཡིན་ཞིང་། སྲོག་ཆགས་སུ་ཞིག་ཤི་ཡང་། ཤི་རྗེས་སུ་སངས་ཆོས་ལས་གསུངས་པའི་ལས་འབྲས་ཀྱི་ཆོས་ཁྲིམས་ལྟར་སྐྱེ་བ་ཅི་ལྟར་འཕོ་འགྱུར་དང་། ཉེས་ཆད་ཅི་ལྟར་གཅོད་མིན་སོགས་ཀྱི་ཁྲིམས་ཐག་གཅོད་མཁན་དེ་ཡིན་པར་མ་ཟད། ཚེ་འདི་ལའང་གཤིན་རྗེ་གཤེད་བསྐྱེད་ནས། རང་ཉིད་གཤིན་རྗེ་གཤེད་དུ་བསྒོམ་ཐུབ་ཚེ། ལྷ་ཀླུ་གནོད་སྦྱིན་སོགས་ལའང་ཅི་འདོད་དུ་བཀའ་བཀོད་གཏོང་བའི་ནུས་པ་ཡོད་མཁན་དུ་འགྱུར་ཁར། ཤི་རྗེས་ཀྱང་དེ་དག་དང་འདྲིས་ཆ་ཡོད་པར་ཕན་པས། གཤིན་རྗེ་ཡི་སྒྲུབ་ཐབས་དང་། འཆམ་སོགས་ཡོད་ལ། དགུ་གཏོར་སོགས་ལ་ཡང་གཤེད་འཆམ་འཁྲབ་ཅིང་། རང་ཉིད་གཤེད་རྗེ་རུ་སྒོམ་ཏེེ་གཏོར་མ་འབུལ་སྲོལ་ཡོད།
  མ་གཞི་དགུ་གཏོར་ནི་གཏོར་མ་ལ་རིགས་འདྲ་མིན་སྣ་ཚོགས་ཡོད་པའི་ནང་གི་བགེགས་གཏོར་གྱི་གྲས་ཡིན་ལ། དེས་ལོ་གསར་བ་ཀག་མེད་ངང་ཚུར་བསུས་ཤིང་། ལོ་རྙིང་པའི་ནང་ཡོད་པའི་ཀག་དང་། བར་ཆད་གཏོང་མཁན་གྱི་ལྷ་འདྲེ་རྣམས་ཀྱིས་རྒྱུད་མཐུད་དུ་བར་ཆད་བཏང་མི་ཡོང་རྒྱུའི་ཆེད་དུ་དགོན་པ་མང་པོས། རང་ཉིད་ཕུར་བ་དང་། གཤིན་རྗེ་གཤེད་ཀྱི་ངོ་བོར་བསྐྱེད་ནས། དགུ་འཆམ་འཁྲབ་ཅིང་། གཏོར་མ་དང་ལྷན་དུ་ལྷ་འདྲེ་ངག་ལ་ཉན་མཁན་རྣམས་ལ་བཀའ་བསྒོས་དང་། ངག་ལ་མི་ཉན་མཁན་རྣམས་སྒྲོལ་བའི་སྟངས་སྟབས་ངོམ་པའི་ཟློས་གར་ཞིག་རེད།
  དེར་བརྟེན། དྲག་སྔགས་བགྲངས་ནས་འབྱུང་བོ་དང་། དམག་འཐབ་བྱེད་པའི་རྣམ་པ་ངོམ་གྱི་ཡོད་ལ། དར་ནག་བགྲངས་ནས་གཡུལ་ལས་རྒྱལ་བའི་མཚོན་དོན་སྟོན་གྱི་ཡོད། དམག་ལ་རྒྱལ་ཁ་ཐོབ་ཆེད་དུ་མེ་མདའ་དང་སྙུག་མ། ཤོག་སྤག་སོགས་བཀད་དགོས་ཤིང་། དེ་ལྟར་བྱས་ན་ལྷ་དམག་གིས་འདྲེ་དམག་ལ་ཕམ་ཁ་སྤྲོད་པར་རྒྱབ་སྐྱོར་དུ་འགྱུར་བས་རྒྱལ་ཁ་ཐོབ་སླ་བར་འདོད་ཁར། མེ་མདའ་རྒྱག་མཁན་དང་། ཀི་སྒྲ་འབྱིན་མཁན་སོགས་རབ་བྱུང་ཚེ། རང་ཉིད་ལྷ་དམག་གི་ངོ་བོར་བསྐྱེད་ཐུབ་ན་དེ་བས་ཕན་ནུས་ཐོན་པར་འདོད་ཀྱིན་ཡོད།
  དེ་ལྟར་མཛད་པ་དེས་འདྲེ་འདུལ་ཐུབ་མིན་ཐེ་ཚོམ་ཡིན་ཁར། འདུལ་བྱ་ཡོད་མེད་ཅིག་དེ་བས་ཀྱང་མ་ངེས་ཀྱང་། དད་པ་ཅན་ཚོའི་རྣམ་རྟོག་གི་འཇིགས་སྣང་སེལ་བར་ཕན་ཐོགས་ཡོད་པ་དངོས་ཡོད་ཡིན་པ་མ་ཟད། འདི་བརྒྱུད་ནས་དད་ལྡན་གྱི་མི་རྣམས་སྔར་ལས་བླ་མར་དད་རྒྱུ་དང་། བླ་མ་ལྷ་རུ་བསྒོམ་རྒྱུ། སངས་ཆོས་ལ་དད་པ་བྱེད་རྒྱུའི་ཆ་རྐྱེན་ཡག་པོ་ཞིག་གྱུར་ཡོད།
  གདོན་བགེགས་ལས་གྲོལ་བ་ལ་ཆ་རྐྱེན་དང་པོ་ནི་བླ་མ་དང་། སངས་ཆོས་ལ་དད་པ་བྱེད་རྒྱུ་ཡིན་པས། གལ་སྲིད་དད་པ་མེད་མཁན་ཞིག་ཡིན་ན་བླ་མས་གདོན་འདྲེ་འདུལ་བའི་ནུས་པ་མི་ཐོན་ཚུལ་བསྒྲུབས་ཤིང་། མི་རྣམས་བླ་མའི་བཀའ་བཀོད་ལས་ཐར་ཐབས་མེད་པའི་ཆ་རྐྱེན་སྐྲུན་བཞིན་ཡོད། འཆར་གཞི་དེ་ནི་སྔར་ནས་ད་ལྟའི་བར་དུ་ཆོས་དཔོན་ཚོས་བེད་སྤྱོད་གནང་བ་མ་ཟད། བྱེད་ཆེད་དུ་འཇམ་དཔལ་རྩ་རྒྱུད་སོགས་ལས། "སྔགས་ལ་དད་པ་མེད་པས་ན།། འབད་པ་དུ་མ་བྱས་གྱུར་ཀྱང་།། སྔགས་རྣམས་འགྲུབ་པར་མི་འགྱུར་རོ།། མ་ལུས་དམ་ཚིག་མི་བརྟན་ནོ།།" གཞན་ཡང་། "ཡང་ན་བླུན་པོ་དད་པ་བརྟན།། དེ་ལ་སྦྱོར་བའི་དངོས་གྲུབ་བརྙེས།།" ཞེས་དད་པ་མེད་ན་ཅི་ཡང་མི་འགྲུབ་ཚུལ་གླེང་ཞིང་། དད་པ་བེད་སྤྱོད་བཏང་ནས་གང་ཐུབ་ཀྱིས་མི་རྣམས་བླ་བཀའ་སྒྲུབ་མཁན་ཞིག་ཏུ་སྒྱུར་བཞིན་ཡོད།
  ཨོ་བྷ་མས་ཀྱང་དད་པ་ཡིས་མཚམས་རེ་མི་རྣམས་ལེགས་པའི་ལམ་དུ་ཁྲིད་ཡོད་ཀྱང་། ཐེངས་མང་པོར་དད་པས་མི་རྣམས་ལོག་ལམ་དུ་ཁྲིད་དེ་མི་གསོད་ཁྲག་སྦྱོར་དང་། རང་དབང་གཏོར་བཤིག ཐ་ན་མི་རྣམས་བྲན་གཡོག་ཏུ་བསྒྱུར་བའི་ལོ་རྒྱུས་མང་དུ་བྱུང་ཡོད། ཡི་ཤུའི་ཆོས་ལུགས་ཡིན་ཡང་བྲན་གཡོག་ཏུ་སྒྱུར་སྐབས་ཆོས་ལུགས་ཀྱི་དད་པ་བེད་སྤྱོད་བཏང་ནས་མི་རིགས་ནག་པོ་ཚོ་བྲན་གཡོག་ཏུ་བཏང་ཡོད་ལ། ཁ་ཆེ་ ISIS ཡིན་ཡང་། དད་པ་བེད་སྤྱོད་ཀྱིས་ཉེས་མེད་ཀྱི་མི་སྣ་མང་པོ་དམར་གསོད་གཏོང་བཞིན་ཡོད།
  བོད་ལའང་དད་པ་བེད་སྤྱོད་བཏང་ནས་མི་གསོན་པོའི་མིག་རྡོག་འདྲུ་བའི་གནས་ཚུལ་བྱུང་ཡོད་ལ། ད་ལྟ་དད་སྟངས་མ་གཅིག་པས་ལྷ་སྲུང་བསྟེན་ཕྱོགས་གཉིས་སུ་གྱེར་པའི་གནས་ཚུལ་ཐོན་བཞིན་ཡོད། འདི་དག་ནི་དད་པ་བེད་སྤྱོད་གཏོང་རྒྱུ་ལོག་ལམ་དུ་ཕྱིན་པས་རེད་ལ། དད་པ་བེད་སྤྱོད་བྱེད་རྒྱུ་མང་དྲགས་པས་རེད། མང་དྲགས་དགོས་དོན་ཡང་ཚོད་མེད་ཀྱི་དད་པ་ཡོད་མཁན་མང་དྲགས་པས་རེད།
གསིག་ཆོས་ལུགས་ཡིན་ཡང་དང་པོར་སངས་ཆོས་དང་ཧིན་ཆོས་སོགས་མཉམ་བསྲེས་ཀྱིས་ཆོས་ལུགས་རིས་མེད་ལ་ཁ་གཡར་ནས་ལེགས་པོ་བྱུང་ཡོད་ཀྱང་། རྗེས་སུ་དེ་དག་མཉམ་འདུས་ཀྱི་ཆོས་ལུགས་ཤིག་གྲུབ་མཚམས་སུ་རིས་མེད་ཀྱི་སྐད་ཆ་མེད་པ། ཁོང་ཚོའི་རྗེས་སུ་མི་འབྲང་མཁན་རྣམས་དམན་པ་དང་། རང་ཉིད་ཀྱི་ཆོས་ལུགས་གཞན་ལས་ལེགས་པ་ཡིན་པའི་ལྟ་ཚུལ་སླེབས་ཏེ་གཞན་དང་འདྲིས་རྒྱུར་དཀའ་ངལ་འཕྲད་བཞིན་ཡོད། དེའང་གསིག་ཆོས་ལ་དད་པ་ཤུགས་རྐྱེན་ཡོད་མཁན་ཚོས་དེ་ལྟར་བཟོས་པ་རེད། མི་ལ་དད་སེམས་ཆེ་ན་གཙང་རྩོག་ཆེ།། གཙང་རྩོག་ལས་ཀྱིས་དགོས་མེད་རྙོག་དྲ་ཡོང་།། དད་མེད་ཀུན་དང་མཐུན་པའི་གསེ་ཁོས་ལར cecular །། དེང་དུས་མི་རབས་གསར་བའི་མྱོང་བྱ་འོས།།

            འཇམ་དབྱངས་གཤིན་རྗེའི་རྒྱལ་པོ་རུ་ཆགས་སྟངས།

  འཇལ་དཔལ་གྲུབ་པའི་ཞལ་ལུང་ལས་ “གདུལ་བྱ་ཧ་ཅང་རྨུ་རྒོད་རིགས་ཅན་ཞི་བས་མི་ཐུལ་བ་རྣམས་དྲག་པོ་མངོན་སྤྱོད་ཀྱིས་འདུལ་བར་དགོངས་ཏེ། འཇམ་དཔལ་གཤིན་རྗེའི་གཤེད་ཀྱི་སྐུར་བཞེངས་པ་སྟེ། ལྷོ་ཕྱོགས་རིམ་པ་བདུན་གྱི་ས་འོག་ལྕགས་མཁར་གླིང་དགུའི་བདག་པོ་འཆི་བདག་མ་རུང་པར་སྐྱེས་ཤིང་འཇིག་རྟེན་ཕུང་བྱེད་དྲེགས་པའི་རྗེ་བོ་ལས་ཀྱི་གཤིན་རྗེར་གྱུར་པ་དེའི་ཚེ་ན་ཕྱོགས་བཅུའི་སངས་རྒྱས་རྣམས་སྤྲིན་བཞིན་འདུས་ཏེ་བཀའ་བགྲོས་པས་མཁྱེན་རབ་ཀྱི་བདག་པོ་འཕགས་པ་འཇམ་དཔལ་གྱིས་གདུལ་བྱར་དགོངས་ནས་སངས་རྒྱས་ཐམས་ཅད་ཀྱི་ཐུགས་ཡེ་ཤེས་ཆེན་པོས་བསྐུལ་ཏེ། མཁྱེན་རབ་བདག་པོ་ཁྱོད་ཉོན་ཅིག །སྔོན་གྱི་གོ་ཆ་ཡལ་ལམ་ཅི། །ལོ་ཀའི་སྡུག་བསྔལ་མི་ཤེས་སམ། །འཇིག་རྟེན་གདུང་བ་སེལ་བར་གྱིས། །ཞེས་གསུངས་སྐབས། འཇམ་དཔལ་དབྱངས་ཀྱིས་འདི་སྐད་ཅེས་ཞུས། ཐོག་མ་མཐའ་མ་མེད་པ་རུ། །བདག་གི་དམ་བཅའ་མི་འདོར་བའི། །བསྐུལ་བའི་དུས་ནི་གང་བྱུང་བ། །བདག་ཀྱང་དེ་བཞིན་ཆོ་འཕྲུལ་སྣང༌། །ཞེས་ཞལ་གྱིས་བཞེས་ཏེ་སླར་ཡང་འཆི་བདག་མ་རུང་པ་དེ་ཉིད་ཞི་བས་མི་ཐུལ་བ་དྲག་པོ་མངོན་སྤྱོད་ལས་ཀྱིས་འདུལ་བར་དགོངས་ཏེ། ཁྲོ་རྒྱལ་གཤིན་རྗེའི་གཤེད་ཕྱག་རྒྱ་ཟིལ་གནོན་གྱི་སྐུར་བཞེངས་ནས་བརྟུལ་ཞིང༌། དེར་འཁོར་ཚོགས་རྣམས་ཀྱང་རབ་ཏུ་འཇིགས་ཏེ། སྒོ་གསུམ་འབངས་སུ་མཆིས་སོགས་སྨྲེ་ངག་བྱུང་བ་དང་བྲན་དུ་བཀོལ་ཅིང་སྲོག་སྙིང་བླངས།” ཞེས་འཇམ་དཔལ་གཤིན་རྒྱལ་དུ་གྱུར་ཞིང་། དེས་སངས་རྒྱས་ཆོས་ལུགས་ལས་གསུངས་པའི་ལས་འབྲས་མི་བརྩི་མཁན་དང་། བླ་མའི་ངག་ལ་མི་ཉན་མཁན་ཚོར་ཉེས་ཆད་གཅོད་པ་བསྒྲུབས་ནས་མི་རྣམས་ལ་མགོ་སྐོར་གྱི་འཇིགས་སྐུལ་གཏོང་བཞིན་ཡོད།
  ཁོང་ཚོས་དེ་ནི་དགག་བྱ་དང་དགོས་པ་ཞེས་ནས་འགྲེལ་བཤད་སྣ་ཚོགས་བརྒྱབ་ཀྱིན་ཡོད་ཀྱང་། དོན་དངོས་དེ་ནི་མགོ་སྐོར་གྱི་ལས་དོན་ལས་ཅི་ཡང་མིན་ཞིང་། མི་རྣམས་ཆོས་ཕྱོགས་སུ་བསྒྱུར་ཡའི་ཆེད་དུ་མགོ་སྐོོོར་སོགས་ཐབས་ལམ་སྣ་ཚོགས་ཅི་འདོད་དུ་བེད་སྤྱོད་གཏོང་བཞིན་ཡོད་པ་ནི། ཚོང་པ་ནག་པོ་བཞིན་དམིགས་ཡུལ་འགྲུབ་ཡའི་ཆེད་དུ་ཐབས་ལམ་ཅི་ཞིག་ལ་བརྟེན་དགོས་ཀྱང་། བརྟེན་པ་དང་གཉིས་སུ་མེད་པས་དཀར་རྫུན་དུ་ཆགས་མི་འོས།
  གཤིན་རྗེ་གཤེད་སྲུང་མ་ཡི་ངོ་བོར་བསྒོམ་ན་ཆོས་རྒྱལ་དང་། ཡི་དམ་གྱི་ངོ་བོར་བསྒོམ་ན་འཇིགས་བྱེད་དུ་བཤད་ཅིང་། འཇམ་དཔལ་ཞལ་ལུང་ལས་ “མ་འོངས་རྩོད་ལྡན་སྙིགས་མ་ལྔ་ལ་སྤྱོད་པའི་ཚེ་བསྟན་པ་འཇིག་པ་དང༌། བསྒྲལ་བའི་ཞིང་བཅུར་གྱུར་པ་དག་ཚར་གཅོད་པའི་གཉེར་གཏད་ཅིང་སེམས་ཅན་གཞན་ལ་མི་འཚེ་བར་ཁས་བླངས་ཤིང་བསྟན་པའི་སྲུང་མར་བསྐོས།” ཞེས་སངས་ཆོས་ལ་གནོད་པ་བྱེད་མཁན་རྣམས་ཐར་བར་མི་གཏོང་ཚུལ་བསྒྲུབས་ནས་མི་རྣམས་སངས་ཆོས་སུ་དད་པ་བྱེད་པར་སྐུལ་འདེད་བྱེད་ཀྱིན་ཡོད་ཅིང་། གལ་སྲིད་དད་པ་མི་བྱེད་མཁན་ལ་འདི་ཕྱི་གཉིས་ལ་ཡག་པོ་མེད་པའི་ཞེད་སྣང་སློང་བཞིན་ཡོད།
  ཞེད་སྣང་སློང་ཆེད་དུ་ཆེད་མངགས་ཀྱིས་མི་དང་སྲོག་ཆགས་འདྲེས་མའི་དབྱིབས་གཟུགས་ངོམ་ཞིང་། དེ་ལྟར་བཞེངས་དགོས་པའང་དུད་འགྲོ་ལྷ་རུ་བརྩི་བའི་གནའ་བོའི་ལྷ་སྒྲུང་དང་། རིག་བྱེད་ཀྱི་གཏམ་རྒྱུད་སོགས་ཀྱི་ཤུགས་རྐྱེན་ཐེབས་པས་རེད། འགྲོ་བ་མིའི་ཤེས་རིག་ཡར་རྒྱས་ཕྱིན་པའི་འགྲོས་དང་བསྟུན་ནས། རང་བྱུང་ཁམས་ཀྱི་ཐུན་མོང་མ་ཡིན་པའི་ནུས་པ་ཅན་ཀུན་ལ་ལྐོག་གྱུར་གྱི་བྱེད་པ་པོ་གཞན་ཞིག་ཡོད་པར་འདོད་ཅིང་། དེའི་མིང་ལ་ལྷ་དང་འདྲེ་ཞེས་བཏགས་ཏེ། མི་རྣམས་ཞེད་སྣང་སྐུལ་ཆེད་དུ་དུད་འགྲོ་དང་མི་གཉིས་མཉམ་འདུས་ཀྱི་དབྱིབས་གཟུགས་དང་། ཡིད་ཆེས་བྱེད་ཆེད་དུ་མགོ་ལུས་མང་པོ་ཡོད་པའི་སྣང་བརྙན་རྟོག་བཟོ་སྣ་ཚོགས་བྱས་མཐར། གསང་སྔགས་སོགས་ཆོས་ལུགས་ཁག་ཅིག་གིས་ལྷ་སྐུ་དེ་དག་དྲག་པོའི་ངོ་བོར་བཞེངས་ཤིང་། མི་རྣམས་ལ་འཇིགས་སྣང་སྐུལ་བྱེད་དུ་བེད་སྤྱོད་གཏོང་བཞིན་ཡོད། ཡིན་ཏེ། ཇི་སྐད་དུ། རྣམ་འབྱོར་ལྷ་མེད་ཟེར་ནས་བརྙས།། ལྷ་མཆོག་མཐུ་མེད་ཟེར་ནས་དམོད།། བསྟན་པའི་དགྲ་བོར་གྱུར་པ་འདི།། ལོ་དང་ཟླ་བར་མ་བཞག་པར།། ཡ་མ་ར་ཛའི་ཞལ་དུ་ཐོོབས།། སོགས་ཡོད་པས་དྲག་ལྷ་དང་། དྲག་སྲུང་ལ་འགྲེལ་ཚུལ་སྣ་ཚོགས་ཡོད་ཀྱང་། གཙོ་བོའི་མཚོན་ཆ་བཞིན་དུ་ངག་ལ་མི་ཉན་མཁན་གྱི་མི་ལ་འཇིགས་སྣང་སྐུལ་བྱེད་དུ་བེད་སྤྱོད་གཏོང་བཞིན་ཡོད།
  ཁོང་ཚོ་ཁྲོ་བ་ཉོན་མོངས་དང་འདྲེ་རིགས་སྣ་མང་འདུལ་ཆེད་དུ་ཡིན་ཚུལ་སོགས་ཀྱི་དུས་མཐུན་གྱི་འགྲེལ་བཤད་སྣ་ཚོགས་ཤིག་ཡོད་ཀྱང་། དངོས་སུ་ཉོན་མོངས་དང་། འདྲེ་རིགས་འདུལ་ཆེད་དུ་གཙོ་བོར་དམིགས་པ་མིན་པ། སྔགས་ཀྱི་སློབ་དཔོན་གྱི་གསུང་ལ་མི་ཉན་མཁན་ཚོར་འཇིགས་སྐུལ་གཏོང་ཆེད་དུ་རེད། ཡིན་ཏེ། དམ་ཚིག་རྣམ་བཤད་ལས། “དབང་བསྐུར་གྱི་གནས་སྐབས་སུ་ཁས་བླངས་པའི་ཕྱིར། དེང་ཕྱིན་ཆད་བུ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། ངས་ཇི་ལྟར་བསྒོ་བ་བཞིན་ཁྱོད་ཀྱིས་དེ་ལྟར་བྱ་དགོས་སོ། ང་ལ་ཡང་བརྙས་པར་མ་བྱེད་ཅིག བྱས་ན་ཡ་ང་བ་མ་སྤངས་པར་འཆི་བའི་དུས་བྱས་ཏེ། སེམས་ཅན་དམྱལ་བ་ཆེན་པོར་ལྟུང་བར་འགྱུར་ཏུ་རེ” ཞེས་གསུངས་ཤིང་། སྔགས་ཀྱི་སློབ་དཔོན་ནི་དམྱལ་དཔོན་ལྟ་བུར་བསྒྱུར་ཡོད་པས། དོན་དངོས་ལས་འབྲས་ཐམས་ཅད་རྡོ་རྗེ་སློབ་དཔོན་ལ་དབང་བ་ལྟ་བུར་བསྒྱུར་ཁར། དམ་ཆིག་རྣམ་བཤད་ལས། “རང་རང་གི་རིགས་དང་ཚུལ་ཁྲིམས་དང་ཐོས་པ་ལ་སོགས་པའི་སྒོ་ནས་རྡོ་རྗེ་སློབ་དཔོན་ལས་མཆོག་ཏུ་འཛིན་པའི་སེམས་ཀྱིས་བརྙས་ན་རྩ་བའི་ལྟུང་བར་འགྱུར་རོ།” ཅེས་སློབ་མ་ནམ་ཡང་སློབ་དཔོན་ལས་མཆོག་ཏུ་འཛིན་པའི་བསམ་བློ་སྐྱེས་མི་འོས་ཤིང་། ཚེ་གང་བླ་བྲན་ཁོ་ནར་བསྒྱུར་རྒྱུའི་འཆར་གཞི་བསྒྲིགས་ཡོད་པ་གསལ་བོ་རེད།
  དགེ་ལུགས་པས་འཇམ་དཔལ་སྲུང་མའི་ངོ་བོར་ཐོན་པ་ནི་དམ་ཅན་ཆོས་རྒྱལ་དུ་འདོད་ཅིང་། དེ་ནི་གཤིན་རྗེ་གཤེད་དམ། འཇམ་དཔལ་སྲུང་མའི་ངོ་བོར་ཐོན་པ་ཡིན་ཏེ། ཅི་སྐད་དུ། “དམ་ཅན་ཆོས་རྒྱལ་འདི་ཕྱི་སྒྲུབ་མ་ཧེའི་གདོང་ཅན། འདི་ལ་འཁོར་གཤིན་རྗེ་ཕོ་བརྒྱད་མོ་བརྒྱད། ནང་སྒྲུབ་སྲིན་པོའི་གདོང་ཅན། འདི་ལ་འཁོར་ཞི་རྒྱས་དབང་དྲག་གི་གཤིན་རྗེ་བཞི་ཡོད་པའི་ནུབ་ཀྱི་དབང་གི་གཤིན་རྗེ་དང་ཆོས་གསང་སྒྲུབ་དང་དོན་གཅིག བྱང་གི་དྲག་པོའི་གཤིན་རྗེ་དང་ཆོས་རྒྱལ་ཕྱི་སྒྲུབ་གཉིས་དོན་གཅིག དམྱལ་བའི་གནས་ཀྱི་དགེ་སྡིག་ཤན་འབྱེད་གཤིན་རྗེ་ཆོས་དང་དོན་གཅིག་ཡིན། ཡང་གསང་དཔལ་མགོན་དུག་རི་ནག་པོ་ཕྱག་བཞི་པ། དེ་ཡི་ཡུམ་དུས་མཚན་མ་དང་། ཙ་མུཎ་ཏྲི་གཉིས་བཅས་པའི་འཁོར་ཚོགས་སོགས་འདི་ཉིད་སྐྱོ་ལུགས་ལ་བཅོམ་ལྡན་དེ་ཉིད་འཇམ་དཔལ་ཤིན་ཏུ་ཁྲོས་པའི་འཇིགས་བྱེད་ཆེན་པོའི་སྐུར་སྤྲུལ་ནས། འཛམ་གླིང་གི་ལྷོ་ཕྱོགས་རིམ་པ་བདུན་གྱི་ས་འོག་ཏུ་གཤིན་རྗེ་གྲོང་ཁྱེར་ཆེན་པོ་མཆིས་པའི་གནས་སུ་བྱོན་ཏེ་དྲག་འདུལ་མཛད་པས། གཤིན་རྗེ་གཙོ་འཁོར་རྣམས་ཀྱིས་སྲོག་སྙིང་ཕུལ་ནས་དམ་ལ་བཏགས། ཇི་སྲིད་བསྐལ་བ་མ་སྟོངས་ཀྱི་བར་དུ་སངས་རྒྱས་ཀྱི་བསྟན་པ་བསྲུང་བར་ཁས་འཆེས་པར་བཤད།” ཅེས་པའི་གནས་ཚུལ་འདི་ལས་རྟོགས་ཐུབ་ལ། དྲག་འདུལ་ཞེས་པའང་སངས་ཆོས་ལས་གསུངས་པའི་ཆོས་ཁྲིམས་མི་བརྩི་མཁན་དང་། དེ་ལ་རྒོལ་མཁན་རྣམས་དྲག་འདུལ་བྱེད་པའི་དོན་རེད།
  གཤིན་རྗེ་གཤེད་དམ་འཇམ་དཔལ་སངས་རྒྱས་ཀྱི་ངོ་བོར་བསྒྲུབས་སྟངས་ནི། ཇི་སྐད་དུ། “ཇི་ལྟ་བ་མཁྱེན་པའི་ཡེ་ཤེས་དང༌། ཇི་སྙེད་གཟིགས་པའི་ཡེ་ཤེས་གཉིས་ཀྱི་རང་གཟུགས་ལས་རྗེ་བཙུན་འཇམ་དཔལ་དབྱངས་བྱུང་བ”ཅེས་གསུངས་པས་མོས་འདོད་བཞིན་གང་དུ་བསྒྲུབ་ཆོག་ཅིང་། ཆོག་པ་ངན་གོམས་སུ་ཕྱིན་པས། གླིང་གེ་སར་དང་། དོལ་རྒྱལ་སོགས་ཀྱང་སངས་རྒྱས་ཀྱི་ངོ་བོར་བསྒྲུབས་ཤིང་། དེ་ལྟར་སྒོམ་པས་བོད་ཀྱི་སྤྱི་ཚོགས་ནང་། ཡོད་ཚད་ཆོས་ལུགས་དང་། དད་རྟེན་དུ་གྱུར་པས། རྙོག་དྲ་མེད་སར་རྙོག་དྲ་དང་། དཀའ་ངལ་མེད་སར་དཀའ་ངལ། བཀག་རྒྱ་མེད་སར་བཀག་རྒྱ་ཡོང་བཞིན་ཡོད། ཡོང་དགོས་དོན་དེ་ནི་བོད་པ་རྣམས་ཀྱིས་སྔར་མེད་ཀྱི་གསར་བཏོད་བྱས་པ་མིན་པར། ཧིན་སངས་ཡི་གསུམ་སོགས་ཀྱི་ཆོས་དཔོན་ཚོས། རང་གི་ཁེ་ཕན་གྱི་ཆེད་དུ་ཅི་འདོད་བཞིན་དུ་བསྒྲུབ་ཆོག་པའི་ལུགས་སྲོལ་ཞིག་བཟོས་པས་རེད། སྒྲུབ་དགོས་དོན་ཡང་དད་པ་དང་། འདོད་མོས་ཡོད་ན། བཀག་རྒྱ་དེ་ཙམ་མེད་པར་ཡོད་ཚད་ཅི་འདོད་དུ་སྒྲུབ་ཆོག་ཅིང་། ཆོག་པ་དེ་ནི་ཆོས་ལུགས་ཀུན་གྱི་ཞན་ཆ་ཚབས་ཆེན་ཞིག་ཡིན་པ་དང། རྫུན་རྐུབ་འབུད་བྱེད་ཀྱི་རྩ་བ་རུ་མཐོང་། འོན་ཀྱང་། ལམ་ལུགས་དེ་ཆོས་དཔོན་ཚོའི་ཁེ་ཕན་སྒྲུབ་བྱེད་གལ་ཆེན་ཞིག་ཡིན་པས། ལས་སླ་བོར་དག་ཐེར་དང་། བཅོས་སྒྱུར་གཏོང་དཀའ་བས། ཇི་སྲིད་མི་རྣམས་ཀྱི་གོ་རྟོགས་མ་སད་བར་དེ་སྲིད་དུ་གནས་ཚུལ་འདི་དག་ཆེ་ཆུང་ལ་མ་ལྟོས་པར་འབྱུང་ངེས་རེད།

             ཧིན་ངྷི་བས་འཇམ་དཔལ་གཤིན་རྗེ་དང་ལྷ་རུ་འདོད་སྟངས།

  ཧིན་ངྷི་ལྟར་ན་འཇམ་དཔལ་གྱི་མིང་ལ་གཡའ་མན་ཟེར་ཞིང་། དེ་ནི་འཇིག་རྟེན་གྱི་སྲོག་ཆགས་ཀྱི་ཐོག་མ་རུ་འདོད་ཁར། གྲོངས་རྗེས་སུ་གཤིན་པོའི་རྒྱལ་པོ་རུ་བསྡད་དེ། ཧིན་ཆོས་ཀྱི་གཞུང་ལས་གསུངས་པའི་ལས་འབྲས་ལྟར་གཤིན་པོ་རྣམས་ཐག་གཅོད་བྱེད་པར་འདོད་ཀྱིན་ཡོད། གཞན་ཡང་དྲང་བདེན་གྱི་ལྷ་དང་། མངོན་པ་མི་གསལ་བའི་ཆོས་སྟོན་སློོབ་དཔོན་བཅས་སུ་འདོད་ཁར། Katha Upanishad ཡིས་འཇམ་དཔལ་གྱི་སྐུ་འདྲ་བྲིས་ཤིང་། སྒྲུབ་ན་དངོས་གྲུབ་འབྱུང་བའི་སྟོན་པ་རུ་འདོད་ཀྱིན་ཡོད་པས། སངས་ཆོས་པས་འཇམ་དཔལ་སངས་རྒྱས་ཀུན་གྱི་མཁྱེན་རབ་གཅིག་འདུས་སུ་འདོད་ཅིང་། ཤེས་རབ་ཀྱི་ལྷ་རུ་སྒོམ་ནས་དངོས་གྲུབ་སྒྲུབ་སྟངས་དང་གཅིིག་མཚུངས་ལྟར་རེད།
  Upanishad ཨོོ་པཱ་ནི་ཤཱ་སྒྲི་ཟེར་བ་འདི་ནི་ཧིན་ངྷི་ཆོས་ལུགས་ཀྱི་ཚད་མཐོའི་གྲུབ་མཐའ་ཞིག་ཡིན་ཞིང་། དེ་ལ་མདོ་སྔགས་གཉིས་ཡོད། དེ་ནི་ཝཱ་སྒྲི་ཁིའི་དུས་རབས་ཏེ། རྣམ་མཁྱེན་དང་། ཤེས་ཡོན་གྱི་དུས་སྐབས་སུ་བྱུང་བའི་གྲུབ་མཐའ་ཞིག་ཡིན་ཞིང་། དུས་རབས་ལྔ་བ་ནས་བརྒྱད་པའི་བར་དུ་གྲུབ་མཐའ་དེ་ཤུགས་ཆེར་དར་བ་མ་ཟད། གྲུབ་མཐའ་དེ་རྩོམ་མཁན་གྱི་སློབ་དཔོན་དུ་མས་ནང་པ་སངས་རྒྱས་པའི་མཁས་པ་མང་པོ་དང་། རྒྱལ་བ་བའི་མཁས་པ་མང་པོ་ལ་རྩོད་པ་བརྒྱབས་འདུག
  ཉམས་ཞིབ་པ་ཚོས་ Upanishad གྲུབ་མཐའ་ནི་སངས་ཆོས་དང་། རྒྱལ་བའི་ཆོས་ལུགས་སུ་མཐུན་པའི་གྲུབ་མཐའ་ཞིག་ཡིན་ཚུལ་རྩེ་གཅིག་ཏུ་སྨྲ་ཁར། གྲུབ་མཐའ་དེའམ་གཞུང་ལུགས་དེ་རྩོམ་མཁན་གང་ཟག་དུ་མ་ཡོད་ཅིང་། དུས་རབས་ལྔ་བ་ནས་འགོ་བཙུགས་ཏེ། དུས་རབས་ཉི་ཤུའི་བར་དུ་རྩོམ་མཁན་དང་། དཔེ་ཆ་གསར་དུ་རྙེད་མཁན། མན་ངག་ཡིག་ཐོག་ཏུ་འཁོད་པ་སོགས་ཡོད། གྲུབ་མཐའ་དེ་ནི་ཧིན་ཆོས་ཀྱི་ཝེ་སྒྲན་ཏཱ་གྲུབ་མཐའི་ནང་གསེས་གསུམ་ཡོད་པའི་ནང་གི་གཅིག་ཡིན་ཞིང་། སངས་ཆོས་ཀྱི་གསང་སྔགས་དང་ཧ་ཅང་མཐུན་པར་སྨྲ། ཡིན་ཏེ། ཁོ་གཉིས་ཀྱིས་ཕན་ཚུན་ལས་ལེགས་ཆ་ལེན་རེས་དང་། གནད་དོན་ཁ་ཤས་གསར་བཏོད་མཉམ་བྱ། དར་རྒྱས་མཉམ་བྱུང་གནང་བས། ལུགས་འདིའི་བྷ་ར་ཧི་མན་ཞེས་པའི་ཆོས་ཀྱི་གནས་ལུགས་མཐའ་ཐུག་དེ་སྒོམ་སྟངས་དང་། འགྲེལ་ཚུལ་ནི་སངས་ཆོས་ཀྱིས་ལུས་ཀྱི་འཁོར་ལོ་ལྔ་བོ་རྒྱལ་བ་རིགས་ལྔར་འགྲེལ་ཞིང་། རང་ཉིད་ཀུན་ཏུ་བཟང་པོའམ་རྒྱལ་བ་རིགས་ལྔ་སོགས་ཀྱི་ངོ་བོར་བསྐྱེད་དེ། སྒོམ་སྟངས་དང་གཅིག་པ་ཡིན་པས་ཡིན། གྲུབ་མཐའ་འདི་ནི་ནུབ་ཕྱོགས་སུ་དུས་དགུ་བཅུ་བའི་ནང་ཐོག་མར་བསྒྱུར་ཞིང་། ནུབ་མི་མང་པོས་ཧ་ཅང་གི་དོ་སྣང་བྱས་འདུག
  ཨོོ་པཱ་ནི་ཤཱ་སྒྲི་ཞེས་བའི་ཧིན་ཆོས་ཀྱི་གྲུབ་མཐའ་འདི་དར་དགོས་དོན་ནི། ཉམས་ཞིབ་པ་ཁག་ཅིག་གིས་སྐབས་དེ་དུས་རྒྱ་གར་དུ་འཛམ་གླིང་གི་ཡུལ་ཕྱོགས་གང་ས་ནས་ཡོང་བའི་གནས་སྤོ་བ་མང་པོ་ཡོད་ཅིང་། གནས་སྤོ་བ་ཚོས་སོ་སོའི་ཕ་མེས་ནས་བརྒྱུད་པའི་ཆོས་ལུགས་རེ་འཁུར་ཏེ་ཡོང་བས། ཕན་ཚུན་རྩོད་ཅིང་འགྲོགས་འདྲིས་ལས་མཉམ་འདུས་བྱས་མཐར་གྲུབ་མཐའ་འདི་བྱུང་བར་འདོད། བྱུང་སའང་རྒྱ་གར་གྱི་བྱང་ཕྱོགས་ཡིན་ཞིང་། གནས་དེ་ནས་རིམ་བཞིན་རྒྱ་གར་གྱི་དབུས་ཕྱོགས་སུ་དར་བར་འདོད། རྒྱུ་མཚན་ནི། རྒྱ་གར་གྱི་བྱང་ཁུལ་ནི་དཀྱིལ་ཤར་ཁུལ་དང་ཡོ་རོབ། སོག་པོ་དང་རྒྱ་ནག་སོགས་ལ་འགྲོ་ས་དང་ཡོང་སའི་ལམ་ཁ་འཁེལ་བས་རེད། རྒྱུ་མཚན་དེའི་དབང་གིས་རྒྱ་གར་ལ་གར་ལོག་སྟེ། སྒྲ་གཟི་རཱ་ཝ་སྒྲིའི་འཇིགས་པ་ཡོང་སྐབས་བྱང་ཕྱོགས་ཨ་རྒན་ནས། ཕཱ་ཁི་སི་ཐན། ཀ་སྨིར་བཅས་བརྒྱུད་དེ་ཡོང་ཡོད། ཡོང་སྐབས་ཀྱང་དུས་རབས་བཅུ་བའི་ནང་ཡིན།
  གང་ལྟར་ཧིན་སངས་གཉིས་ཀ་ལ་གཤིན་རྗེ་གཤེད་དང་། དེ་དག་གི་སྒྲུབ་ཐབས་སོགས་ཡོད་པས་དོན་དངོས་ཧིན་སངས་གཉིས་ཀྱི་གང་ཞིག་བསྒྲུབ་ན་གཤིན་རྗེ་རྒྱལ་པོ་ཡི་བཀའ་དང་མཐུན་ནམ། གཉིས་ཀས་རང་ལུགས་ཀྱི་ཆོས་ཁྲིམས་ཅི་ལྟར་གསུངས་པ་དེ་ལྟར་བསྒྲུབ་ན། གཤིན་རྗེ་གཤེད་ཀྱིས་ཐག་གཅོད་དེ་ལྟར་བྱེད་ཅིང་། བྱེད་དགོས་པའང་ཆོས་ཁྲིམས་དེ་དག་གནས་ལུགས་དང་། ལས་འབྲས་ཀྱི་མཐར་ཐུག་པ་ཡིན་པས། གཤིན་རྗེ་གཤེད་ཀྱི་དེ་ལྟར་གནང་བ་ཁ་ཐག་བྱེད་ཀྱིན་ཡོད་ཀྱང་། གཉིས་ཀས་རང་རང་གི་ལུགས་ལས་གསུངས་པའི་ཆོས་ཁྲིམས་མི་འདྲ་བས་གཤིན་རྗེ་གཤེད་ཀྱིས་སུ་ཡི་ཁ་ལ་ཉན་ནམ།
  སངས་ཆོས་ལྟར་ན་གཤིན་རྗེ་གཤེད་ཀྱིས་ཅི་སྒྲུབ་ཐམས་ཅད་སངས་ཆོས་ལྟར་བྱེད་པར་མ་ཟད། དེ་ལྟར་གནང་བས་སྲུང་མའི་ངོ་བོར་བྱོན་ཚུལ་བསྙད་ཀྱང་། དོན་དངོས་དེ་ནི་མིའི་འདོད་རྔམས་ལ་ཚད་མེད་པའི་བདེན་དཔང་གནང་བ་ལས་གཞམ་དུ་མ་མཐོང་ལ། དེ་བཞིན་འདི་ཕྱི་གཉིས་ལ་བཏང་འཛིན་ཡོད་པར་རློམ་མཁན་གྱི་ཆོས་ལུགས་ཀུན་ཡང་གནས་ལུགས་དེ་ལས་མ་འདས། ཡིན་ཏེ། ཆོས་ལུགས་གསར་བཏོད་བྱེད་མཁན་དང་། བཟོ་མཁན་མཐའ་དག་མི་ཡིན་པས། མི་ལ་འདོད་རྔམས་ལས་དོན་དངོས་དེ་འདྲའི་ནུས་པ་ཞིག་མེད་པས་ཡིན།
  ཧིན་ངྷི་ཡིན་ཡང་གཤིན་རྗེ་གཤེད་ཀྱི་ཐག་གཅོད་ཧིན་ཆོས་ལས་གསུངས་པ་ལྟར་འགྲོ་ཞིང་། དེ་ལྟར་ཕྱིན་ན་ཚེ་ཕྱི་མ་ཙམ་མ་ཟད་ཚེ་འདི་ལའང་དངོས་གྲུབ་སྩོལ་ཚུལ་གྱི་སྒྲུབ་ཐབས་ཡོད་པས། མཐར་གཏུག་ན་སངས་ཆོས་ཀྱི་བཞད་སྟངས་དང་གཅིག་མཚུངས་རེད། དེ་བཞིན་ཆོས་ལུགས་ཀུན་ལ་དེ་མཐུན་གྱི་དམྱལ་བ་རེ་ཡོད་ཅིང་། དམྱལ་ཁྲིམས་ཀྱང་ཆོས་ལུགས་སོ་སོའི་ཁྲིམས་བཞིན་འགྲོ་བས། མགོ་སྐོར་དང་ཧམ་བཤད་ལས་གཞན་དུ་མེད། ཧམ་པ་དང་མགོ་སྐོར་བཏང་ཡང་སྡུག་གྱོང་རེད། ཡིན་ཏེ། འགྲོ་བ་མི་འདིར་མཚམས་རེར་མགོ་སྐོར་གཏོང་དགོས་ཤིང་། མ་བཏང་བར་ཡོད་ཚད་དྲང་མོ་བཤད་ན་རིན་ཐང་སྤྲོད་མཁན་དཀོན་ཁར། དེ་ལས་ལྡོག་སྟེ་མང་པོ་ཞིག་སྐྱག་ལང་ཤོར་ནས་ཚོད་མེད་ཀྱི་ཐོབ་ཐང་རྩོད་མཁན་དང་། རང་ཉིད་གཅིག་བུ་མ་གཏོགས་བསམ་རྒྱུ་མེད་མཁན་ཞིག་ཏུ་འགྱུར་བས་ཡིན།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།