ཡུལ་གྱི་རི་དྭགས་རྔོན་པའི་དཀྲོག་པ་བཞིན།།
རི་ཡི་རྦབ་རྡོ་ལ་ནས་བསྒྲིལ་བ་ལྟར།།
གང་སར་བཞག་ན་དེ་སར་མི་འདུག་པའི།།
སེམས་ཀྱི་རྟ་རྒོད་ཁྱོད་ཀྱི་བྲན་གཡོག་ཡིན།།
 
ལས་ཀྱི་རི་མོ་ལང་ཚོའི་མེ་ཏོག་ཡིན།།
སྟོན་གྱི་ལོག་ཕེབས་མི་རྟག་ཆོས་ཉིད་ཡིན།།
བརྩེ་བའི་མཛེས་པ་ཟིལ་བ་ཁྲོམ་ཁྲོམ་ཡིན།།
ཞོགས་ཀའི་ཉི་ཟེར་ནམ་ཐོན་ཆ་མེད་ཡིན།།
 
ཁྱོད་དང་ཕྲད་པ་འཚོ་བའི་བརྗེད་བྱང་ཡིན།།
ཁྱོད་དང་བྲལ་བ་འཁོར་བ་ན་ཟུག་ཡིན།།
དྲན་པའི་མི་དེ་བྲང་ཁོག་ན་བྱེད་ཡིན།།
དགའ་བའི་མི་དེ་རྨ་ཁ་གསོ་བྱེད་ཡིན།།
 
ཕྱིར་དྲན་ཚང་མ་མ་ལུས་བདེ་སྐྱིད་ཡིན།།
ཕྱིར་འདང་རྒྱབ་ན་གང་ལྟར་འདས་དོན་ཡིན།།
སྟོང་འདང་ཁྲོད་ན་ཁ་སང་འདས་མ་ཡིན།།
ལས་ཀྱི་བཀོད་པ་ཀུ་རེ་ཏག་ཏག་ཡིན།།
 
ཁྱོད་ཀྱི་མཛེས་པ་སྒྱུ་མའི་རང་མདངས་ཡིན།།
ཤི་ན་རྣམ་ཤེས་འགུགས་པའི་ལྕགས་ཀྱུ་ཡིན།།
ཁྱོད་ཀྱི་དུངས་པ་རྫ་ཆུ་བསིལ་མ་ཡིན།།
གསོན་ན་བླ་སྲོག་གསོ་བའི་བདུད་བརྩི་ཡིན།།
 
ལས་ཀྱི་བཀོད་པ་དམར་པོའི་བཀའ་ཡིག་ཡིན།།
ཟློག་པར་བསམ་ན་ཚེ་སྲོག་གཏའ་མ་ཡིན།།
སྐྱིད་ཀྱི་གོ་དོན་ཁྱོད་དང་ལྷན་ཅིག་ཡིན།།
འགྲུབ་པར་བསམ་ན་སྐྱེ་བ་རྗེས་མ་ཡིན།།
 
ཁྱོད་ཁྱོད་ཞེས་པ་ཡི་གེ་ཟུང་ལྡན་ཡིན།།
བདག་གི་རྨི་ལམ་ཞིག་གི་བསྡུས་དོན་ཡིན།།
སེམས་ཀྱི་འཇའ་ཚོན་ཁྱོད་ཀྱི་མཚན་བྱང་ཡིན།།
ལས་སྐལ་ཡོད་ན་འཚོ་བའི་ཁ་བྱང་ཡིན།།
 
གངས་ཀྱི་རི་བོ་བདག་གི་ལྷག་བསམ་ཡིན།།
དྭངས་གཙང་མཚོ་མོ་གངས་རིའི་ཉང་ཁུ་ཡིན།།
མཐའ་ཡས་རྩྭ་ཐང་བདག་གི་སེམས་རྒྱ་ཡིན།།
ཁྱེད་རང་སླེབས་ཤིང་སླར་ཡང་གྱེས་ས་ཡིན།།
 
མི་རྟག་ལས་འཕྲོ་ལམ་གྱི་མགྲོན་ཁང་ཡིན།།
དེ་རིང་འཛོམས་ཀྱང་སང་ཉིན་སོ་སོ་ཡིན།།
ཁྱེད་ལ་དགའ་བ་ཚེ་རབས་དམ་བཅའ་ཡིན།།
སྐྱེ་བ་སྔོན་མའི་ལས་དོན་ལྷག་པ་ཡིན།།
 
བྲང་ཁོག་འཇམ་པོ་ཤ་རྗེན་སྤུ་མེད་ཡིན།།
རྩུབ་མོས་བྲད་ན་རྨ་ཁ་འཆོར་ངེས་ཡིན།།
ཡིད་ཀྱི་དྲན་པ་དྭངས་གཙང་ཆུ་མིག་ཡིན།།
ལྗིད་མོས་མནན་ན་གང་སར་བརྡོལ་ངེས་ཡིན།།
 
ཡིད་ཀྱི་དམ་བཅའ་རྡོ་རྐོས་རི་མོ་ཡིན།།
འཆི་བས་དེད་ཀྱང་གཡར་དམ་མཁྲེགས་པོ་ཡིན།།
མྱང་བའི་མནར་གཅོད་ཁྲག་གི་ཁ་དོག་ཡིན།།
འདས་ལོག་བྱས་ཀྱང་ད་དུང་དམར་པོ་ཡིན།།
 
མཚན་གྱི་ཟླ་བ་སྔར་ལྟར་ཁེར་རྐྱང་ཡིན།།
ཀུ་མུ་ད་ནི་གང་ལྟར་ཁེར་འཁྱམས་ཡིན།།
མཚོ་མོའི་རླབས་སྒྲ་འཇགས་ཤིང་ཁེར་གནས་ཡིན།།
བསིལ་རླུང་ཕྲ་མོ་བདག་གི་ཁེར་ལབ་ཡིན།།
 
སྲོད་ཀྱི་བསམ་གཞིགས་འཁྱུད་པའི་ཚོར་བ་ཡིན།།
མཚན་གྱི་རྨི་ལམ་རུམ་པའི་དུང་བ་ཡིན།།
འདི་དག་བསམ་ན་སེམས་ཀྱི་བདེ་བ་ཡིན།།
ཐམས་ཅད་དག་ནི་མ་གཞི་འཁྲུལ་བ་ཡིན།།
 
འཇིག་རྟེན་འདི་ནི་དྲི་གཞི་ཆེན་པོ་ཞིག།
འཆི་ཁར་ག་རེ་ཞེས་པའི་དྲི་བ་ཡོད།།
སྲིད་པ་འདི་ནི་མེ་ཕུང་དམར་པོ་ཞིག།
གསོན་ཀྱང་ཨ་ཚ་ཞེས་པའི་གདུང་བ་ཡོད།།
 
སེམས་ཀྱི་འཇིག་རྟེན་འདབ་མ་ནེམ་ནེམ་ཡིན།།
བརྩེ་བའི་ལྷོད་ཤ་ཟིལ་བ་ཁྲོམ་ཁྲོམ་ཡིན།།
སྔ་མ་འཇམ་པས་ལྕེ་ཡིས་ཉུག་བྱ་ཡིན།།
ཕྱི་མ་དྭངས་ཤིང་མཐར་ཐུག་བདེན་པ་ཡིན།།
 
དྲན་པའི་ལྕགས་ཀྱུ་འཁྲུལ་བའི་ཀློང་ལ་བཏབ།།
དུངས་པའི་ཟུར་མིག་ཞེན་པའི་གདོང་ལ་ཕོག།
སྐྱོ་བའི་མཆི་མ་སིབ་སིབ་སྙིང་ལ་ཉིལ།།
འཁུན་པའི་རང་སྒྲ་སྟོང་བའི་དབྱིངས་སུ་ཡལ།།
 
བྱམས་པའི་ཕྱོགས་ལ་ཞེན་ཞིང་དུངས་པ་དང་།།
བྲལ་བའི་གདུང་བར་ངུས་ཤིང་འཐམས་པ་སོགས།།
གཞན་གྱིས་མཐོང་ན་གཞན་ཡང་སྨྱོ་བྱེད་ཡིན།།
ཁྱོད་ཀྱིས་རིག་ན་གླེན་པའི་ཨུ་ཚུགས་ཡིན།།
 
ཕྱི་ཡི་རྡོག་སྒྲ་རེ་བའི་དབྱངས་རྟ་ཡིན།།
སྒོ་ཡི་ཐག་སྒྲ་སྙིང་ཆུང་ལྡིང་བྱེད་ཡིན།།
ཁྱོད་ཀྱི་ཟིལ་ཤུགས་དྲན་པ་ཉམས་བྱེད་ཡིན།།
དངངས་ནས་འདར་དུས་མ་གཞི་རྨི་ལམ་ཡིན།།
 
མཆི་མ་དྭངས་མོས་སྔས་འགྲམ་བརླན་པར་བྱས།།
ཨུ་ཤུ་ཕྲ་མོས་རྨི་ལམ་ཟློག་པར་བྱས།།
རྟོག་བཟོའི་རྒྱབ་གཟིགས་རྒྱང་དུ་སྐྱེལ་མ་བྱས།།
ཚེ་སྲོག་ན་བའི་འཁུན་སྒྲ་ཤུར་ཤུར་འབྱིན།།
 
བཙན་གྱིས་དོར་ན་ལྷག་ཏུ་བཙངས་པའི་ཁྱོད།།
བརྗེད་པར་བསམ་ན་སེམས་པ་ན་བའི་རྒྱུ།།
དམ་བཅའ་ཡོད་ཚད་མ་ལུས་བརླག་པའི་ཁྱོད།།
ད་དུང་དྲན་ན་སྔར་བཞིན་དྲན་པའི་སྙིང་།།
 
             ༢༠༡༢ ༤ ༦ ཉིན།
 

རྩོམ་ཁུངས། ངེད་དྲ་བ།