___ཁམས་པ་གཉིས་ཀྱི་དམར་འཛིང་ལས་གཉལ་ལྷུན་རྩེར་མཚམས་སྤྲིན་འཁོར་བ་རིག་རྗེས།
                                                     
བོད་གངས་ཅན་ས་ཡི་ཐིག་ལེ་ན།  །
ཡུལ་སྐྱིད་པོ་གཉལ་གྱི་ལུང་པ་ཆགས།   །
གནས་ཆགས་ལུགས་དེ་འདྲའི་མཚར་བ་སྟེ། །
གཉལ་སྡེ་དྲུག་དགོན་པས་མཐའ་བཞི་རྒྱན། །
 
ས་འདི་རུ་མེས་པོའི་གནའ་མཁར་ཡོད།  །
གནས་ཙ་རི་བོད་པའི་འདྲེན་བྱེད་འདྲ། །
གཉལ་ཐོན་མི་དགུང་གི་ཉི་མ་འདྲ།  
གཉལ་དྭགས་པོ་ལྷ་རྗེ་ཟླ་བའི་སྲས། །  

སྔོན་ནང་ཁོངས་གཅིག་པའི་མི་རིགས་ཀྱང༌།  །
ས་འདི་ན་ཕུ་ནུ་མིང་སྲིང་བཞིན།   །
ནང་འཚེ་བ་མེད་ལ་དཔུང་པ་མཐུན།  །
གསེར་གཏིང་འདྲའི་གཉལ་ཡུལ་དེ་འདྲ་ལགས།  །
            ༢
དུས་དེང་སང་དངུལ་དང་རྒྱུ་ཡི་ཆེད།  །
ཡུལ་གཉལ་དེ་རྡུལ་རླུང་འཚུབ་འཚུབ་རེད།  །
ནང་ཕུ་ནུ་གཏན་དགྲ་ཆགས་ཆགས་རེད། །
སྟག་ངར་མ་ཇི་བཞིན་མཆོངས་མཆོངས་རེད།   །

དྲིན་མེས་པོའི་དུས་ཀྱི་སེམས་པ་ཤི།    །
དུས་ད་ལྟ་རྒྱུ་དངུལ་རོ་ལངས་གིས།    །
གནས་ངེས་མེད་བཙན་བཟུང་བྱེད་དུས་སུ།  །
ང་གཉལ་ཕྲུག་དབུགས་རིང་མཚམས་མི་ཆད།  །
        ༣
ད་རྙོག་གཏམ་མི་བརྗོད་དཔེ་མཚོན་དུ།  །
གཉལ་ལྷུན་རྩེར་དོངས་སུ་རིག་པ་ཡིས།   །
ཁམས་ཨ་རོག་གཉིས་ཀྱི་དམར་འཛིང་དེ། །
ལུག་ནང་ཁྲོལ་བཤམས་པ་ཇི་བཞིན་བརྗོད།  །

ཡུལ་གཉལ་ལ་བརྩེ་བའི་ཁམས་པ་ཁོང༌།    །
ལོ་ཉི་ཤུའི་གོང་ནས་གནས་འདིར་འབྱོར།   །
ཁོང་མཚན་ལ་ཁམས་པ་ཨ་ཕྲུག་འབོད།  །
ཡུལ་གཉལ་དེ་ཕ་ཡུལ་གཉིས་པར་འཛིན།   །

ད་ཐོག་མར་ཁོ་རང་གཉལ་ཡུལ་དུ།  །
ཚོང་ཉུང་ཙམ་བཀྲམས་ནས་འཚོ་ཐབས་བྱས། །
གནས་ཁང་ཆུང་ཞིག་གི་ནང་ན་བཞུགས།  །
བབས་ཆགས་པ་ང་ཡི་ཕ་དང་འདྲ།  །

དུས་དེ་ལྟར་ལོ་མང་འདས་པ་ཡིས། །
ཁོང་ཚོང་པ་ཆེན་པོ་ཞིག་ཏུ་འགྱུར།  །
སྒོར་ཁྲི་མ་འབུམ་གྱི་ཚོང་བདག་རེད། །
ཡུལ་གཉལ་གཞུང་ཁྱོན་ལ་ལྡིར་ལྡིར་གྲགས།  །

སྐེ་གཟི་བྱུར་རྒྱན་གྱིས་ཡོངས་སུ་མནན། །
སེམས་རྟེན་སའི་ཆུང་མ་གཉལ་ནས་བླངས།  །
ད་དེ་ལྟར་རང་ཁ་རང་གསོ་ཡིས།  །
སྐྱིད་འཚོ་བ་ལོངས་སུ་སྤྱོད་བཞིན་གདའ།  །

སྐྱིད་འཚོ་བ་སྐྱེལ་འགོ་ཚུགས་སྒང་ལ།  །
ཡང་ཁམས་ནས་འབྱོར་བའི་་ཁམས་པ་ཞིག  །（ཁམས་པ་གཞན་ཞིག）
ཡུལ་གཉལ་གཞུང་ཁུལ་དུ་རླུང་བཞིན་འཁོར།  །
ཁམས་ཨ་ཕྲུག་རྒྱན་ཆར་ཡུན་རིང་ལྡིར།  །

སྐྱི་གཡའ་བའི་གནས་ཚུལ་འདི་འདྲ་བྱུང༌།  །
རྡུལ་ནག་པོས་གཉལ་ཡུལ་བཀབ་པའི་ཉིན།  །
ཁམས་རང་རྟགས་མ་ཡལ་ཁམས་པ་དེས། །
ཞི་དུལ་བའི་ཁམས་པ་ཨ་ཕྲུག་བཙལ། །

ས་ཁུག་ཀྱོག་ཞིག་ཏུ་ཁྲིད་ནས་ནི།  །
ད་ངེད་གཉིས་གྲོས་ཞིག་བྱེད་དོ་ཟེར། །
ཡ་ཨ་རོག་ཁམས་པ་གཅིག་འདྲ་རེད།  །
རྒྱན་དེ་དག་ངེས་པར་འཚོང་དགོས་ཟེར།  །

ཁམས་ཨ་ཕྲུག་སྐེ་ལ་སྦར་ཉུལ་གྱིས། །
ད་འདི་དག་མི་འཚོང་ང་ཡི་བླ།  །
སླད་རང་ཕྲུག་འཚོ་བའི་རྟེན་འདི་ཡིན།  །
ཆེས་སྡུག་དུས་ལྟོ་གོས་འདི་ཡིན་ནོ།  །

ད་མི་ཉན་རྒྱུ་རྔམས་ཁམས་པ་དེས།  །
གྲི་རིང་པོ་ཤུབས་ལས་ཧོབ་ཀྱིས་བཏོན།  །
གནས་ངེས་མེད་ཨ་ཕྲུག་ལུས་ལ་བཙུགས།  །
ཁྲག་དག་གིས་གཉལ་གཞུང་མཚམས་སྤྲིན་འཁོར།  །

ང་གཉལ་ཕྲུག་གནས་དེར་འབྱོར་སྐབས་སུ།  །
ཁམས་ཨ་ཕྲུག་ལུས་ཡོངས་ཁྲག་གིས་འཚོས། །
ས་དེ་རུ་རྟ་རྒན་ཤི་རོ་བཞིན།  །
དམར་འཛར་འཛར་གནས་པ་ཀྱེ་མ་ཧུད།
 
རྒྱན་ཚང་མ་ཨ་རོག་དེ་ཡིས་འཕྲོག  །
གནས་དེ་རུ་ཁོ་ཡི་མཐེ་བོང་ཞིག  །
ཁམས་ཨ་ཕྲུག་གཏའ་མར་བཞག་ལྟར་སྣང༌།   །
རྒྱན་དེ་ཡི་ཆེད་དུ་ཨ་ཕྲུག་ཕུང༌།   །
དོན་ངོ་མར་བོད་པ་གཅིག་འདྲ་རེད།   །
ཕ་སྤྲེལ་རྒན་བྱང་སེམས་ཅན་གྱི་རྒྱུད།   །
རང་སྤུན་མཆེད་ལྟ་བུའི་ཕུ་ནུ་ལ།   །
རྒྱན་ཆེད་དུ་བཅོམས་པའི་དོན་གོ་ཅི།    །

དུས་དེང་སང་གཉལ་མི་འདི་འདྲ་རེད།    །
ནང་ཕུ་ནུའི་བརྩེ་འདང་བརྗེད་བརྗེད་རེད།  །
རང་མེས་པོའི་སྲོལ་བཟང་དོར་དོར་རེད། །
སྐད་ར་མ་ལུག་སྐད་རྒྱབ་རྒྱབ་རེད། །

སྔ་དེང་གི་གཉལ་ཡུལ་བསྡུར་དུས་སུ།  །
ཨ་ཁ་ཁ་ཟེར་བའི་ཚིག་དག་ལས།  །
ས་གནམ་གྱི་ཁྱད་པར་ཁོ་ན་མཐོང༌།  །
ད་སྟོང་གཏམ་མི་བརྗོད་གཉལ་མི་བསོམས།  །  
 

རྩོམ་ཁུངས། ངེད་དྲ་བ།