གོས་ངུར་སྨྲིག་གི་ཁ་དོག་རླུང་གིས་གཡོས།།
ནང་ཕུགས་བསམ་གྱི་བློ་ཁ་སྒོར་ལ་ཕྱོགས།།
གནས་ཡར་མར་ནས་འཛོམས་པའི་གྲོང་ཆོག་པ།།
ལོ་ནམ་རྒྱུན་དུ་འདི་ན་ཆད་པ་མེད།།
 
ལོ་འདི་དག་ལ་དབྱར་རྩྭ་དགུན་འབུའི་དྲིན།།
སྡེ་འདི་ལ་ཡང་དད་སྟོབས་སྔར་ལས་ཆེ།།
ཆོས་བཀའ་འགྱུར་དང་བསྟན་འགྱུར་ཟེར་བ་ཡང་།།
ལོ་ཆགས་མེད་དུ་རིམ་གྲོ་བྱེད་པ་ཡོད།།
 
ཆོས་དུམ་པ་དག་ཉིན་འདོན་བྱེད་པ་དང་།།
དབང་རྒྱབ་བཞི་སོགས་འགྲོ་ཞོར་འདུག་ཞོར་དུ།།
གཡང་རབ་གནས་ནི་ཇ་ཁ་ཉལ་ཁའི་ལས།།
སེམས་དམིགས་བྱ་ནི་ཀུན་དགའ་དོན་གྲུབ་ཡིན།།
 
ཆ་ཡོད་མེད་ཀྱི་ཨ་ཁུ་སུ་ཡིན་རུང་།།
ཡིད་རྣམ་རྟོག་གི་འཁྲུལ་བ་སེལ་ཆེད་དུ།།
ངག་ནམ་འགྱུར་གྱི་དབྱངས་རྟ་ཙམ་བྱས་ན།།
རྒྱུ་འབྱོར་བ་ཡི་དངོས་གྲུབ་སྡེ་འདིས་གནངས།།
 
ཆོས་ཤེས་ལོ་ཡི་དགེ་བཤེས་ཕལ་ཆེར་ཞིག།
རྒྱ་འབྱོར་ལྡན་གྱི་ཤོག་སྒོར་མང་པོས་བསླུས།།
དེ་མ་ཡིན་པའི་ཆོས་མིང་འཛིན་པ་ཚོས།།
ཁ་འདི་ལྟར་ཡང་མི་གསོ་ཐབས་མེད་རེད།།
 
རྒྱུ་མི་རྟག་གི་སྐད་སྒྲ་མཐོ་བ་དང་།།
ཆོས་ཁ་རྒྱུགས་ཀྱི་ང་རྒྱལ་ཡོད་པ་དག།
ནོར་ཕར་འཚོལ་གྱི་ངལ་བ་མི་དགོས་ཀྱང་།།
སེམས་བདག་འཛིན་གྱི་སྤར་ཁ་གཅིག་འདྲ་རེད།།
 
མ་འགྲོ་དྲུག་གི་དོན་དུ་ཟེར་བ་དང་།།
ཚེ་མི་རྟག་གི་སྒྱུ་མ་འདི་འོ་ཞེས།།
མིག་ཁྲ་ཆུང་གཉིས་ཡང་ཡང་བཙུམ་པ་ན།།
རྒན་གཞོན་གསུམ་ཀུན་དད་པའི་བ་སྤུ་གཡོ།།
 
ས་ཡར་མར་གྱི་གྲྭ་བའི་གཟུགས་འཛིན་དག།
རྒྱ་རྒྱུ་ཅན་གྱི་སྐད་རིགས་མི་གོ་ན།།
ཁྱེད་མ་འདུག་པར་འདི་རུ་ཕེབས་ཤོག་དང་།།
ལག་འབུལ་བ་ཡང་ལོ་རེ་ཇེ་མཐོ་རེད།།
 
ཆོས་ཀུན་རིག་སོགས་འདོན་པའི་སྒྲུབ་སྡེ་དང་།།
ཆོས་འཆད་པ་ལ་འཇུག་པའི་བཤད་གྲྭའི་སྡེ།།
གནས་འཁོར་བ་ཡི་ཉེས་དམིགས་ཟེར་ཞོར་དུ།།
རྒྱུ་དོན་གཉེར་ཀྱི་ལས་ལ་འབད་འདི་སྐྱོ།།
 
 

རྩོམ་ཁུངས། ངེད་དྲ་བ།