ཞིང་པ་རྒད་པོ་གོ་རྟོགས་རབ་གསལ་ནས།།

 བུ་ཕྲུག་སློབ་གྲྭར་བརྫངས་པ་དགའ་ནའང་།།
ལང་ཤོར་བུ་ཕྲུག་སློབ་ལ་མ་བརྩོན་པར།།

ཇ་ཁང་ཆང་ཁང་འགྲིམས་པ་ཧ་ཅང་སྐྱོ།།

དྲིན་ཅན་ཕ་མས་ངལ་བ་ཆེར་སྤྱད་ནས།།

བུ་ཕྲུག་བྱམས་ཀྱིས་སྐྱོང་བ་དགའ་ན་འང་།།

ཐ་ཤལ་བུ་ཕྲུག་རང་མགོ་ཐོན་པའི་རྗེས།།

ཕ་མར་ཁ་ཡ་མི་བྱེད་གཏིང་ནས་སྐྱོ།།

རྒྱལ་ཁབ་རྩ་ཁྲིམས་གསེར་གྱི་མེ་ལོང་དེ།།

རྒྱལ་འབངས་ཀུན་ལ་སྙོམས་པ་དགའ་ན་འང་།།

རྒྱུ་ཡོད་ལྟག་སྒོ་འཛུལ་ནས་ཕེབས་མཁན་ཚོར།།

གཡོ་འཁྱོག་ཕྲན་ཙམ་ཤོར་བ་ཤིན་དུ་སྐྱོ།།

ཁྲོམ་རྭའི་དཔལ་འབྱོར་འཕེལ་རྒྱས་ཆེར་ཕྱིན་ནས།།
གང་འདོད་ཉོ་རྒྱུ་ཡོད་པ་དགའ་ན་ཡང་།།

སྣེ་མང་བྱུར་བུར་བཏམས་པའི་དངོས་ཟོག་ཁྲོད།།

རྫུན་མ་འཚང་ཁ་ཤིག་ཤིག་སྙིང་ནས་སྐྱོ།།

ང་ཅག་མེས་པོ་སྐུ་དྲིན་ཅན་དེ་ཚོས།།
བཞག་པའི་ཤུལ་བཞག་མང་བས་དགའ་ན་འང་།།

རྒྱུ་འབྲས་མེད་པའི་མི་ངན་ཁ་ཤས་ཀྱིས།།

ནོར་བུ་རྐུ་ཚོང་བྱེད་པ་དེ་བས་སྐྱོ།།

ཁ་བ་ཅན་གྱི་རི་ཀླུང་མཛེས་པའི་སྟེང་།།

རི་སྐྱེས་སྲོག་ཆགས་འབེལ་བས་དགའ་ན་འང་།།

བསམ་རྒྱུ་དངུལ་ལས་མེད་པའི་མི་དེ་ཚོས།།

ལྐོག་གསོད་ལྐོག་རྔོན་རྒྱག་པ་ཡིད་རེ་སྐྱོ།།
 

  བོད་ལྗོངས་ནག་ཆུ་ཉི་མ་རྫོང་སློབ་འབྲིང་གི་དགེ་རྒན་རྡོ་རྗེ་བཀྲ་ཤིས་ནས།
                                                
   ༢༠༡༡    ༤    ༣༠   ཉིན།
                                             
 


 

རྩོམ་ཁུངས། ངེད་དྲ་བ།