མི་རིགས་ཤིག་གི་བླ་སྲོག་བྱེད་པོ་ཨ་ནུ་ཞེས་བྱའི་རྒྱང་གྲགས་ཅན།།
ཁྱེད་ཀྱིས་ཚ་གྲང་ཁྱད་དུ་བསད་ནས་སྤྱན་རས་གཟིགས་ཀྱི་ཞིང་ཁམས་སུ།།
སྲིད་ན་དཀོན་པའི་རིན་ཆེན་ནོར་བུའི་ཤུལ་བཞག་དངོས་རྫས་བསྩལ་ན་ཡང་།།
ལོ་རྒྱུས་དར་རྒུད་གསོས་སུ་སྨིན་པས་ཨ་ནུའི་སྤྱན་ཆབ་ཐེངས་གཅིག་མིན།།

 ཁྱེད་ཀྱི་རྣམ་དཔྱོད་ཀྱོ་བ་རྣོན་པོས་བཙན་པོའི་རྒྱལ་ཁམས་ཕྱོགས་བཞིར་བསྐྱེད།།
འོན་ཏེ་ད་ལྟ་ཉེར་གཅིག་དུས་ཀྱི་འགྲན་རྩོད་རླབས་ཕྲེང་འཕྱོ་བའི་དུས་།།
དབྱངས་གསལ་གཉིས་ལ་བདག་པོ་དཀོན་པས་དྭ་ཕྲུག་ངུ་ཤུམ་བྱས་ཙ་ན།།
ཐོན་མི་ཨ་ནུས་མི་མངོན་དབྱངས་སྐྱོ་བའི་སྤྱན་ཆབ་ཡང་ཡང་བསིལ།།

གདོད་དུས་ཀ་ཁའི་དབྱངས་རྟ་སྙན་མོ་ཉིན་མཚན་ཀུན་དུ་བར་མེད་སྒྲོག།
ཚིག་ཕྲད་བརྒྱད་ཅུ་བརྗོད་རུང་ཆིག་ཁྲི་ལྷག་མ་བདུན་སྟོང་ཞེ་ལྔ་དག།
  ད་ནི་བགྲང་བའི་དོན་གཉེར་འགའ་ཡང་ཉིན་མོའི་སྐར་མ་བཞིན་ཟད་པས།།
   ཨ་ནུ་རང་ཡང་འགྱོད་པས་གདུངས་པས་འགྲམ་པའི་འཁུར་ཚོས་ཡང་ཡང་ཕུར།།

 
སྤྱི་སྐད་ཆགས་ནས་རྒྱལ་ཁམས་བདེ་དུས་དགའ་སྤྲོའི་དགོད་སྒྲ་རྒྱུན་མི་ཆད།།
ད་ལྟ་མདོ་དབུས་ཁམས་གསུམ་སྐད་ཀྱང་མི་མཐུན་ཕྱོགས་ཞེན་སྙིང་ལ་གཟན།།
ཕྱི་མོའི་གཞུང་ལ་གནོད་སྐྱོན་བཏང་ནས་རང་རང་སོ་སོར་གྱུར་བའི་དུས།།
ཨ་ནུ་ཁོང་ཡང་འཛུམ་གྱིས་དབེན་ཅིང་བདེ་བར་གཟིམས་པའི་སྐབས་མ་འཆིས།།


བརྡ་དང་སྐད་ཀྱི་གཞུང་གི་རྩ་བ་སུམ་རྟགས་ངོ་མཚར་གསུང་གི་བཅུད།།
ཕྱོགས་བཅུའི་དཔྱོད་ལྡན་ཕྱོགས་གཅིག་བསྡུས་ཀྱང་ངོ་མཚར་འདི་འདྲ་སྒྲུན་མིན་ཀྱང་།།
རང་རེའི་རིག་གཞུང་གསེར་གྱི་གཞུང་བ་མི་གཙང་སྣོད་ལ་འགྱུར་ཉེ་བས།།
ཨ་ནུས་སྦྲང་ཆར་བསིལ་མ་ཕབ་ནས་ནག་ནོག་བཀྲུ་ལ་བྲེལ་བྲེལ་བྱེད།།

འུ་དུམ་བཙན་པོའི་རྭ་ཅོ་གཅིག་གིས་བརྡ་སྤྲོད་གཞུང་དྲུག་ཆུ་ལ་བསྐུར།།
ལོ་ངོ་བཅུ་ཡི་གོད་ཆགས་སྐབས་སུ་དབྱངས་གསལ་སོ་བཞིར་འཐབ་རྩོད་མཛད།།
ལྷག་པར་ད་ལྟའི་གཞོན་ནུ་རྣམས་ཀྱང་སློབ་ལ་མི་གཞོལ་དུག་ལ་རོལ།།
འདི་ལྟའི་སྣང་ཚུལ་ཨ་ནུས་མཐོང་བས་སྤྱན་ཆབ་སྦྲང་ཆར་རྟག་ཏུ་འཇོ།།
 

རྩོམ་ཁུངས། ངེད་དྲ་བ།