སེམས་པ་སེམས་པར་ཕྱོགས་པས།།
སེམས་ཀྱིས་ན་ཟུག་ཚོར་བྱུང་།།
ན་ཟུག་རུམ་དགོས་ཡོད་མེད།།
སྤྱན་གྱིས་བརྡ་ཞིག་གནང་དང་།།

གཏམ་ངན་རླུང་བུའི་གོམ་སྟབས།།
བྱམས་པའི་སེམས་ལ་ཁེལ་སོང་།།
ཆུང་འདྲིས་བྱམས་པའི་ངག་ནས།།
མིག་ཆུའི་གཙང་བོ་བཞུར་བྱུང་།།

མིག་ཆུ་གྲང་མོ་ཞིག་གིས།།
བྱམས་པའི་ན་ཟུག་མ་ཐེག།
ཆུང་འདྲིས་ཆུང་འདྲིས་ཟེར་ཡང་།།
སེམས་པ་འདྲེས་ན་བསམ་བྱུང་།།

བྱང་གི་མེ་ཏོག་དཀར་པོ།།
བདག་གི་སེམས་ཀྱི་འདབ་མ།།
མེ་ཏོག་བཞད་པའི་ཉིན་ལ།།
ཆར་རླུང་མེད་པའི་སྨོན་ལམ།།

དྲན་པའི་མེ་ལོང་ངོགས་སུ།།
དུང་གི་རི་མོ་བབས་སོང་།།
དུང་གི་རི་མོའི་ནང་དུ།།
བྱམས་པའི་མིག་ཆུ་འཁྱིལ་འདུག།

སྤྲིན་པས་རྒས་ཉམས་དོད་པས།།
སེམས་ཀྱི་ཁ་དོག་མངོན་བྱུང་།།
རྨི་ལམ་ནང་དུ་ཕེབས་ཏེ།།
སེམས་ཀྱི་མིག་ཆུ་ཕྱིས་སོང་།།

ཤོག་དཀར་ངོས་ཀྱི་ཡི་གེ།
འཆི་མེད་ཚེ་ཡི་རིལ་བུ།།
ལྷ་སའི་བྱང་གི་བུ་མོ།།
དྲན་པའི་ནང་གི་ཚེར་མ།།

ལས་དབང་ལས་ལ་དབང་པས།།
ཚེ་འདིའི་ལམ་སྣེ་མ་རྙེད།།
ལས་སྐལ་མེད་པའི་བྱམས་པ།།
རྫ་རིའི་འདབས་ནས་ལུས་སོང་།།

ཆུང་འདྲིས་རི་ལ་ཕེབས་པས།།
སེམས་པ་ཆར་བས་བརླན་བྱུང་།།
ཕྱི་མིག་སེམས་ཀྱི་འཁུན་སྒྲ།།
སྙིང་གི་རུས་པར་འཐིམ་སོང་།།

མ་ཐོས་སེམས་ཀྱི་རོལ་མོ།།
སེམས་པ་གསོ་བའི་སྨན་མཆོག།
བརྩེ་བའི་རྣམ་ཤེས་ཞུགས་པའི།།
གཡུ་ཆུང་གྲུ་དཀར་འབུལ་ཆོག།

མུན་པས་ལག་བརྡ་བསྟན་བྱུང་།།
སེམས་ཀྱི་སྒོ་མོ་ཕྱེས་སོང་།།
དྲན་པའི་མེ་ཏོག་དཀར་པོ།།
རྨི་ལམ་ནང་དུ་བཞད་བྱུང་།།
           ༢༠༡༢     ༣     ༢༢

རྩོམ་ཁུངས། ངེད་དྲ་བ།