བློ་དང་ལྡན་པས་བོད་ཀྱི་བཟོ་རིག་གི།
བཟང་པའི་ལེགས་ཆ་པིར་གྱིས་བཞེངས་པའི་སྐུ།།
རྒྱ་བོད་དད་ལྡན་རྣམས་ཀྱི་ལྷ་ཁང་དུ།།
མཚོ་སྐྱེས་པདྨོ་བཞིན་དུ་མཛེས་པར་བསྐྲུན།།
 
མེ་ཕག་ལོ་ཡི་སྐྱ་རངས་གསར་བ་ཡིས།།
རེ་བདུན་ལོན་པའི་རྒན་རྒོན་བཟའ་ཟླ་ལ།།
བདེ་སྐྱིད་ཉི་གཞོན་རྟ་བདུན་གྱིས་དྲངས་ཏེ།།
བྱ་བ་ཡར་འགྲོའི་དགེ་མཚན་སྣ་ཚོགས་བྱུང་།།
 
པན་ཆེན་བཅུ་བ་དངོས་བྱོན་བཞུགས་པའི་ཁྲི།།
མ་བསྒྲིགས་ངང་གིས་ཁྱིམ་འདིའི་རྟེན་དུ་གྱུར།།
དེ་ཡི་མཐུ་དང་རྟེན་འབྲེལ་བསླུ་མེད་ཀྱིས།།
ཉེ་འབྲེལ་ཟབ་པའི་བཀྲ་ཤིས་ཁྱིམ་འདིར་བསུས།།
 
བཀྲ་ཤིས་སྒྲོལ་མའི་འཇིག་རྟེན་སྣང་པ་ནི།།
འོ་མའི་མཚོ་ལ་ཟླ་བ་ཤར་བ་བཞིན།།
མཛའ་བརྩེ་ཟབ་མོ་ངང་བ་ལྟ་བུ་ལ།།
འདོད་པའི་དོན་གྱི་བུ་ཞིག་སྦྲུམ་དུ་ཆགས།།
 
འབད་པ་མ་བསྟེན་སྒོ་ཕྱུགས་མཛོ་མོ་ལ།།
བིས་ཤིག་བཙས་པས་འོ་ཞོ་རྒྱ་མཚོར་འགྲན།།
བསམ་དོན་འགྲུབ་པའི་གཡང་གི་བུ་ཕྲུག་འདི།།
ཆེད་དུ་བསུ་བའི་དགའ་སྟོན་ཕུན་སུམ་ཚོགས།།
 
ཕ་མ་གཉིས་ཀ་ཡུལ་གྲུ་གཞན་ཕྱིན་ནས།།
རྒྱུ་དང་ལོངས་སྤྱོད་འཚོལ་བའི་ཁུལ་ཙམ་གྱིས།།
དགོས་དོན་ཀུན་འབྱུང་སྔོན་མེད་ལྷུན་འགྲུབ་འདི།།
གཡང་གི་བུ་ཕྲུག་བསོད་ནམས་ཉིད་ལས་བྱུང་།།
 
ཅོ་ཅོང་ལ་སོགས་ས་ཞིང་ཐམས་ཅད་ལ།།
གྲོ་སྣ་མི་གཅིག་ས་བོན་གསར་འདེམ་བཏབ།།
སྐྱེས་ཚུལ་བཟང་ཞིང་ལོ་ལེགས་བྱུང་བ་འདི།།
གཡང་གི་བུ་ཕྲུག་བསོད་ནམས་ཉིད་ལས་བྱུང་།།
 
ཁྱིམ་འདི་སྐྱིད་པའི་ཁང་བཟང་གསར་བ་ནི།།
ཕྱི་མཛེས་ནང་གཙང་དགའ་སྤྲོའི་ཉམས་ཤར་ཡང་།།
གསར་དུ་བསྐྲུན་པའི་ཁང་མིག་གྱན་དྲུག་འདི།།
གཡང་གི་བུ་ཕྲུག་བསོད་ནམས་ཉིད་ལས་བྱུང་།།
 
འཕྲུལ་གྱིས་བགྲོད་པའི་དེང་རབས་རྟ་མཆོག་གི།
འཚེར་བའི་སྒྲ་ནི་པང་པང་ཟེར་བ་ལ།།
ཞོན་ན་གཟི་འོད་ལྡན་པ་ཉོས་པ་ཡང་།།
གཡང་གི་བུ་ཕྲུག་བསོད་ནམས་ཉིད་ལས་བྱུང་།།
 
སྐེ་ཙེ་མེ་ཏོག་གསེར་བྱེ་བརྡལ་བའི་གཟིས།།
རྟ་བདུན་དབང་པོའི་མིག་དབང་འཕྲོག་པ་དང་།།
གསེར་འབྲུ་ཁུ་བས་རྫ་མ་བཀང་པ་ཡང་།།
གཡང་གི་བུ་ཕྲུག་བསོད་ནམས་ཉིད་ལས་བྱུང་།།
 
རྟ་མགྲིན་རྟ་སྐད་བཞད་པའི་བྱིན་མཐུ་ལས།།
དབང་རྒྱལ་ཞེས་པའི་བུ་ཕྲུག་འདི་སྐྱེས་པར།།
ཚེ་དང་བསོད་ནམས་དཔལ་འབྱོར་ལྡན་པ་དང་།།
འདོད་པའི་དོན་ཀུན་ཆོས་བཞིན་འགྲུབ་པར་སྨོན།།
 
བཟང་གྲོགས་གཉིས་ཀྱི་ཉིན་ཁའི་་ཁ་བརྡ་ལ།།
གཡང་གི་བུ་ཕྲུག་སྐྱེས་པའི་སྔ་ལྟས་གླེང་།།
སྔོན་གནས་རྗེས་དྲན་བྱེད་པའི་ཚུལ་འདི་ནི།།
ཕུན་གྱིས་ཡིག་གཟུགས་བཀོད་པ་འདི་ལེགས་སོ།།
   སྤྱི་ལོ་ཉིས་སྟོང་བདུན་ལོའི་ཟླ་བཅུ་བའི་ཚེས་དྲུག་ལ།

རྩོམ་ཁུངས། ངེད་དྲ་བ།