ཁང་སྒོའི་ཕྱི་རོལ་སྨུག་པའི་འདབ་མ་རེད།།
          སྨུག་པ་གྱོན་པའི་འདབ་མ་ལྷབ་ལྷུབ་གཡོ།།
          འདི་ལྟར་གཡོ་ཞིང་དེ་ལྟར་གཡོས་པ་ཡིས།།
          ཁྲག་རྩའི་ཟིལ་བ་རྫ་འགོའི་ཞ་ལྟར་ཆགས།།
         
           ཟླ་བའི་སྙིང་ལ་བསྲིངས་ནས་ཀི་ཞིག་བཏབ།།
          སྡུག་དང་ན་བུན་འཁོར་བའི་ཀི་ཞིག་བཏབ།།
          དེ་ནི་ཆད་རྟགས་ཤིག་གི་རླུང་འཚུབ་ཡིན།།
          རླུང་འཚུབ་གླུ་ལ་བསྒྲིལ་བའི་ཀི་ཞིག་ཡིན།།
        
          ཉི་མའི་ལག་རྡང་འཁྱོམས་ནས་སུག་བཞི་འདར།།
          རུས་དང་ཁྲག་གིས་བརླན་པའི་སུག་བཞི་འདར།།
          འདི་ནི་ལས་ཀྱིས་སྦྱིན་པའི་ཟས་ལྷག་རེད།།
          རལ་ཞིང་བཙོག་པའི་ཟས་ལྷག་རེད་དོ་ལོ།།
        
           ཉིན་དང་མཚན་དང་ལོ་དེའི་ཟླ་དང་ནི།།
          གནའ་མི་ཚང་མ་རྒས་ཤིང་ཁོག་པའི་བར།།
          ལྕགས་ཀྱི་ཞ་མོ་གྱོན་ནས་དབུས་ལ་ཐལ།།
          ར་ལྟར་གྱོང་བའི་ཞ་མོ་གྱོན་ནས་ཐལ།།
        
           རྡེག་པའི་གློ་སྙིང་འཇགས་པའི་དུང་ནས་དཀྲིགས།།
          གློ་དང་སྙིང་གི་འཇགས་པ་དུང་ནས་དཀྲིགས།།
          དཀྲིགས་ཤིང་འཁོར་བའི་ཟོ་ཆེན་ཆུ་མོའི་ཁ།།
          གནམ་ནས་བབས་པའི་ས་ཡི་དུག་ཆུ་རེད།།
 
          འདི་ནས་བརྩིས་པའི་ལོ་འཁོར་ལྔ་བཅུའི་སྔོན།།
          ནུབ་བདུད་ནག་པོ་ཤར་ལ་ཐལ་བའི་དུས།།
          གངས་རིའི་མགོ་སུག་མ་ལུས་འཆོས་པའི་དུས།།
          སྲ་ཞིང་འཐས་པའི་མགོ་སུག་འཆོས་པའི་དུས།།
 
          ཧར་གྱིས་བལྟས་ན་གནམ་ས་སྒུལ་བར་བྱས།།
          གླན་ཏེ་ཉན་ན་ཆུ་མོས་ཤུགས་རིང་འབྱིན།།
          སྒོམ་གྱིན་སྒོམ་གྱིན་སྒྲོག་ཞིག་བྲང་ལ་ཉལ།།
          དམར་བོ་ཡིན་པའི་སྒྲོག་ཞིག་བྲང་ལ་ཉལ།།
        
          ཕ་གི་རི་ན་འོད་ཅིག་འཚེར་བ་གན།།
          ཉི་འོད་འདི་ཡི་ཚབ་ཏུ་ཤར་བ་ཉིད།།
          གངས་རིའི་ཡ་ཐོད་ཆུ་ལ་མི་བརླབས་པས།།
          ཉི་མའི་ངོ་བོ་ཟླ་བར་འཕོས་པ་བཞིན།།
        
          རི་དེའི་ཚུ་རོལ་ང་ཚོའི་གནས་སྟེགས་ཡིན།།
          སྒང་འདིའི་ཕ་རོལ་ཁོ་ཚོ་བཞུགས་གནས་རེད།།
          དེ་ཡི་བར་ནི་ཆུ་ཁོལ་ནག་མོ་སྐྱོམ།།
          དེ་ལ་བཟོས་པའི་ཟམ་པ་མེད་གྲབས་བཤད།།
        
          བརྒྱ་བཤད་སྟོང་བཤད་རྩ་བ་རིན་ཐང་ཡིན།།
          ཉིན་བྲིས་ཞག་བྲིས་ཉིང་དགོས་ཡོངས་ཁྱབ་ཡིན།།
          ཡོངས་ཁྱབ་རིན་ཐང་དགོས་པ་མདོ་རྩ་ཡིན།།
          འདོ་རྩ་དེ་ནི་གླུ་ཡི་ཁུགས་པར་བསྒྲིལ།།
                  
                                      ༢༠༡༢  ༤  ༡༥


 
 

རྩོམ་ཁུངས། ངེད་དྲ་བ།