འུ་ཐུག་གི་ཁེར་བཤད།
ཆུང་ནས་གཅིག་ཏུ་གོམས་པའི་བག་ཆགས་ལ།།
ཨུ་ཚུགས་སེམས་ཀྱིས་ཁ་ལོ་བསྒྱུར་འདོད་ནས།།
དགའ་སྐྱོའི་གྲོགས་སུ་བརྟེན་པའི་དམར་སེར་གོས།།
རིམ་པ་བདུན་གྱི་ས་འོག་གཏེར་དུ་སྦས།།
སྒོ་དང་སྒེའུ་ཁུང་རྣོ་ལྕགས་འཛེར་མས་བཟེད།།
ཁ་མིག་དབང་བོ་བཙན་གྱིས་ནང་དུ་བསྡུས།།
ང་དང་ཕྱི་རོལ་འབྲེལ་བ་མེད་པར་སྒོམ།།
འོན་ཏེ་འདྲེ་སྲིན་འབོད་པ་ནམ་ཞིག་འཇགས།།
སྔོན་བསགས་ལས་ཀྱིས་སྒུལ་བའི་རྐང་བ་ཟུང་།།
ཡང་དང་ཡང་དུ་ཚེར་མའི་དོང་དུ་ལྷུང་།།
རང་ཉིད་རང་ལ་གཏོགས་པའི་གནས་མལ་ཞིག།
གོང་མ་རྒྱལ་བོས་བདག་ལ་མ་གནང་འདྲ།།
རྒྱབ་ཏུ་ཤུབ་བཤད་མོད་པའི་ལྕེ་གཉིས་མ།།
མདུན་དུ་ལྷགས་ཚེ་མཐུན་པའི་འཛུམ་མདངས་མངར།།
སྐྱེ་བ་གཅིག་ལ་སྤྲུལ་བ་སྣ་མང་བས།།
ཆོས་ཀྱི་དམ་ཚུགས་བསྲུང་རྒྱུ་དཀའ་མོར་གདའ།།
འཇིག་རྟེན་འཁོར་བ་སྤངས་ནས་རི་ལ་བྲོས།།
ངུར་སྨྲིག་ན་བཟའི་འོག་ན་ཞི་ཞིང་དུལ།།
ཟོལ་ཀྱིས་བཅོས་བའི་འགྱིག་འབག་འདི་མེད་ན།།
ང་ཡང་གནས་དེར་ལོ་ཤས་འདུག་ན་ཐང་།།
མི་རབས་སྟོང་ལ་བཅོས་སུ་མེད་པ་ཡི།།
སྡེ་དཀྲིག་བྱིར་གྱི་སྣ་འདྲེན་འགོང་བོ་ལ།།
དམ་ཅན་སྲོང་མའི་བཀའ་ཆད་མི་ཕོག་ན།།
བསང་གསུར་མཆོད་གཏོར་བསྔོས་པ་དོན་རེ་ཆུང་།།
འཕགས་པའི་ལྷ་ཚོགས་དབྱིངས་ལ་འཇའ་ལྟར་ཡལ།།
ཁ་བའི་རྣམ་ཤེས་གངས་འཁྱགས་རྫ་ལ་ཐིམ།།
ས་བདག་ཀླུ་གཉེན་འདར་བའི་ངུ་འབོད་ཀྱིས།།
གནམ་འིག་མུན་པའི་འཇིག་རྟེན་ཡོམ་ཡོམ་སྒུལ།།
གཡག་རྒོད་རྭ་རྩེ་རྣོན་པོ་རི་ནས་བོར།།
འབུ་སྲིན་གྲོག་མའི་དཔུང་རྡང་གྲོང་ནས་འཐོར།།
གནམ་སའི་སྒོ་གླེགས་འབྱེད་པའི་ལྡེ་མིག་གིས།།
ཟབ་མོ་རིམ་དགུའི་མུན་སྟུག་ཅི་ལྟར་གཞོམ།།
2012-8-2
རྩོམ་ཁུངས། ངེད་དྲ་བ།