གསེར་ཉའི་ལས་དབང་།
ཚེ་སྔོན་བསགས་ལས་དབང་བཙན་པོས།།
དུས་ད་ལྟའི་སྐྱེ་བ་འདི་ལ།།
འོག་ཀླུ་ཡུལ་ཁམས་ནས་སྐྱེས་སོང་།།
ཆུང་གསེར་ཉའི་སྐྱེ་བ་བླངས་སོང་།།
ཆུ་མཚོ་མོའི་གཏིང་ནས་ལུས་སོང་།།
སྤྱིར་རྙེད་དཀའི་དལ་འབྱོར་མི་ལུས།།
རྒྱུད་རང་ལ་ལེན་པའི་སྨོན་གྱིས།།
གནས་བྱིན་ཆགས་འཇིག་རྟེན་ཁམས་ཀྱི།།
ནོར་ལོངས་སྤྱོད་ཕུན་ཚོགས་འདོད་རྒུར།།
ཞེ་ཐོགས་པའི་རྐྱལ་རྩལ་ངོམ་ནས།།
དམིགས་མི་ཡུལ་ཁམས་ལ་འགྲོ་བའི།།
རྩལ་སྟོབས་ཤུགས་ཡོད་རྒུ་ཕྱུང་སྟེ།།
ཡར་མཆོངས་ལྡིང་གྲངས་མེད་བྱས་ཀྱང་།།
ཕྱིར་ཅལ་སེ་མཚོ་མོའི་ཀློང་དུ།།
འདི་མི་ལྷུང་རང་དབང་མེད་ཐལ།།
དུས་ལོ་ཟླའི་འཁོར་སྐྱོད་ཀློང་ནས།།
ལུས་གཉོམ་ལག་ན་སོ་དར་དུས།།
ངས་ད་གཟོད་མི་ཡུལ་ཁམས་ཀྱི།།
ཞེ་སྐྱོ་བའི་སྤྱོད་ངན་སྣ་དགུ།།
མིག་ཕྲ་ཆུང་ལམ་ནས་རིག་སོང་།།
ང་འཇིགས་ནས་སྙིང་རྩ་འདར་སོང་།།
རྣ་བུ་ག་བརྒྱུད་ནས་གོ་སོང་།།
སེམས་ཁོ་ཐག་གཏིང་ནས་ཆད་སོང་།།
ཕྱིར་རང་རྒྱུད་དཔེ་རེ་བླངས་ན།།
ང་འདི་ནས་སྐྱེས་པ་འཕྱུག་མེད།།
ང་འདི་ནས་སྐྱེས་ཀྱང་འགྱོད་མེད།།
ང་སྤྲོ་དུས་མིང་སྲིང་ལྷན་དུ།།
རྩལ་མཉེན་མོས་གཤོག་འགྱུར་བསྒྱུར་ཆོག།
ཞིམ་ཁ་ཟས་གང་འདོད་ཟོས་ཆོག།
ལུས་ངལ་དུས་ཚང་ལ་ལོག་ནས།།
དྲིན་ཕ་མར་ཞལ་མཇལ་གནང་ཆོག།
དབུགས་སོས་དུས་སྤྲོ་དགའི་ཀློང་ནས།།
ཞེ་མཐུན་པའི་སྤུན་གྲོགས་བཙལ་ཏེ།།
འགྲོ་གོམ་པའི་མཉམ་རྩལ་སྦྱང་ཆོག།
གར་སྟངས་སྟབས་གཞན་ལ་ངོམ་ཆོག།
དགོང་ཕྱི་དྲོ་ས་རྩ་རུབ་དུས།།
དྲིན་ཕ་མ་བཞུགས་སའི་གནས་མཆོག།
ཡུལ་མཚོ་མོའི་གཏིང་རིམ་ཞབས་ཀྱི།།
མཛེས་མལ་གདན་དྲོན་པོའི་ཁུད་དུ།།
སྐྱིད་ཕ་འཛོམས་མ་འཛོམས་བྱུང་ཆོག།
འདི་བསམས་དུས་ང་འདྲའི་སྐྱིད་ཅིག།
གནས་འཇིག་རྟེན་གསུམ་ན་མེད་སྙམ།།
སྐྱིད་སྤྲོ་དགའ་འཕེལ་བའི་ཉིན་ཞིག།
གྲོགས་དམ་པ་རྣམས་དང་ལྷན་དུ།།
མཚོ་གཡུ་སྔོན་མེ་ལོང་ཁྲོད་དུ།།
འགྲོས་ཡང་མོས་འཁྱུག་རྩལ་ངོམ་དུས།།
འདི་མགོ་ནག་ཞེ་གནག་སྐོར་ཞིག།
ངའི་མཚོ་མོའི་འཁྲིས་སུ་འབྱོར་ཏེ།།
ལྕགས་ཕྲ་མོའི་ཀྱོ་བ་རྣོན་པོ།།
གཟེབ་དྲ་རྒྱའི་གདུག་རྩུབ་མཚོན་ཆ།།
མཚམས་མི་ཆད་གཅིག་རྗེས་གཉིས་མཐུད།།
དྭངས་མཚོ་མོའི་དབྱིངས་སུ་དཔྱངས་ཏེ།།
ལྗིད་ལྕགས་དབྱུག་ཡར་འདྲུད་མར་འདེད།
མཚོ་ཕུ་དཀྲུག་མདོ་དཀྲུག་བྱས་ནས།།
ལུས་ལང་ཚོ་དར་ལ་བབས་པའི།།
ངའི་རིགས་གཅིག་གསེར་ཉ་མོད་པོ།།
ནང་སྒོས་སུ་ཆུང་འདྲིས་རྩེད་ཡ།།
ངའི་གྲོགས་པོའི་སྲོག་ལ་བབས་ཐལ།།
བདུད་ཧམ་སེམས་འདྲེ་ནག་གན་གི།
མཚོན་ཁ་སྒོ་ཆེན་པོའི་ནང་ལ།།
རྗེས་ཤུལ་མེད་བཞབས་ནས་བུད་ཐལ།།
ཕྱིར་ཐར་བའི་ལམ་སྣེ་བཙལ་འདོད།།
ཤུགས་ཆེན་པོས་འཕག་འཚག་བརྒྱབ་སྟེ།།
རྣར་གཟན་པའི་ཆོ་ངེ་སྒྲོག་གི།
ལུས་གཟུགས་གཞི་སྟོབས་ཀྱིས་འགུལ་རུང་།།
འདི་རྨི་ལམ་ནང་གི་འཁྲུལ་ཤེས།།
འདི་སྨིག་རྒྱུའི་ཁྲོད་ཀྱི་སྣང་བ།།
དབུགས་གསོན་པའི་གོ་སྐབས་ཁྱེར་ཐལ།།
སྲོག་རྒྱས་པའི་འདུན་པ་འགགས་ཐལ།།
ང་ཉམ་ཆུང་ལུས་གཟུགས་ཆུང་བས།།
ལས་ཡག་པོ་ཚེ་སྲོག་རྟ་རྔ་།།
ངའི་སྟེང་ལ་ལན་གཅིག་ཕོག་སྟེ།།
ཞིབ་དྲ་ཕད་བུ་གའི་གསེང་ནས།།
རེབ་གཅིག་ལ་ཐར་བའི་ལམ་རྙེད།།
ངའི་སྐྱིད་སྡུག་མཉམ་རོལ་ཞུ་རོགས།།
གྲོགས་སྤུན་ཟླ་ཉམ་ཆུང་ནུས་ཆུང་།
ཡུན་མི་རྟག་ནམ་མཁའི་འཇའ་བཞིན།།
རྐྱེན་གློ་བུར་མཚོ་མོའི་ཀློང་ནས།།
འདི་ཤེས་མེད་ཚོར་མེད་ཉིད་ལ།།
ངན་འཁོར་བ་སྲིན་མོའི་གླིང་དུ།།
འདི་ཧམ་འཁྱེར་ཁྱུར་མིད་བྱེད་མཁན།།
ཞེ་རྩུབ་པའི་ཤ་བཟའ་ཁྲག་འཐུང་།།
མི་མགོ་ནག་གན་ཚོས་ཁྲིད་ཐལ།།
གནས་རང་ཁྱིམ་བསྐྱུར་ནས་བུད་ཐལ།།
ཡིད་སྐྱ་མོ་ཐང་ལ་ལྷུང་ཐལ།།
འདི་གཏན་དུ་གྱེས་བྲལ་སྐྱོ་བ།།
འདི་སྲིད་པའི་རྒྱ་མཚོར་ཞུགས་པའི།།
དབུགས་སྲོག་ལྡན་ཡོད་དོ་ཅོག་གི།
ལུས་ཚེ་སྲོག་ཆུ་ཁའི་ཝུ་བ།།
རྟེན་རྣམ་ཤེས་རླུང་ཁའི་མར་མེ།།
ལས་རླུང་ནང་ལོ་མ་ཁེར་བགྲོད།།
འདི་བསམ་ན་ཞེ་བསམ་སྡུག་གི།
ཀྱེ་མི་རྟག་འཇིག་རྟེན་སྣོད་བཅུད།།
ཡར་འཕེལ་བའི་ཐ་མ་རྒུད་པ།།
འདི་འགྱུར་བྲལ་ལྡོག་མེད་ཆོས་ཉིད།།
ཉམ་ཆུང་བའི་སེམས་ཅན་སྟེང་དུ།།
ནམ་ཞིག་ལ་སླེབས་པ་དྲན་ན།།
སྙིང་བརྩེ་བའི་མཆི་ཞགས་བསྙིལ་འགྲོ།།
སྒོས་ཕ་མ་དྲིན་ཆེན་རྣམ་གཉིས།།
ནམ་ཉི་མ་ཞིག་གི་དུས་ལ།།
འདི་མི་འདོད་ལྕགས་ཀྱུའི་སྣེ་ལ།།
ཡར་འདྲུད་པའི་སྣང་ཚུལ་བསམ་ན།།
མིག་ཁྲ་རིལ་གོར་མོའི་ནང་དུ།།
སྡུག་མཆི་མ་རང་འཁྱིལ་རང་བཞུར།།
ནོན་མི་ཐུབ་སྡུག་བསྔལ་ཐེག་དཀའ།།
བཟོད་དཀའ་བའི་སྙིང་རྗེ་འཚང་འོང་།།
སྤྱིར་བསམ་ན་འཇིག་རྟེན་སྣོད་བཅུད།།
ཚེ་ཡུན་རིང་རྟག་པའི་དཔེ་མེད།།
སྒོས་འཚོ་བཞུགས་གནང་བའི་ཚུན་ལ།།
ལུས་མི་འདོད་བར་ཆད་བྲལ་བར།།
འབྱུང་ལུས་ཁམས་བདེ་སྐྱིད་ཐོབ་ཅིང་།།
རྐྱེན་ངན་པའི་དུག་ནག་ཆུ་ཁོལ།།
དུས་ནམ་ཡང་རིང་དུ་གྱེས་ཚེ།།
ཚེ་ཡུན་ཐུང་མཚོ་མོའི་ཀློང་དུ།།
བདེ་སྐྱིད་པའི་འཁྱུག་རྩལ་ངོམ་ཆོག།
རྩོམ་ཁུངས། ངེད་དྲ་བ།