རེ་བའི་འདུན་པ་རླུང་གིས་བསྐུལ་བ་ལས།།
སེམས་ཀྱི་ཀོ་གྲུ་གཙང་བོའི་ཕ་རོལ་ཕྱིན།།
རིན་ཆེན་གཏེར་དུ་གབ་པའི་ནང་གི་བཅུད།།
མཚོ་མོ་གཡོམ་བའི་ཀློང་ན་སུ་ལ་བསྟན།།

འགྱུར་མེད་དམ་དུ་འཆིང་བའི་བརྩེ་གཟུགས་འདི།།
མདང་གི་ཟླ་འོད་ངོགས་སུ་འཛུམ་གྱིས་འཚེར།།
དྲི་མེད་གཤིས་སུ་ཡིབ་པའི་གཏམ་སྦྱོར་དག།
མག་མོག་མུན་པའི་ཀློང་གིས་ཟས་སུ་བལྡད།།

སྒྲིབ་ཡོལ་གཡོ་བའི་འཛུམ་གྱིས་ཞུགས་པ་ན།།
བདག་གི་མིག་ཟུང་རྣོ་དབལ་བཀག་བྱེད་ཅིང་།།
སྣང་བའི་ངོ་བོར་བཏབ་པའི་གཟུགས་ཀྱི་མཆོག།
མེ་ཏོག་བུམ་པ་གང་གིས་མཚོན་ནས་ཡོད།།

ཇ་ལོ་སྦངས་པའི་མགྲིན་ལམ་བདེ་ནའང་།།
བདེ་བ་མཆོག་གིས་མཚོན་པར་མི་ནུས་པས།།
འཛིན་པའི་གདན་དུ་བཏབ་པའི་རྙེད་དོན་དེ།།
ད་ལྟ་ད་དུང་འཚོལ་བའི་མགུལ་ན་དུ་འཆིང་།།

སེམས་ཀྱི་ཀོ་གྲུ་བར་མེད་བསྐྱོད་ནུས་སུ།།
སེམས་ཀྱི་རྒྱལ་ཁམས་ཡངས་པོར་མཚོན་ནུས་མིན།།
སེམས་ཀྱི་གུར་དང་མཆོད་པའི་སྟེགས་བུ་ན།།
སེམས་ཀྱི་རི་མོ་ཞིག་གི་ཚོན་རིས་འཛུམ།།

སྒྱུ་མའི་ངོ་བོར་བརྒྱུས་བའི་གཟུགས་བརྙན་གྱི།།
ཟློས་པའི་གར་ཆུང་རྩེན་པའི་ཉམས་འགྱུར་དེ།།
ཡང་ཡང་འཆར་ཤེལ་ངོས་སུ་བརྡོལ་ནའང་།།
སྣང་ལ་རང་བཞིན་པའི་མེད་པའི་གཤིས་སུ་གྲུབ།།

ཕྱི་ཡི་སྨ་ར་འབུས་པའི་གཟུགས་འདི་ཀོ།
ལས་ཀྱི་བཀོད་པའི་འཚོ་བའི་ཟུར་ཞིག་ན།།
ཡོད་མིན་མེད་མིན་གཉིས་ཀྱི་མཐར་ལྷུང་ནས།།
སེམས་ཀྱི་ཀོ་གྲུ་བསྐྱོད་གྲབས་བྱེད་བཞིན་ཡོད།།

རྩོམ་ཁུངས། ངེད་དྲ་བ།