བརྒྱ་ཚོགས་སྟོང་འདུས་ཀྱི་སློབ་ཁང་གྲུ་བཞིར།།
གཅིག་ལས་གཅིག་སྒེག་གི་མཛེས་མ་མང་རུང་།།
སེམས་ཀྱི་བརྟན་པ་དེ་རྨང་ནས་འཕྲོག་མཁན།།
བརྩེ་བའི་ལྷ་མོ་ཁྱོད་སྙིང་ལ་བཞད་བྱུང་།།
 
དཀར་དམར་བྱུགས་རྫས་སོགས་གདོང་ལ་མ་བསྒོས།།
འབྲོག་སྐད་རྣལ་མ་ཞིག་ངག་ན་སྙན་འདུག།
གཤིས་ཀ་འཇམ་པོ་ཞིག་ངང་གིས་མངོན་པའི།།
ལས་འཕྲད་བུ་མོ་ཁྱོད་ཡིད་དུ་སྡུག་ཨང་།།
 
ཚེ་རབས་ལས་འཕྲོ་ཡི་མདུད་པ་དམ་པོ།།
སྙིང་གི་ཟབ་ས་ནས་གྲོལ་མཁན་མ་རྙེད།།
མ་སྐྱེས་ཁྱོད་ཉིད་ཀྱི་འཛུམ་མདངས་རྣོན་པོས།།
འཁྲེང་ཞེན་ཕྱིར་མིག་ལ་ཡོལ་བ་འཐེན་བྱུང་།།
 
སྔོན་སྨོན་ལས་འབྲས་ཀྱིས་ལྷན་དུ་བསྡུས་པའི།།
ཆ་མེད་རྒྱུས་མེད་ཀྱི་བུ་མོ་ཁྱོད་ལ།།
ཕྱི་གསལ་ནང་གསལ་གྱི་སེམས་པའི་གུར་ན།།
དུངས་བ་གསེར་དངུལ་གྱི་བཞུགས་ཁྲི་བརྒྱབ་ཡོད།།
 
དགོང་ཚོགས་ཐེངས་གཅིག་གི་གོ་སྐབས་མ་གཏོགས།།
ཁ་བརྡ་རིང་མོ་ཞིག་གློད་ཁོམ་མ་བྱུང་།།
བལྟས་ཀྱིན་བལྟས་ཀྱིན་དུ་བློ་ལ་འབབ་པའི།།
ན་ཆུང་བུ་མོ་ཁྱོད་བྱུ་རུའི་མེ་ཏོག།
 
ཨ་གསར་ཁ་ཕོ་ལ་ཁོ་བོ་མི་དགའ།།
ཚུལ་འཆོས་རྫིག་ཉམས་ཀྱང་ཁྱོད་ལ་མེད་འདྲ།།
ག་ལེར་ཕན་ཚུན་ལ་རྒྱུས་མངའ་ལོན་ཚེ།།
བརྩེ་དུང་མེ་ཏོག་ཅིག་བཞད་ན་ཐང་གི།
 
དུངས་བ་དར་དཀར་གྱི་རྨུ་ཐག་རིང་མོ།།
ཁྱོད་སེམས་མཚོ་མོ་ཡི་རྒྱན་དུ་བྲེས་ན།།
སྙིང་གཏམ་མུ་ཏིག་གི་ལྡེ་མིག་ཅིག་གིས།།
མཛའ་བརྩེའི་གསེར་སྒོ་དེ་ཕྱེས་ན་ཆོག་ཨང་།།
 
བུ་མོ་ཁྱོད་ཕྱོགས་ལ་ཤོར་བའི་སེམས་འདི།།
ཕྱི་རུ་འགུག་ཐབས་ཤིག་ཁྱོན་ནས་མི་འདུག།
དགའ་བ་རྣམ་དག་གི་བརྩེ་བའི་འཕྲིན་ལ།།
མིག་ཟུང་ཕྲ་མོ་དེ་རེ་ཞིག་གཏད་རོགས།།
                             ༢༠༡༢.༣.༡༥ཉིན།

རྩོམ་ཁུངས། ངེད་དྲ་བ།