སྐྱ་རེངས་བུ་མོ་མལ་ལས་ལྡང་བའི་དུས་དང་ལྷན་ཏུ་མལ་ལས་ལངས་།།
མིག་གཉིས་ལག་པས་ཕུར་ཕུར་བྱེད་བཞིན་ཁྲུས་ཁང་ཕྱོགས་སུ་གོམ་ཁ་བསྒྱུར།།
སོ་སྨན་སོ་བཀྲུ་སྒང་ལ་སྦྱར་ནས་སུམ་བཅུའི་སོ་ཕྲེང་བཀྲུས་ཞོར་དུ།།
གསང་སྤྱོད་འགྲམ་ལ་དན་སེ་བསྡད་ནས་གཅིན་མ་ཤག་སེ་མར་ལ་བཏང་།།

གཅིན་པ་བཏང་བའི་ཚར་མ་ཐག་ལ་ལུས་པོ་དབང་མེད་སྤྲུག་སྤྲུག་བྱས།།
འདི་ནི་སྐྱེས་པ་ཡོད་དོ་ཅོག་ལ་ངང་གི་མཆིས་པའི་རང་བཞིན་རེད།།
ངོ་གདོང་དང་ནི་ལུས་པོ་བཀྲུས་ནས་སྟོད་གོས་གསར་བ་ལུས་ལ་གོན།།
ཐབ་ཚང་ཇ་ཁང་ནང་ལ་སོང་ནས་འཁྱགས་སྒམ་སྒོ་མོ་ཁ་ཕྱེས་ནས།།

མར་དང་འོ་མ་མཉམ་ཏུ་བླངས་ནས་བག་ལེབ་མཉམ་ཏུ་ཞོགས་ཇ་འཐུང་།།
གྱང་ངོས་བཀལ་བའི་དུས་ཚོད་དེ་ལ་ཁྲ་ཆུང་མིག་གིས་ཡང་ཡང་འཕང་།།
འགྲོ་བའི་དུས་ལ་སླེབས་རག་བར་དུ་སྐར་ཆ་ལྔ་ལས་ལྷག་མི་འདུག།།
མྱུར་ཏུ་ལག་ཁུག་རྒྱབ་ལ་ཁུར་ནས་སྒོ་རྒྱབ་བུད་ནས་སྒོ་ལྕགས་བརྒྱབ།།

ཤར་མར་རླངས་འཁོར་འབབ་ཚིགས་ཕྱོགས་སུ་སྤྱི་སྤྱོད་རླངས་འཁོར་སྒུག་ཏུ་སོང་།།
ནམ་རྒྱུན་ཡོང་བའི་སྤྱི་སྤྱོད་རླངས་འཁོར་དེ་མ་ཐག་ཏུ་གནས་འདིར་འབྱོར།།
ཡོ་སྒོར་གཉིས་དང་ཕྱེད་ཀ་ཕྱིན་ནས་ལས་ཀ་འགྲོ་བའི་གནས་སུ་བཞུད།།
ཐག་ཐག་སྐར་ཆའི་འགྲོས་དང་བསྟུན་དེ་ལས་ཀ་བྱེད་སའི་གནས་ལ་ཐོན།།
ནམ་རྒྱུན་ལས་ཀ་བྱེད་པས་ཁྱིམ་ནི་སྒོ་རྟགས་ཨང་གྲངས་བཅུ་གཅིག་ཡིན།།

ཨང་གྲངས་དེ་ནས་མཛུབ་མོས་མནན་ནས་ཅུང་ཙམ་སྒུག་པའི་བར་སྐབས་ལ།།
ཧ་ལོ་ཟེར་བའི་བརྡ་ལན་ལྷན་ཏུ་ནང་ལ་ལོག་ཕེབས་ཟེར་བའི་བརྡ།།
སྒོ་ཁའི་འགྲམ་གྱི་ཁ་པར་དེ་ལས་བདག་གི་རྣ་བས་གསལ་བར་ཐོས།།
སྒོ་མོ་ཕྱེས་ནས་ནང་དུ་་སོང་བས་ཁྱིམ་ཚང་དེ་ཡི་སྦྱིན་བདག་མ་།།


ལས་ཀ་འགྲོ་བར་བྲེལ་བའི་བར་ནས་འཚབ་མ་འཚུབ་གྱིས་ངང་དུ་གནས།།
ང་ནི་ལས་ཀ་འགྲོ་ལ་རན་པའི་ཁྱེད་ཀྱིས་གད་བརྡར་ཚང་མ་བྱོས།།
བདག་གི་གྱོན་པས་འོག་འཇུག་དང་ནི་རྐང་ཤུབས་ལ་སོགས་དེ་ན་ཡོད།།
དེ་མིན་གསང་སྤྱོད་ཁྲུས་ཁང་ནང་ལ་གད་བརྡར་གཙང་ཞིང་དག་པ་བྱོས།།

དགོང་དྲོ་ཆུ་ཚོད་བདུན་པ་བར་དུ་ང་ཡི་ལས་འཚམས་མི་གྲོལ་ཟེར།།
ཞེས་པའི་སྐད་ཆ་ལབ་གླེང་ཞོར་ཏུ་པེ་པེ་ཟེར་བཞིན་ལས་ཀ་ལོག།།
གཡས་གཡོན་གཡུག་པས་གོན་པ་དང་ནི་དཔེ་ཆ་དེ་དག་གྲལ་དག་བཞག།།
གློག་གི་གཙང་བཟོ་འཕྲུལ་ཆས་བཀོད་ནས་ཁང་པའི་མཐིལ་གདན་དག་ཞིང་བཀྲུས།།
གློག་འཕྲུལ་གོན་པ་བཀྲུ་བྱེད་ནང་ལ་འོག་འཇུག་དང་ནི་རྐང་ཤུབས་སོགས།
ཡོད་ཚད་གཅིག་ཀྱང་དེ་རུ་མ་བཞག་བཀྲུ་བྱེད་ནང་ལ་བཅུག་ནས་བཀྲུས།།

ད་ནི་གསང་སྤྱོད་གཅིག་པོ་མ་གཏོགས་ལས་ཀ་ཕལ་ཆེར་རྫོགས་ལ་ཉེ།།
ལག་ཤུབས་གོན་དེ་གསང་སྤྱོད་ནང་ལ་གཙང་སེལ་སྨན་ཆུ་དྲི་ཞིམ་གཏོར།།
ཆབ་ཆེན་དང་ནི་ཆབ་ཆུང་གཏོང་སའི་རྫ་ཁུང་ནང་ཡང་དག་པར་བཀྲུས།།
ད་ནི་དེ་རིང་ཉིན་མོ་གཅིག་གི་ལས་ཀ་འདི་ལྟར་རྫོགས་ན་ཡང་།།

ཆུ་ཚོད་བདུན་པ་མ་ཡོལ་བར་དུ་ཁྱི་ཕྲུག་དཀར་བོ་འདུག་རོགས་དགོས།།
འདི་ལྟར་ཉིན་ཞག་སུམ་བརྒྱ་དྲུག་ཅུ་ཁྱིམ་ཚང་འདི་རུ་ལས་ཀ་བྱས།།
ཡོ་སྒོར་རིན་ཐང་ཆེ་བའི་དབང་དང་ནང་མི་ཕུ་ནུ་ཕན་པའི་ཆེད།།
རང་གི་མི་ཚེའི་རིན་ཐང་ཞེས་པ་འདི་ལྟར་སྐྱེལ་བ་ཕངས་སེམས་མེད།།

ལ་ལའི་དེ་ལ་དམའ་འབེབས་བྱེད་པའི་དུག་གི་མདའ་མོ་འཕངས་ན་ཡང་།།
རྐུ་འཕྲོག་ཇག་བྱེད་མགོ་སྐོར་མིན་ཞིང་ལུགས་དང་མཐུན་པའི་ལས་ཀ་ཡིན།།
བཟང་ངན་གང་བརྗོད་ཁྱད་པར་མི་འདུག་དཀའ་ལས་ངོ་མས་རྒྱག་གི་ཡོད།།
ཉིན་ཞག་གཅིག་ལ་ཡོ་སྒོར་བདུན་བཅུ་དངུལ་ཁང་ནང་ལ་ལྡུག་བཞིན།།

ཕ་མ་སྤུན་མཆེད་ནང་མི་རྣམས་ལ་སྒོར་མོ་འགའ་རེ་བསྐུར་གྱི་ཡོད།།
བཙན་བྱོལ་ཡོད་པའི་བྱིས་པ་འགའ་ལ་ཟླ་རེར་སློབ་ཡོན་སྤྲད་ཀྱི་ཡོད།།
བཙུགས་པའི་སྒེར་གཉེར་སློབ་གྲྭ་ཞིག་ལ་སྦྱིན་བདག་གང་ཐུབ་བྱེད་ཀྱི་ཡོད།
འདི་ནི་བདག་གི་གསང་སྤྱོད་ཁྲུས་པའི་རིན་གོང་དེ་ནི་རིན་ཐང་རེད།།

               ༢༠༡༣་༣་༢༧་ཉིན་རང་ཤག་ནས་བྲིས།།

རྩོམ་ཁུངས། ངེད་དྲ་བ།