སྔོན་བྱོན་དམ་པ་ནམ་མཁའི་སྐར་ཚོགས་ཏེ།།
བྱེད་པོ་གང་གིས་བགྲང་བར་མི་ནུས་ཀྱང་།།
རྒྱུ་སྐར་བདག་པོའི་འོད་གསལ་ཁྱད་འཕགས་ཕྱིར།།
གངས་ཅན་བོད་མིའི་ཟླ་བ་སམ་བྷོ་ཊ།།
ཆོས་ལུགས་གྲུབ་མཐའ་ནགས་ཀྱི་ཚང་ཚིང་ན།།
མུ་སྟེགས་སྟག་མོའི་ང་རོ་ཆེས་འཇིགས་ཀྱང་།།
རྩོད་པའི་ལུས་སྟོབས་མ་ལུས་ཀུན་རྒྱས་པའི།།
ཚད་མས་སྟག་འཇོམས་ས་སྐྱ་པཎྜི་ཏ།།
འཇིག་རྟེན་འཁོར་བ་སྙིང་བོས་སྟོང་གྱུར་བ།།
ལེགས་པར་མཐོང་ནས་ངེས་འབྱུང་སེམས་བསྐྱེད་དེ།།
དབེན་པའི་གནས་སུ་དམ་པའི་ཆོས་བསྒྲུབས་ནས།།
མངོན་སུམ་སངས་རྒྱས་རྗེ་བཙུན་མི་ལ་རས།།
རྫོགས་ལྡན་དུས་ནས་འཇིག་རྟེན་ཆགས་རིམ་དང་།།
ཚེ་ལོ་བརྒྱ་ཡི་འགྲོ་མི་གྲོལ་ལུགས་སོགས།།
རྗེས་རབས་གངས་ཅན་བོད་མིའི་སྤྱན་ལམ་དུ།།
ཨ་དར་ཤ་བཞིན་འགྲེམ་སྤེལ་གཞོན་ནུ་དཔལ།།
སྐུ་ངལ་མེད་པར་རིག་པའི་གནས་ཀུན་མཁྱེན།།
རང་ལུགས་ཞྭ་སེར་སློབ་བུ་སྟོང་ཕྲག་བསྐྱངས།།
མདོ་དབུས་ཁམས་གསུམ་ཆོས་ཀྱིས་ཚིམ་བྱེད་པའི།།
ཤར་ཕྱོགས་སེམས་དཔའ་ཆེན་མོ་ཙོང་ཁ་བ།།
རིས་མེད་གྲུབ་མཐའ་མང་བོར་དཔྱིས་ཕྱིན་ཅིང་།།
སྒོས་སུ་ཆོས་སྲིད་བ་དན་དགུང་དུ་ཕྱར།།
འགྲོ་མི་ཡོངས་ལ་ཐུགས་ཁུར་ཆེས་གནང་བའི།།
ལྔ་བ་ཆེན་མོ་དགའ་ལྡན་ཁྲི་ན་འགྱིང་།།
སྐུ་ཚེ་གང་བོར་རྒྱལ་ཁམས་ཀུན་འགྲིམས་ཀྱང་།།
དགོས་པའི་རྒྱུ་ནོར་གསོག་ལ་མ་འབད་པར།།
གཞན་རིག་རྣམ་མང་ནང་དུ་དབོར་འདྲེན་མཁན།།
རིག་པའི་དཔའ་བོ་དགེ་འདུན་ཆོས་འཕེལ་ལགས།།
བོད་ཀྱི་དབྱངས་གསལ་རྔ་བཅད་རྔོག་རྡུམ་བྱེད།།
འདོད་ནས་རིག་གསར་དུག་མེ་མཆེད་སྐབས་སུ།།
བདུད་རྩིའི་ཐིགས་པ་རེ་རེས་རིག་གསར་མེ།།
གཞི་ནས་འཇིལ་བར་བྱེད་མཁན་རྗེ་དམུ་དགེ།།