རི་ཕྲེང་བ་ཚར་དུ་དངར་ས།།
ཤིང་སིལ་སྡོང་ཚང་ཚིང་སྐྱེས་ས།།
བྱེའུ་འཇོལ་མོའི་གླུ་སྐད་སྙན་ས།།
མདོག་སྣ་ཚོགས་མེ་ཏོག་བཀྲ་ས།།
ཆུ་རྨ་ཆུ་ལྷོད་ཀྱིས་བཞུར་ས།།
རྟེན་འགངས་ཆེན་ལྷ་སྲུང་བཙན་ས།།
འཇམ་མཁའ་དབུགས་དྭངས་ཤིང་གཙང་ས།།
གནས་སྐྱིད་པོ་རྟེན་རྫོང་ཁྲི་ཀ།
སྔོན་ཚེ་བསོད་ལས་དབང་ཞིག་གིས།།
ཞེ་འདང་ཆེན་གཡུ་སྒྲོན་ངེད་གཉིས།།
རྫོང་མི་རིགས་སློབ་འབྲིང་ནང་དུ།།
ལས་སློབ་གསོའི་གཞི་རྐང་འདྲ་སོང་།།
མཉམ་གཅིག་ཏུ་འཛོམས་སྐལ་འགྲིག་སོང་།།
གོང་མགོ་ཁྲིད་བློ་རྒྱ་ཅན་པོས།།
ཇུས་འཆར་འགོད་གོར་མོ་ཞིག་གིས།།
མ་ངེད་གཉིས་སྒྲུབ་ཁང་གཅིག་ནས།།
གཞུང་ལས་དོན་སྐྱོང་དགོས་བྱུང་སོང་།།
དཔེ་བཞག་ན་རེ་འདོད་མྱུ་གུ།
ཞིང་གྲུ་བཞིའི་པང་ནས་འཁྲུངས་འདྲ།།
ལུས་ལང་ཚོ་དར་ལ་བབ་དུས།།
གནས་ཞིང་བཀོད་ཟི་ལིང་གྲོང་གི།།
གླིང་སློབ་ཆེན་གཅིག་ལ་ཁེལ་ཡོད།།
རྒན་བཤེས་གཉེན་གཅིག་གི་དགེ་ཕྲུག།
གནས་བཅུ་ཕྲག་ཡོན་ཏན་མཉམ་སྦྱོང་།།
རང་སོ་སོའི་འདུན་མའི་སླད་དུ།།
དུང་བརྩེ་བ་ལྒིང་ཁོམ་མ་བྱུང་།།
སྤོབས་བསྐྱེད་དེ་དགའ་ཚུལ་མ་སྟོན།།
དོན་ངོ་མར་ཡ་ཆུང་ཁོག་དང་།།
སེམས་གངས་དཀར་རས་གཞིའི་ངོས་ན།།
དགའ་དྲགས་པའི་མེ་ལྕེ་འུར་འུར།།
ཞེ་དུངས་པའི་སྙིང་ཆུང་ལྷོག་ལྷོག།
རྒན་དམ་པའི་སློབ་ཁྲིད་བགྱིད་དུས།།
ཤེས་ཡོན་ཏན་བུམ་པ་གང་བྱོ།།
ཕྱོགས་རིས་མེད་བློ་ངོར་བཀོད་ཀྱང་།།
སྐྱོན་ཁ་སྦུབ་ལྟ་བུའི་ལེ་ལོས།།
ཤེས་ཡོན་ཏན་རྒྱུད་ལ་མི་འཁོར།།
དུས་རྒྱུན་པར་ལོབས་ཕྱོགས་གཅིག་ལ།།
མཛེས་མེ་ཏོག་ལྟ་བུའི་སྙིང་སྡུག།
འོག་ལྐོག་མིག་ལང་ལིང་བསྐོར་ཡོད།།
རྒྱབ་རོ་སྟོད་ཁུད་དུ་དཔྱངས་པའི།།
གནག་སྣུམ་པོའི་ལྕང་ལྕུག་ལན་བུ།།
མིག་ཧྲིག་གེར་འཛུམ་གྱིས་ལྟ་ཞོར།།
སེམས་རྒྱ་ཡན་ཕྱི་རོལ་འགྲིམས་ནས།།
ཡིད་འཕྲུལ་བའི་འཆར་ཡན་ཕྱེ་ཚེ།།
ཞལ་གོར་མོ་བཅོ་ལྔའི་ཟླ་འདྲའི།།
ངའི་སེམས་ཀྱི་སྙིང་སྡུག་ངེད་གཉིས།།
གཟུགས་ལུས་པོ་མཉམ་གཤིབ་བྱས་ཏེ།།
འཛུམ་དགའ་དགོད་མེ་ཏོག་འདྲ་བོ།།
གནས་གྲུ་བཞིའི་སློབ་ཁང་ནང་གི།།
འདུག་ཅོག་ཙེ་གཅིག་ནས་བཞད་དེ།།
དོགས་དཀའ་གནད་མདུད་རྒྱ་མཉམ་གྲོལ།།
རིག་ཤེས་བྱའི་འོ་མ་མཉམ་འཐུང་།།
གཡུ་སྦྲང་ཆུང་གཉིས་ལ་འཕྱ་བའི།།
ཞེ་ཐོགས་པའི་ཉམས་འགྱུར་དོད་པོ།།
སྐྱིད་འཁོར་བའི་རྒྱན་གཅིག་རེད་འདོད།།
བློ་སྒྲིམ་ནས་ཡར་མར་ལྟ་དུས།།
ཐང་འབྱམས་ཀླས་བྱེ་མའི་ཀློང་གི།།
གཟུགས་མི་རྟག་སྨུག་རྒྱུའི་ཚུལ་འདྲ།།
མིག་འཕྲུལ་བའི་གར་འཁྱུག་གློག་འདྲ།།
ཆོས་སྟོང་བ་སྟོང་འདང་ཁོ་ན།།
ལུས་ལང་ཚོ་གཉོམ་ལག་རྒྱས་དུས།།
མ་ངེད་གཉིས་འཛིན་གྲྭ་གཅིག་རུང་།།
ངར་དགའ་བའི་ཏིལ་འབྲུའི་ས་བོན།།
ཞེ་བསམ་ན་སྟེར་འདོད་ཡོད་རུང་།།
དུང་བརྩེ་བ་ང་ལ་མ་དབང་།།
གཟའ་ཉི་མའི་ངལ་གསོ་ཞིག་གི།
དགོང་ཕྱི་དྲོའི་ས་རྩ་རུབ་དུས།།
བརྩེ་འདང་ཡོད་ཨ་འགྲིག་ཆ་འགྲིག།
དཔུང་སྡེབ་ནས་མཉམ་འགྲོ་བྱེད་གི།
ཁ་བགད་ལེ་འཛུམ་རིས་སྟོན་གི།
མཛེས་སྐྱེད་ཚལ་མེ་ཏོག་ཚོགས་ལ།།
གཡུ་རྐང་དྲུག་སྦྲང་མ་འཁོར་འདྲ།།
འགྲོ་གོམ་པའི་ལེན་ཕྱོགས་ཤིག་ལ།།
ཁང་ཐོག་བརྩེགས་གྲུ་ཟུར་ཞིག་ཏུ།།
མཚན་མི་ཐོགས་སྟག་ཤར་ཞིག་དང་།།
མ་བུ་མོ་གཡུ་སྒྲོན་གཉིས་ཀས།།
མགོ་བསྡུས་ནས་སྙིང་གཏམ་ཚུལ་གྱིས།།
ཚིག་སྐད་ཆའི་ལྷུ་རྐང་སྒྲིག་ཞོར།།
ཞེ་མཐུན་པའི་ཧབ་ཆ་དགོད་གི།
ཐག་ལེ་དབར་རིང་པོ་ཆོད་ཀྱང་།།
མོའི་ལྷན་སྐྱེས་དགོད་སྒྲའི་འགྱུར་ཁུགས།།
ངའི་རྣ་འཛིན་ཡུལ་དུ་ལྷུང་གི།
སེམས་དམར་པོ་ཙག་ཤད་རྒྱུག་གི།
ཞེ་སྣང་བའི་མཐུན་ལུགས་ཤིག་གམ།།
སྟག་ཤ་རའི་ཕོ་སྒོའི་རྐྱེན་གྱིས།།
དམན་ང་ལ་ཐོབ་སྐལ་མེད་སོང་།།
ཐོབ་མེད་རུང་དགའ་དུངས་སེམས་པ།།
རྡོ་བྲག་ལ་བཏབ་འདྲའི་རི་མོ།།
འདི་སུ་དང་གང་གིས་མི་གསུབ།།
དུས་རེས་མོས་འཁོར་སྐྱོད་ཀློང་ནས།།
ལོ་བཞི་བོའི་སློབ་ཆེན་འཚོ་བ།།
སྡུག་ཁུར་བོ་ཞིག་ལ་གཞིབ་ནས།།
སེམས་སྟོང་འདང་ཞིག་ལ་འཐིམས་ནས།།
འདི་ཇི་ལྟར་འདས་པ་མ་ཤེས།།
རང་སོ་སོའི་འདུན་མའི་སླད་དུ།།
བྱེའུ་བྱ་བརྒྱ་གཤོག་རྩལ་རྒྱས་ལྟར།།
གནས་ངེས་མེད་ཁ་འཐོར་དགུ་འཐོར།།
ལས་མཛད་འཕྲིན་བསྐྱང་ལ་བྲེལ་སོང་།།
གྲོགས་གྲོགས་མོའི་ཁ་ཐག་ཆད་སོང་།།
གནས་རྒྱང་ཐག་རིང་བོ་ཆོད་ཀྱང་།།
རིག་སློབ་བུ་རེ་འགའི་དུང་བརྩེ།།
ལྷད་མི་འདྲེས་འོ་མའི་ཡན་རེད།།
བརྩེ་མི་འགྱུར་རྡོ་རྗེའི་བརྟན་རེད།།
དུས་ལོ་གཅིག་མི་འགོར་ཡུན་ལ།།
མ་གཡུ་སྒྲོན་དོན་གྲུབ་གཉིས་ཀའི།།
དུང་བརྩེ་བར་ཆག་གྲུམ་ཤོར་ནས།།
ཞེ་སྣང་བའི་རྒྱུན་ཐག་བཅད་དེ།།
ལས་མི་གཅིག་ཁ་ཕྱོགས་ཟློག་གི།
མཐུན་བརྩེ་བའི་ཨ་ལོང་གྲོལ་ཏེ།།
འདོད་མི་གཅིག་ཁ་ཁ་སྙེག་གི།
ངའི་གངས་དཀར་སེམས་ཀྱི་འདོད་རེད།།
འདོད་ཡིན་རུང་གཡུ་སྒྲོན་གན་གི།
ཡིད་ཁང་བཟང་གྲུ་བཞིའི་ནང་ན།།
སྟག་ཤ་ར་སུ་ཞིག་བཅུག་ཡོད།།
དུང་བརྩེ་བ་གང་ལ་འཕངས་ཡོད།།
བགེག་ཡོད་ཀྱང་ལས་སྐལ་ཆུང་ངུ་།།
གནས་ཁྲི་ཀའི་ཡུལ་ནས་བཞད་སོང་།།
རྫོང་སློབ་འབྲིང་གླིང་ནས་བརྡོལ་སོང་།།
དུས་རྒྱུན་པར་གཞུང་དོན་སྒྲུབ་ན།།
མིག་ཁྲ་རིལ་ལྟ་ཕྱོགས་བདེ་གི།
སེམས་དྲོན་མོས་གླན་ས་ཉེ་གི།
ཚིག་ལྷུ་རྐང་སྒྲིག་ས་འགྲིག་གི།
དཔེ་བཞག་ན་དགོས་འདོད་རིན་ཆེན།།
ཕར་མ་བཙལ་འཁྲིས་སུ་ལྷུང་འདྲ།།
འདེགས་གདུང་མ་ཀ་བར་འགྱུར་བའི།།
ཆུང་སློབ་བུའི་མདུན་ལམ་བསམ་ཞོར།།
ནངས་སྔ་ལངས་དགོང་འཕྱི་རེས་མོས།།
མཉམ་གཅིག་ཏུ་གོམ་འགྲོས་འདུར་བཞིན།།
རིག་སློབ་གྲྭའི་ར་སྐོར་ཀུན་ཏུ།།
ལུས་གྲིབ་མ་ལྟར་དུ་འགྲོགས་ནས།།
མཛད་འཕྲིན་ལས་རྒྱས་པའི་དོད་དུ།།
འབད་ཧུར་ཐག་བརྩོན་པ་བསྐྱེད་དེ།།
དེབ་བམ་པོ་བྲག་རི་བརྩིགས་རུང་།།
སེམས་ཞིབ་མོས་དཔྱད་འཇོག་བྱས་ཡོད།།
ནར་སྒོ་སམ་ཁ་ཞེང་ཆེ་རུང་།།
ལག་ས་སྨྱུག་ལྷན་དུ་བརྡར་ཡོད།།
དོན་དཀའ་གནད་ཐང་མར་བརྡལ་ཡང་།།
ཉིན་གཅིག་གི་དུས་ཚོད་ཕན་ཆད།།
མཚན་སྨག་རུམ་དགུང་ལ་གྱོན་ཡང་།།
གཞུང་ལས་དོན་སྒྲུབ་ཁང་ནང་དུ།།
མགོ་ནག་རིས་གཅིག་ལ་གཤིབ་ནས།།
གཟབ་ནན་མོས་སྨིན་མ་བསྡུ་ཞོར།།
ཁུངས་བཙུན་པའི་དཔྱད་གཞི་བསློགས་ཏེ།།
རྐྱ་བཀར་ནས་གསེལ་འགྲོལ་བྱས་ཡོད།།
མཇུག་འབྲས་ལེགས་ཐོབ་པའི་ཕྱིར་དུ།།
མ་ངེད་གཉིས་རྡོག་རྩ་སྒྲིལ་ཡོད།།
དཀའ་སྡུག་རུས་ཐོད་དུ་བླངས་ཡོད།།
དུས་རྟག་ཏུ་རྒྱུན་འཁྱོངས་བྱས་ཡོད།།
ལུས་སེམས་པ་ཚེགས་པའི་རྐྱེན་གྱིས།།
མ་གཡུ་སྒྲོན་བརྩོན་སེམས་ཅན་པོའི།།
ཤ་རིད་ནས་ལུས་ཀྱང་སྐམ་ཐལ།།
མདངས་ཉམས་ནས་མཛེས་ཆ་བོར་ཐལ།།
ཡིད་སྐྱོ་ནས་སེམས་གསོའི་ཚབ་ཏུ།།
སྤྱིར་རྗེས་རབས་བོད་པའི་ལས་དོན།།
འདི་མ་སྐྱུང་གཙུག་ཏུ་བཀུར་བ།།
སྨན་མཛངས་མ་ཞིག་གི་རྟགས་རེད།།
དེ་ཡིན་ཡང་རང་ལུས་རིན་ཆེན།།
འདི་མ་དོར་བདག་སྐྱོང་བྱ་དགོས།།
དེ་མིན་ན་ལུས་ཟུངས་ཟད་ནས།།
བུ་སློབ་བུའི་ཕུགས་བསམ་དྲོན་མོར།།
སྣེ་ཡག་པོ་ཁྲིད་རྒྱུ་དཀའ་གི།
མོས་སེམས་པས་ཐོས་པའི་བརྡ་ལ།།
འཛུམ་ལངས་ནས་བརྡ་ཞིག་སྟོན་གི།
ངའི་གཡར་བའི་ལུས་གཟུགས་ཧྲིལ་བོ།།
སྦྲིད་འཐོམ་མེར་དྭངས་མཐའ་མེད་ཐལ།།
དགའ་ལྷད་མེད་ཡིན་པའི་རྟགས་རེད།།
མོར་དུངས་བའི་འཁྲུལ་མེད་བརྡ་རེད།།
སེམས་རྣམ་དག་ཆུ་ཤེལ་འདྲ་བོ།།
ནམ་ཡིན་རུང་མོ་ལ་གཏད་ཡོད།།
མ་ངེད་གཉིས་འདི་ནས་འཕྲད་པ།།
ཚེ་སྔོན་བསགས་ལས་ཀྱི་འབྲས་རེད།།
འདི་བསམ་ན་ཡིད་ཀྱི་ནམ་མཁའ།།
སྔོ་ཡུག་ཡུག་རྒྱུན་དུ་དྭངས་གི།
སེམས་ཡ་ཆུང་དྲོད་ཀྱིས་ཁེངས་གི།
སྐབས་གཅིག་གི་སློབ་ལོ་འདས་ནས།།
དགུན་གུང་གསེང་ངལ་གསོ་ཐོན་ཐལ།།
འགྲོ་ལམ་སྣེ་ཁ་ཕྱོགས་སོ་སོ།།
བར་ཁ་ཐག་ལེ་དབར་ལྔ་བརྒྱ།།
འདི་བསམ་ན་སྙིང་སྡུག་གཡུ་སྒྲོན།།
དུས་གཏན་དུ་འབྲལ་འདོད་མི་སྐྱེས།།
ངའི་སྙིང་གི་ཕྱེད་ཀ་ཁྱོད་ཡིན།།
ངའི་སེམས་ཀྱི་ཚེར་ཡ་ཁྱོད་ཡིན།།
འདི་ཡིན་ཡང་འབྲལ་དགོས་བྱུང་ན།།
ལས་བསྐོས་ཐང་འགྱུར་བག་དཀའ་གི།
ཁ་བྲལ་བའི་ཉིན་མོའི་ནངས་མོར།།
ས་ཁྲི་ཀ་གསེར་རྨིག་རྫོང་གི།
འཕྲུལ་རླངས་འཁོར་ས་ཚིགས་ཁྲོད་ནས།།
མིག་མཆི་མ་རྨ་ཆུར་བསྲེས་ཏེ།།
ཡིད་སྐྱོ་བ་སྨུག་ལ་གཅོལ་ནས།།
གྱེས་ཕྱག་བརྡའི་བར་ནས་བསྐྱུར་ཏེ།།
རང་སོ་སོའི་ཡུལ་ལ་སྙེག་སོང་།།
འཕྲལ་གློ་བུར་གམ་ནས་བྲལ་ན།།
དངོས་རྩ་ཆེན་བོར་སྟོར་བྱུང་འདྲ།།
དོན་གལ་ཆེན་ཡིད་ནས་བརྗེད་འདྲ།།
ཡིད་སྡུག་བསྔལ་རབ་ཏུ་གནོན་དཀའ།།
སྐྱོ་མུན་པ་མཐར་སྐྲོད་བྱ་ཆེད།།
ཁོམ་བར་སྐབས་དུས་ཀྱི་གསེང་ནས།།
དྲན་གདུངས་བས་བརྡ་འཕྲིན་བསྐུར་ཏེ།།
བརྩེ་གསེར་སྐུད་དམ་དུ་འབྲེལ་ནས།།
མྱུར་མཇལ་བའི་སྙིང་གཏམ་ལྒིང་ཡོད།།
ཉིན་ཞིག་གི་ཉིན་མོ་འདས་ནས།།
དགོང་མཚན་མོ་སྨག་རུམ་ནག་དུས།།
སྤྲིན་ནག་པོ་ལང་ལོང་འཁྲིགས་གི།
རླུང་འཚུབ་མས་སྐོར་འཚུབ་རྒྱག་གི།
གན་སྐུད་མེད་ཁ་པར་གྲགས་ཐལ།།
ལྟས་ངན་པ་ཞིག་གི་རྟགས་རེད།།
འཛེམ་དོགས་པ་སེམས་ནས་འཆར་ཞོར།།
ཞེ་འཚེར་ནས་ཁ་པར་ལང་པར།།
ངའི་སྙིང་སྡུག་གཡུ་སྒྲོན་གན་གིས།
སྐད་དམའ་མོས་བདེ་འཚམ་འདྲི་གི།
ཡིད་ཉིས་འགལ་ཐེ་ཚོམ་སྐྱེས་བཞིན།།
ངས་ཅི་བྱུང་གང་བྱུང་དྲིས་པར།།
སེམས་སྨྲེང་བའི་མགྲིན་པ་བརྣངས་ཏེ།།
དོན་རྡོག་རྡོག་སྐད་ཆ་ཤོར་དཀའ།།
བསམ་བསམ་ནས་ཚིག་འགའ་ཤོར་ནོ།།
ངའི་བརྩེ་དུང་རང་དབང་མེད་ཐལ།།
མ་ང་ལ་བྱ་ཐབས་ཟད་ཐལ།།
ངའི་མདུན་ལམ་བར་གེགས་ཐོན་ཐལ།།
དྲིན་ཕ་མའི་གསུང་སྒྲོས་བཀའ་རེད།།
བཀའ་བཙན་པོ་རྒྱལ་བོའི་ཁྲིམས་རེད།།
ཁྲིམས་བཙན་པོ་དབྱར་ཁའི་ཐོག་རེད།།
ཁ་ཡར་གྲགས་ཚིག་རྐང་དང་པོས།།
ངའི་མིག་ལམ་སྨག་གིས་བསྒྲིབས་ཐལ།།
ངའི་གློ་སྙིང་ཁ་ལོ་བསྐོར་ཐལ།།
ངའི་ཡ་ཆུང་འཁྱག་གིས་བསྡམས་ཐལ།།
ཡིད་སྐྱོ་ངལ་དྲག་པོས་གཟིར་རུང་།།
ཕྱིར་ཟློག་པའི་ལམ་ཞིག་ལྟ་ཅི།།
མ་ངེད་གཉིས་ཐུག་སྐལ་ཆད་ཐལ།།
ཨ་ཤི་རེ་བུ་ང་སྙིང་རྗེ།།
ཆོས་གཟིན་རྗེའི་རྒྱལ་བོའི་བཀའ་འདྲའི།།
གན་དབང་མེད་ཁྱིམ་བདག་བཙན་པོས།།
སྡེ་ལུང་བ་གཅིག་ན་འཚོ་བའི།།
ཕྱུག་སྟོབས་ལྡན་ར་བྷ་ཚང་ལ།།
གནས་སྟེར་བའི་གྲོས་མགོ་གཤིབ་ཐལ།།
རྟགས་སྟོན་མོར་དུས་ཆད་བཞག་ཐལ།།
དུས་དེ་རིང་ཉིན་མོའི་ཕན་ཆད།།
དུང་ཞེ་བརྩེ་འཕེན་ས་གཞན་རེད།།
སེམས་སྙིང་ཆུང་གཏོད་ས་གན་རེད།།
འདི་ཞིབ་ཏུ་བསམ་ན་སྡུག་རེད།།
སྡུག་མུན་པ་དྭངས་ཐབས་མེད་གི།
ང་འདྲ་འདྲའི་བུ་ཆུང་ལས་ངན།།
ལས་ངན་རུང་བཅོ་ཐབས་མེད་གི།
གྲོགས་དམ་པ་སྐྱབས་གསུམ་མགོན་པོ།།
དམན་ང་ལ་སྡོང་གྲོགས་མཛོད་དང་།།
སྐྱབས་བསླུ་མེད་དཀོན་མཆོག་གསུམ་པོ།།
བུ་ང་ལ་ལམ་ཞིག་སྟོན་རོགས།།
 

རྩོམ་ཁུངས། ངེད་དྲ་བ།