ཁ་སང་གྲངས་མེད་ཞིག་ཕར་ལ་འདས་ནས།།
སང་ཉིན་མང་པོ་ཞིག་གམ་ལ་བཅར་ཀྱང་།།
འཚོ་བ་མཐའ་མེད་ཀྱི་བྱེ་ཐང་ཆེན་མོར་།།
སོང་བའི་རྐང་རྗེས་ཞིག་ཡེ་ནས་མི་འདུག།
 
རི་བོ་མཐོ་མཐོ་ཡི་རྩེ་མོ་འགོས་ཏེ།།
ས་སྒང་ཧྲིལ་བོ་ལ་ལྟད་མོ་བསམ་ཡང་།།
མི་གཙང་རྫས་དུག་གི་མཐོང་ལམ་བསྒྲིབ་ནས།།
མིན་པའི་ཁ་དོག་ཞིག་བློ་ལ་བྲིས་སོང་།།
 
གནའ་བོའི་རི་གྲོང་ཞིག་རྒྱབ་དུ་བསྐྱུར་ནས།།
སྲིན་པོའི་གྲོང་ཚོ་ཞིག་ཡུལ་ལ་འཁྲུལ་བས།།
ཤ་སད་རུས་ཐུག་གི་ཕུང་བོ་འདི་ཡང་།།
རྒྱུ་འབྲས་གོ་ལྡོག་གི་ལམ་ལ་གོམས་སོང་།།
 
བབས་ཆགས་གདངས་སྙན་གྱི་ཀྱི་གླིང་བུ་ཁེར་འབུད།།
རྫ་རིའི་ཁོངས་ལ་གསེང་ལྷོད་ཀྱིས་ཁྱབ་ཡང་།།
ཧམ་སེམས་ཟགས་མེད་ཀྱི་ཅེ་སྤྱང་ཚོགས་ལ།།
སྙན་པའི་ཚོར་ཤེས་ཤིག་སྐྱེ་རྒྱུ་མ་བྱུང་།།
 
སྐྲ་ལོ་སིང་སིང་གི་ཡོངས་སུ་གཡོགས་པའི།།
ཁག་མེད་ཉེས་མེད་ཀྱི་ངོ་གདོང་ཆུང་ཆུང་།།
བསླུ་བྲུད་གྲངས་མེད་ཀྱི་འགྲམ་ལྕགས་བཞུས་པས།།
གཡོ་རྒྱུའི་ཕྱི་པགས་ཤིག་མི་གྱོན་རང་གྱོན།།
 
ནམ་མཁའ་སྔོ་སྔོ་གན་གོས་སུ་གྱོན་ཞིང་།།
ས་གཞི་ལེབ་ལེབ་འདི་གདན་ལ་བཏིང་ནས།།
གདོན་མའི་གླུ་སྐད་དེ་དབྱངས་སུ་བཀུགས་ཀྱང་།།
རི་ཀླུང་ཐང་་གསུམ་ཀུན་གྲགས་མེད་ཚོར་མེད།།
 
འགན་འཁྲི་འོས་འཚམ་ཞིག་མགུལ་དུ་དཔྱངས་ནས།།
རྐང་ལམ་ཀྱག་ཀྱོག་ཞིག་ལྡོག་པའི་མནན་ན།།
འཚོ་བ་བསྐྱར་བཟློས་ཀྱི་སྤྱི་འགྲོས་འདི་ལ།།
འགྱུར་ལྡོག་ཨེན་ཙམ་ཞིག་ཨེ་ཐོངས་བསམ་ཡོད།།
                    

རྩོམ་ཁུངས། ངེད་དྲ་བ།