སྲོད་ཀྱི་དུས་ཚིགས་འདི་ལ།།
གྱེས་པའི་ལག་འཇུ་གླན་སོང་།།
སང་གི་སྐྱ་རེངས་ཟེར་བ།།
ད་དུང་ཁ་ཐག་རིང་ངོ།།

སང་ཉིན་དབྱར་ཟླ་བཞི་བར།།
སྔོ་རྩྭའི་མལ་སྟན་སྟེང་ནས།།
ཆུང་འདྲིས་སྒྲོལ་མའི་ཕྱོགས་ལ།།
མིག་གིས་རྒྱང་ལྟ་བྱས་ཆོག།

ཆུང་འདྲིས་སྒྲོལ་མ་ཟེར་བ།།
ང་ལ་དབང་ཐབས་མི་འདུག།
དབང་བའི་ཐབས་ནི་མེད་ཀྱང་།།
དྲན་པའི་རྒྱུ་ནི་མི་ཆད།།

ཆུང་འདྲིས་སྒྲོལ་མའི་མིང་ཡིག།
ང་ཡི་སེམས་ལ་བརྐོས་ཡོད།།
ཆུང་འདྲིས་རྒྱང་ལ་བྱིན་ཀྱང་།།
མིང་ལ་བསུབས་ཐུབ་མི་འདུག།

སྒྲོལ་མའི་ཁྲོ་མིག་དེ་ནི།།
སེམས་ཀྱི་དྲོད་ཅིག་ཡིན་ནོ།།
ཁྲོ་མིག་མེད་པའི་ལོ་ཟླ།།
སེམས་ཀྱི་སྡུག་ཅིག་ཡིན་ནོ།།

ན་ནིང་དབྱར་ཟླ་བཞི་བ།།
འཛོམས་པའི་ཉིན་མོ་ཡིན་ལ།།
ད་ལོའི་དབྱར་ཟླ་བཞི་བ།།
གྱེས་པའི་ཉིན་མོ་ཡིན་སོང་།།

ཁྲེལ་དང་ཕྱི་ཐག་མེད་པ།།
ཁྱོད་ནི་ཡིན་ཡིན་སྣང་བ།།
ང་ནི་མིན་མིན་འདྲ་བ།།
སེམས་པའི་ཕྱི་ནང་དེ་རེད།།

དུངས་བ་ཨ་གསར་འཛིན་པ།།
ཁྱོད་ཀྱི་གཤིས་དེ་ཡིན་ལ།།
གཤིས་དེ་ཞེན་པ་ལོག་ནས།།
སེམས་ཀྱི་མགུར་རིང་གྱེར་སོང་།།

ཆུང་འདྲིས་སྒྲོལ་མ་ཟེར་བ།།
ཕྱི་ཐག་མེད་པའི་མི་ཡིན།།
ཕྱི་ཐག་མེད་པའི་མི་དེ།།
སེམས་ནས་བརྗེད་ཐབས་དཀའ་བ།།

འདས་པའི་ན་ནིང་ལོ་ཟླ།།
སྐྱ་ཐོ་སྔོ་སྡུག་ཡིན་ཡིན།།
སླེབས་པའི་ད་ལོ་ལོ་ཟླ།།
སྡུག་གིས་བསྐྱལ་བའི་ལོ་ཟླ།།

དགུང་གི་ཉི་མ་འདི་ལ།།
དྲོད་ཅིག་མེད་མེད་འདྲ་བ།།
ཆུང་འདྲིས་འདི་གའི་རིགས་ལ།།
རློམ་རྒྱུ་མེད་མེད་སྣང་བ།།

ཁྲེལ་དང་ཕྱི་ཐག་མེད་པའི།།
ཆུང་འདྲིས་འདི་གའི་རིགས་ལ།།
ཡི་ག་ཅུང་ཟད་ཆད་ཐལ།།
རློམ་སེམས་མེད་པ་ཤེས་ཐལ།།

ཆུང་འདྲིས་སྒྲོལ་མ་གླེང་ན།།
སྔོན་གྱི་སྒྲོལ་དཀར་དྲན་ཡོང་།།
ཁྲེལ་དང་ཕྱི་ཐག་འཛོམས་པའི།།
སྒྲོལ་དཀར་སྙིང་ནས་དྲན་ཡོང་།།

དྲན་པ་འདི་ཡི་རྒྱབ་ན།།
འགྱོད་པའི་གཞི་ཞིག་འདུག་གི།
འགྱོད་པའི་གཞི་ནི་འདུག་ཀྱང་།།
ད་ནི་བརྗེད་པར་བྱ་འོ།།

སྒྲོལ་མ་སྒྲོལ་དཀར་གཉིས་ཀ།
སེམས་ལ་བཅུག་པའི་མི་ཡིན།།
འདས་པའི་ལོ་ཟླ་འགོར་ཀྱང་།།
སེམས་ནས་བརྗེད་པར་མི་བྱ།།

སྒྲོལ་མ་སྒྲོལ་དཀར་གཉིས་ཀ།
ང་ལ་མཚོན་ན་དྲིན་ཡོད།།
སྙན་ངག་ཅེས་པའི་དགའ་རོགས།།
བར་བ་བྱེད་མཁན་དེ་ཡིན།།

སྒྲོལ་མ་སྒྲོལ་དཀར་མེད་ན།།
སྙན་ངག་ཅེས་པའི་དགའ་རོགས།།
རྙེད་ཐབས་བྱུང་བ་མི་འདུག།
དགའ་རོགས་སྒྲིག་ཐབས་མི་འདུག།

སྒྲོལ་མ་སྒྲོལ་དཀར་གཉིས་ཀྱི།།
དྲིན་ལ་འཇལ་ཐབས་མི་འདུག།
དྲིན་ལ་འཇབ་ཐབས་མེད་ཀྱང་།།
འཇལ་བའི་བསམ་པ་བཟུང་ཡོད།།

སྒྲོལ་མའི་ཁྲེལ་མེད་བྱས་ཀྱང་།།
ད་ནི་གཞི་ནས་མི་སྐྱོན།།
སྙན་ངག་ཅེས་པའི་མཛེས་མར།།
སྒྲོལ་མའི་བར་བ་བྱས་འདུག།

སྒྲོལ་མ་སྒྲོལ་དཀར་གཉིས་ཀ།
སེམས་ནས་བརྗེད་པར་མི་བྱ།།
སེམས་ནས་བརྗེད་པར་བྱས་ན།།
ད་ནི་ཁྲེལ་མེད་ང་ཡིན།།

སྒྲོལ་མ་སྒྲོལ་དཀར་ཟེར་བཞིན།།
ཚན་པ་ཉེར་གཅིག་བྲིས་ཐལ།།
སྒྲོལ་མའི་བསྟོད་པ་འདོན་བཞིན།།
སྒྲོལ་མ་མིག་ལ་ཤར་ཡོང་།།