འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།
གང་ལ་གང་འཚམ་དེ་ལ་དེ་འཚམ་གྱིས།།
མི་ཆེན་ངོ་སོ་བསྟོད་ལ་མི་མཁས་ངས།།
འཛམ་གླིང་ཕྱི་ནང་གཉིས་ཀྱི་རྒྱན་གྱུར་བ།།
སྐྱེས་ཆེན་འགའ་རེའི་མཛད་རྣམ་བསྟོད་ལ་རངས།།
ཆེན་པོ་ཆུང་ངུར་འཛིན་པའི་སུན་འབྱིན་མཁན།།
ཆུང་ངུ་ཆེན་པོར་བལྟ་བའི་ལྷག་མཐོང་པ།།
རང་སེམས་ཆེ་ཆུང་སྙོམ་མཁས་ཞི་དུལ་ཅན།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
ཁེ་ལ་རྡོག་པས་རྫི་བའི་རང་རློམ་ཅན།།
གྲགས་པ་རྩ་ནས་གཅོད་པའི་ང་རྒྱལ་ཅན།།
ཁེ་གྲགས་གཉིས་ལས་རྒྱལ་བའི་སྐྱེས་ཆེན་གང་།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
ནམ་མཁའ་གུར་དུ་ཕིབས་པས་སེམས་རྒྱ་ཡངས།།
ས་གཞི་གདན་དུ་བཏིངས་པས་བློ་སྤོབས་ཆེ།།
སེམས་ཅན་མ་རུ་བལྟ་བའི་ལྷག་བསམ་ཅན།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
བདེན་པ་ཚད་མར་འཛིན་པའི་དྲང་བདེན་པ།།
རྒྱུ་འབྲས་ཐོད་དུ་བཅིངས་པའི་འཕྲིན་ལས་ཅན།།
སེམས་ཀྱི་ཆེ་ཆུང་གཞལ་མཁས་ཡུལ་གྱུར་བ།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
ཞི་བདེ་བྱང་སེམས་སྒྲོག་པའི་བདེན་སྐྱོང་པ།།
འཐབ་འཁྲུག་རྩོད་སློང་འགོག་པའི་རྒྱལ་མཚན་ཆེ།།
གནམ་ས་གཞི་གཅིག་སྦྲེལ་བའི་མཐུ་རྩལ་ཅན།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
མ་རིག་སེམས་ལས་སྐྱེས་པའི་དུག་གསུམ་དང་།།
ཕྱི་ནང་ཁྲག་གི་མཚོ་ལ་རོལ་བ་སོགས།།
མ་ལུས་དུག་གི་རྩ་བ་འཇོམས་པའི་དཔལ།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
སེམས་ཀྱི་རྒྱལ་མོའི་ཚུར་སྣང་སྒྱུ་མའི་གར།།
སེམས་པའི་སྟེང་འོག་ཀུན་ཏུ་རྒྱུ་བའི་རླབས།།
སེམས་ཀྱིས་འདུལ་བ་མཚུངས་མེད་ཉི་མའི་བུ།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
སྟོན་མཇུག་ལོ་མ་སེར་པོའི་འཇིག་རྟེན་དུ།།
མཐིང་མདོག་སྣུམ་ཚོན་བྱུགས་ལ་རྔམ་པ་ཡིས།།
རང་ལུས་ཚོན་རྩིར་ཕབ་པའི་རྣམ་ཐར་ཅན།།
འཇིག་རྟེན་ཕྱི་ནང་གཉིས་ཀྱི་བརྟུལ་ཕོད་པ།།
མདོར་ན་བདེན་རྫུན་བཟང་ངན་ལེགས་འབྱེད་པའི།།
རྒྱུ་འབྲས་རྒྱ་མའི་ཕྱོགས་སུ་མ་ལྷུང་བ།།
མགོ་ནག་མི་ཡི་ཁྲོད་ན་དུ་མཆིས་པ།།
གཞན་ལ་མ་འདྲི་རང་གི་སེམས་ལ་དྲིས།།
རྩོམ་ཁུངས། ༢༠༠༨ལོའི་གངས་རྒྱན་མེ་ཏོག