སྟོན་མཇུག་རླུང་བུ་ཡི་སྐྱོ་དབྱངས་དྲག་པོས།།

དབེན་པའི་ལུང་ཁུག་དེ་ཁྱུར་མིད་བྱས་ཀྱང༌།།

གཡང་དཀར་མ་བུ་ཡི་བྱམས་བརྩེའི་འབའ་སྒྲ།།

དགུན་འཁྱག་བུ་ཡུག་གི་ཀློང་ནའང་ལྷང་ལྷང༌།།

ཁ་བ་ནག་པོ་དེ་འབབ་ཐེངས་གཅིག་ལ།།

འཛིན་མའི་མཛེས་ཞལ་དེ་བཙན་གྱིས་བསྒྲིབས་ཀྱང༌།།

ལྷོ་བཞུད་ཁུ་བྱུག་གི་གསུང་དབྱངས་སྙན་མོ།།

ཁྲོན་པའི་སྦལ་བས་ཀྱང་རེ་ཞིང་སྒུག་ཡོད།།

འདང་ཅན་བུ་མོ་ཡི་འཛུམ་མདངས་ལྷོད་པོས།།

སྲིད་པའི་མཛེས་པ་ཀུན་ཁྱེར་ནས་སོང་ཡང༌།།

རེ་བཞག་ཉི་ཟླ་ཟུང་མཁའ་ལ་ཤར་དུས།།

འཆར་ནུབ་འཕེལ་འགྲིབ་ཀྱི་ཆོས་ཉིད་བརྗེད་འགྲོ།།

མཚོན་ཆ་མི་མངོན་པའི་གཡུལ་ས་འདི་ནས།།

བརྩེ་མེད་བྱམས་སྐྱོང་གི་ཟློས་གར་འཁྲབ་དུས།།

ལྷ་ཁང་མཐོན་པོ་རུ་འཁྲིགས་པ་མེད་ན།།

མཛོད་ཁང་ཆེན་པོ་དེའི་མུ་གེར་ཅི་སྐྱོན།།

རྨི་ལམ་ལྗང་ཁུ་ལ་གཤོག་པ་ཐོགས་ཏེ།༌།

ཕུགས་ཀྱི་མཁའ་དབྱིངས་ལ་དུངས་པས་བསྙེག་དུས།།

གཏན་འདུན་དུང་ཟླ་དེ་གར་ཕེབས་ཆ་མེད།།

མུན་པའི་ལག་ཟུང་འདི་མི་བསྲིངས་ཀ་མེད།།

དཀར་ནག་དབྱེར་མེད་ཀྱི་གྲུ་ཀ་འདི་ནས།།

གཡང་ཟོག་འབྲི་མོ་དེ་མགོ་འཁོར་བྱུང་ཡང༌།།

ཕ་ཞིང་ཐེམ་པ་ཡང་རྨོ་བའི་གཏམ་དཔེ།།

ལམ་མདོའི་སྤྲང་པོས་ཀྱང་བློ་ན་བཟུང་འདུག།

                                          ༢༠༠༠ལོའི་ཟླ༤པའི་ཚེས༢༤ཉིན་ལན་གྲུ་ནས།

རྩོམ་ཁུངས། རྨ་ཆུའི་སྙན་ངག