འབྲལ་མེད་བརྩེ་བས་སྐྱོངས་པའི་བླ་མ་དང་དམ་པ།  །

ཡུན་རིང་བཟླས་བརྗོད་བརྩོན་པའི་རི་ཁྲོད་ཀྱི་བྱ་བྲལ།  །

མགུར་མའི་མགྲིན་དབྱངས་རྫོགས་པའི་གངས་ཅན་གྱི་མཁས་དབང༌།  །

སྙན་ལུང་དར་གྱི་མདུད་པ་ཅུང་ཙམ་རང་གཡོར་དང༌།  །

འཛམ་གླིང་ཟླུམ་པོའི་རི་རྒྱལ་ལྷུན་པོ་རུ་ཆགས་པའི།  །

ས་ཆེན་གོར་མོའི་ཏོག་གི་ཤེལ་དཀར་གྱི་ལྗོངས་ཆེན།  །

ཆོལ་གསུམ་གཞོན་ནུར་ཕུལ་བའི་དྲི་མེད་ཀྱི་ཁ་བཏགས།  །

མི་གཙང་གྲིབ་ཀྱིས་མ་བསླུས་དྲང་བོ་རུ་འབུལ་ལོ།  །

སྔོན་བྱུང་མེས་པོའི་ཞལ་སྒྲོས་བུམ་བཟང་གི་ཁ་ཡིས།  །

ལུང་རིག་བདུད་རྩིའི་ཆར་རྒྱུན་སྐལ་བཟང་དུ་འཇོ་ཡང༌།  །

བསླབས་ནས་རང་སྟེང་ལེན་པའི་བུ་རྒོད་ཀྱི་ཁྲོད་ན།  །

ལག་ལེན་མཐིལ་ཏུ་ཕྱིན་པའི་དཔའ་བོ་ཞིག་མི་འདུག  །

ཚན་རྩལ་འཕྲུལ་ལ་དུས་ངན་སྙིགས་མ་རུ་འབོད་ཅིང༌།  །

སྲོལ་བཟང་གསར་བར་བདུད་ཀྱི་ནད་ཡམ་དུ་སྙམ་འདུག  །

ཡབ་མེས་གོང་མའི་རེ་བའི་ཕྱིར་མིག་གི་རྡོག་ཕྲེས།  །

ང་ཚོའི་ཕྲག་ཏུ་གཏོད་པའི་རིན་ཐང་ཡང་མི་འདུག  །

གཞན་སྐད་བཤད་ན་ཤར་མཆོངས་ཆུ་བོ་དང་འདྲ་འདུག  །

རང་སྐད་སྨྲ་ན་ནེ་ཙོའི་བཟླས་བརྗོད་ལས་མི་འདུག  །

ར་མིན་ལུག་མིན་མགོ་རྣ་ཡ་མ་རུ་བསླེས་པའི།  །

བོད་པའི་བུ་དང་བུ་མོའི་ལམ་བུ་ཡང་བོར་འདུག  །

སྤྱང་ཀི་ལུག་ལ་བརྫིས་པའི་གཏམ་རྒྱུད་ཅིག་ཡོད་མོད།  །

གཟིག་པགས་བོང་བུར་བཀབ་པའི་འཚར་གཏམ་ཡང་མངའ་བས།  །

དོན་མིན་ལས་ཀྱི་བགྱི་བས་རང་མགོ་དེ་བསླུས་པའི།  །

ན་གཞོན་ཁ་ཁུར་དཔའ་བོ་ལག་རྡུམ་དང་འདྲ་བྱུང༌།  །

མ་བསླབ་ཐ་ཤལ་སྐྱེས་པོ་སྤྱི་བོ་རུ་བཀུར་ཞིང༌།  །

བསླབས་ནས་སྦྱངས་པའི་མཁས་པ་བླུན་པོ་རུ་བལྟ་བའི།  །

གངས་ཅན་འགྲོ་བའི་ཆགས་སྡང་མ་རིག་གི་གོམས་གཤིས།  །

བསྒྱུར་ནས་ཚངས་པའི་ཐིག་བཞིན་འཐེན་མཁན་ཡང་མ་བྱུང༌།  །

རྟོགས་པ་ལྷ་དང་མཉམ་པའི་མི་རིགས་ཀྱི་སྨྱུག་འཛིན།  །

སྤྱོད་པ་འདྲེ་ལས་རྩིངས་པའི་རྣམ་ཐར་ཡང་འཁྲབ་སྟེ།  །

དོན་མེད་ཚིག་རོ་གཅིག་གིས་འཇིག་རྟེན་ཡང་བསླུས་པས།  །

མི་རིགས་འཚར་ལོངས་འབྱུང་བའི་གོམ་ཁ་དེ་འཕྱུག་བྱུང༌།  །

མེད་པོ་མུག་གིས་སྐམ་པའི་དབང་ཤེད་ཀྱི་ལོ་ཟླ།  །

ཕྱུག་པོ་ཤ་ཡིས་རྒྱག་པའི་དུས་རབས་ཀྱིས་བསྐོར་ཏེ།  །

ཚན་རིག་ཉི་ཟླ་བསླབས་ནས་ལག་ལེན་དུ་འཁྱོངས་མཁན།  །

གངས་ཅན་སྐྱེ་དགུའི་ཁྲོད་ན་གཅིག་གཉིས་ལས་མི་མངའ།  །

ཆོས་སྲིད་དུང་གི་སྒྲ་ཆེན་དུས་རབས་སུ་འཁོར་ཞིང༌།  །

སྣ་མང་ཇུས་བཟང་གྲོང་དང་གྲོང་སྡེ་རུ་བསྟར་བས།  །

ཤེས་རིག་ཁྱབ་གདལ་ཡོང་བའི་འགག་རྩ་རུ་ལངས་ནས།  །

མི་རིགས་ཡར་རྒྱས་འགྲོ་བའི་གནད་འགག་རང་འཚོལ་རོགས།  །

རྩོམ་ཁུངས། ངེད་དྲ་བ།