ཁ་བའི་རང་གཤིས་དཀར་པོ་རྒྱུན་དུ་བྲལ།།

སྤྲིན་པའི་གཡོ་འགུལ་དྲག་པོ་དགྲ་རུ་སྡང༌།།

ལོག་རྟོག་འཁྲུལ་སྣང་ཆེན་པོའི་སོ་མཚམས་ནས།།

གཞུང་དྲངས་གླེན་པའི་བུ་ལོ་བགྲོད་དམ་ཅི།།

མུན་པའི་རྔམ་ཁ་འཐུག་པོ་མཁའ་དང་མཉམ།།

སླད་མེད་ལྷག་བསམ་དཀར་པོ་མེ་རུ་བསྲེགས།།

སྦྱིན་པའི་དྲིན་ལན་ལེགས་པོ་དུག་ཆུར་སེམས།།

མདུང་རྩེ་རྣོན་པོའི་ཟུར་ཁ་གཞན་ལ་བསྣུན།།

ཚུལ་འཆོས་ཀི་ཅོའི་རླབས་ཕྲེང་བྲག་ཆར་འཁོར།།

བརྩེ་སེམས་འོ་སྤྲིའི་མངར་ཁ་རིམ་གྱིས་ཡལ།།

རླུང་ནག་འཚུབ་མ་རྒོད་པོའི་རི་ཀླུང་ནས།།

 རེ་ཐག་ཆད་པའི་སེམས་ངལ་རྡོ་ལ་བྲིས།།

མཐུན་སྒྲིལ་སློབ་གསོའི་ཕྱོགས་ལ་འདུ་ཤེས་བྲལ།།

དུག་གསུམ་སྨྱོན་པའི་གཤིས་ལ་བྲེལ་འཚབ་ལངས།།

བསམ་བློའི་ཁ་ཕྱོགས་བོར་བའི་ཕྱོགས་ལྷུང་བ།།

ཁྲེལ་མེད་མི་རུ་གྱུར་བ་ཤེས་སམ་ཅི།།

ཕྱི་ལ་གོས་གསར་གྱོན་པས་ལང་ཚོ་མཛེས།།

ནང་དུ་སྤྲུལ་ནག་སྟོང་གིས་ཟློལ་གར་སྒྱུར།།

གཡོ་བཅོལ་ནོར་ཝ་མོའི་ལྟ་བ་ཐ་ཤལ་པ།།

མིག་ཟུང་ལག་པས་བཀབ་ཀྱང་བརྗིད་ཐབས་བྲལ།།

འཇིག་རྟེན་བསླུ་བྲིད་ཐེབས་པའི་གཞི་མ་ཉིད།།

རྣམང་གཡེང་ལེ་ལོར་གཡེང་བ་སྒྱུ་མའི་གཤིས།།

དར་རྒྱུད་རིང་མོ་འཕར་རྩར་བཀོད་པ་ནས།།

སྨྱུག་ཆུང་འཛུམ་རྩེར་བཟུང་སྟེ་བྲོ་འདི་འཁྲབ།།

རྩོམ་ཁུངས། ༢༠༠༩ལོའི་འོད་འབར།