གྲོགས་བཟང་གཡོ་སྒྱུ་དབེན་པའི་དཔག་བསམ་ལྗོན།།

དམར་ཆུང་སེམས་པ་ཕྲ་མོ་དྲན་ཤིང་ཉིད།།

ཁེར་རྐྱང་གོམ་སྒྲས་རི་ལུང་དཀྲོག་བཞིན་དུ།།

རྒྱང་བཞུད་ཕྱི་མིག་ཁྲོད་ན་བསྐྱུར་དགོས་བྱུང་།།

ཉེར་གཅིག་བུ་མོ་བཞུད་པའི་རླབས་འོག་ན།།

རིག་པའི་རྩོད་ངག་ལྡིར་བ་གློག་བཞིན་འཁྱུག།

རྙིང་ཞེན་མཁྲེགས་འཛིན་མཐོ་བའི་ལྟ་བ་འདིས།།

ཅོལ་ཆུང་སེམས་པའི་ཆུ་བོ་བཙན་གྱིས་བསྐྱིལ།།

ངུར་སྨྲིག་མཚམས་སྤྲིན་མདངས་ཀྱིས་རབ་བརྒྱན་པའི།།

ཤེས་བྱ་བདུད་རྩིའི་ཆུ་གཏེར་རླབས་ཕྲེང་གཡོ།།

འཆད་རྩོད་རྩོམ་པའི་མངའ་དབང་བསྒྱུར་བའི་གྲོགས།།

མཛའ་བརྩེ་དུངས་སེམས་མེ་ཏོག་དུས་ཀུན་བཞད།།

བགྲང་བྱ་ཉེར་དྲུག་ཉིན་བྱེད་ཚད་ལས་འདས།།

སེམས་སྟོང་ཁོ་བོ་ན་ཟུག་གྲངས་མེད་ཅིག།

རང་གིས་རང་ལ་སྙིང་གཏམ་བརྗོད་པར་མཐར།།

ད་གཟོད་གཤོག་ཟུང་གཉོམ་པོ་རིག་པར་གཏད།།

རེ་སྨོན་ཁུ་བྱུག་མོན་ཡུལ་ཕྱོགས་སུ་འཕུར།།

རྗེས་ལུས་འཇོལ་མོ་ང་རང་ཁེར་རྐྱང་ཡིན།།

གངས་དཀར་རི་བོར་འཁྱིལ་བའི་བརྩེ་སེམས་ཅན།།

གཤིས་བཟང་ལྷག་བསམ་གངྒའི་རྒྱུན་ལ་འགྲོག།

ཟླ་བ་ལྷ་མོས་འཛུམ་དཀར་མེ་ཏོག་བཞད།།

ས་སྲོད་མཚམས་སྤྲིན་ཆགས་པའི་དམར་མདངས་འོག།

སེམས་ཀྱི་ཀློང་ལས་བརྡོལ་བའི་ངག་རིག་ཕྲེང་།།

ལྔ་རིག་གྲོགས་དག་དགྱེས་པའི་མཆོད་སྤྲིན་ཡིན།།

རྩོམ་ཁུངས། ༢༠༠༩ལོའི་གངས་རྒྱན་མེ་ཏོག