བློ་བཟང་རྒྱལ་བའི་བསྟན་སྲིད་ས་ཆེན་བཏེགས།།

འགྲོ་ཕན་འཕྲིན་ལས་ལྷུན་གྲུབ་ཆོས་ཀྱི་ཆར།།

བསིལ་ལྗོངས་བདེ་སྐྱིད་ཞིང་སའི་དབུགས་འབྱིན་ཅིང་།།

བདུད་བཞིའི་གཡུལ་རྒྱལ་རྒྱལ་མཚན་བསྒྲེངས་ལ་འདུད།།

ཕན་བདེ་ཀུན་འབྱུང་ནོར་བུ་འོད་པོ་ཆེ།།

རེ་ཞིག་ཆུ་ལྷའི་རྒྱ་མཚོར་བྱིང་བ་ན།།

སྲེད་མེད་བུ་ཡི་སྟོབས་ཀྱིས་སླར་བཏོན་ཏེ།།

ཤར་རིའི་རྩེ་མོར་བཀོད་པའི་བཀའ་དྲིན་དྲན།།

སྔོན་བྱོན་སྟོན་པའི་རྣམ་ཐར་ལྷུར་བཞེས་ཏེ།།

དམྱལ་བའི་ཤིང་རྟ་འདྲེན་ཐག་ཕྲག་པར་བླངས།།

ལྕགས་སྲེག་གཞི་ལ་གོམ་པ་བདེ་བར་སྤོར།།

མི་འཇིགས་ངར་སྐད་ལོག་སྒྲུབ་རྫུན་ཕུག་གཏོར།།

ས་ཆེན་འཁྱག་དར་རིམ་དགུས་བཏུམ་པའི་ཚེ།།

ལྷག་བསམ་སྙིང་སྟོབས་ཚ་ཟེར་འབུམ་སྤྲོས་ཏེ།།

རིག་གནས་འབྲུ་དྲུག་མྱུ་གུ་སླར་འབུས་པའི།།

དཔྱིད་དཔལ་འགུགས་པའི་ལེགས་ཚོགས་རྟེན་འབྲེལ་བསྒྲིགས།།

རང་དོན་སྒྲུབ་ལ་ནམ་ཡང་མི་རེ་ཞིང་།།

གཞན་དོན་སྲོག་ལ་བབས་ཀྱང་མི་གཏོང་བའི།།

རྒྱལ་སྲས་དཔའ་བོའི་སྤྱོད་པ་ལེགས་སྐྱོང་བའི།།

མཛད་རྗེས་རྡོ་རིང་མི་བརྗེད་དྲན་པར་ཚུགས།།

མཆོད་པ་ཀུན་གྱི་ནང་ནས་མཆོག་གྱུར་བ།།

བཀའ་བཞིན་སྒྲུབ་པའི་མཆོད་པར་གསུངས་པའི་ཕྱིར།།

ཚངས་པའི་དབྱངས་ཀྱིས་སྙིང་ལ་བསྩལ་བའི་གསུང་།།

ཇི་བཞིན་སྒྲུབ་པའི་མཆོད་པས་རྗེས་དྲན་ཞུ།།

ཞེས་པ་འདི་ནི༧པཎ་ཆེན་བཅུ་བ་མཆོག་གཟུགས་སྐུའི་བཀོད་པ་བསྡུས་ནས་ལོ་ཉི་ཤུ་འཁོར་བའི་དྲན་སྟོན་དུས་དེབ་ངོར་འགོད་རྒྱུའི་ཚིག་འགའ་འབྲི་དགོས་ཞེས་སྐུལ་ངོར་དོར་ཞི་བས་བྲིས།

རྩོམ་ཁུངས། སེང་དཀར་ཞབས་རྗེས།