སྨིན་མ་གཡོ་བ་འཇའ་ཚོན་རིས།།

ཁྲག་གི་མཆུ་སྒྲོས་འགུལ་བ་ཡིས།།

ས་སྟེང་གྲོག་མ་ཟས་ཁུར་བ།།

འཁྱོམ་ཞིང་འགྱེལ་བའི་གར་ལ་རོལ།།

ཕར་ལ་བྲག་གི་གཟེངས་མཐོ་ཞིང༌།།

ཚུར་ལ་ནགས་ཀྱི་འབྱམས་ཆེ་བའི།།

སྐྱིལ་ཀྲུང་ཏིང་འཛིན་ལ་ཞུགས་པའི།།

ལྕང་ལོ་ཅན་དེས་ཆོས་གླུ་འགུགས།།

བྱ་ཆེན་གཤོག་པ་རྣག་གིས་སྦྲན།།

རླུང་ཆེན་འཚུབ་ཤ་སྤྲིན་ལས་མངོན།།

འདམ་ལ་བྱིངས་པའི་ཅེ་སྤྱང་གིས།།

སྡུག་གི་ངུ་འབོད་ཅི་ཡང་སྒྲོག །

སོ་སྒྲ་དྲག་ཏུ་འཆའ་བ་ཡིས།།

གནམ་ས་ལྷན་དུ་བསྡེབས་པ་དང༌།།

ཁྲོ་བའི་སྡང་མིག་བགྲད་པ་ཡིས唰

སྙིང་ཁམས་འགས་པ་སུ་ཞིག་ཡོད།།

དཀར་པོ་དངུལ་གྱི་ལྷེབ་ཆེན་དེ།།

ཟླ་བ་མཁའ་ནས་ལྷུང་ངམ་ཅི།།

དམར་པོ་དྲོད་ཀྱིས་འགངས་པ་དེ།།

ཉི་མ་མཚོ་རུ་ཟགས་སམ་ཅི།།

ཐེ་ཚོམ་དྲ་བའི་གྲུ་ཁུད་དུ།།

རུས་སྦལ་ལེབ་མོས་འགྲེ་ལོག་རྒྱག །

ཆུ་སྲིན་མཇུག་མའི་འཕྱོ་སྟབས་ལས།།

བཀྲེས་པའི་ཁ་ཆུ་མཚོ་ལ་འདྲེས།།

མཚོ་རླུང་བགད་པའི་ལག་ཟུང་གིས།།

ནམ་མཁའ་སྔོན་མོར་འགྲམ་ལྕག་བྱིན།།

ཟུག་གཟེར་གཏིང་དུ་ལྷུང་བ་ན།།

མཆི་མའི་ཐིགས་པ་རྩྭ་ལོས་ཁྱེར།།

འཇའ་ཚོན་འཁྱོག་པོའི་གུར་ཁང་དུ།།

སྤྲིན་པས་སྤྲིན་པ་དམ་དུ་འཁྱུད།།

ཉི་འོད་ཟེར་མ་གསལ་བ་ཡིས།།

སྐྱེངས་པའི་གདོང་ལ་ཁྲག་མདངས་བབས།།

རྗེ་བོའི་བཀའ་ལུང་སྣུམ་པ་དང༌།།

འབངས་ཀྱི་འཛུམ་ཆུང་ཞིམ་པ་ན།།

རང་གི་སྐྲ་ལོའི་རྩར་འཐམས་ནས།།

ཆོ་ངོ་འདོན་དེ་གདོན་གྱིས་བརླམས།།

འབུ་ནག་འགུལ་བའི་དྲག་ཤུགས་གཟིས།།

ལྷུན་པོའི་ཚོགས་ཀྱང་ཡོམ་ཡོམ་འདར།།

རི་བོང་བྲོས་པའི་རྗེས་ཤུལ་དུ།།

རྡུལ་གྱི་ཤ་མོ་མེད་འདི་ཅི།།

གནག་རྫིའི་གཞས་ལ་ལྷོད་ཆགས་ཤིང༌།།

སྤྲིན་གྱི་རྒྱུ་ཚུལ་ལྷོད་ལ་བབས།།

དུག་གི་གྲོང་ཁྱེར་འབར་བ་དེས།།

ས་གནམ་གཉིས་ཀ་བསྣད་ནས་སོང༌།།

རི་དྭགས་ཤ་བའི་ཆགས་སྲེད་སྒྲས།།

ཡུ་མོའི་ཁྱུ་ཚོགས་བསྐོར་ཅིང་འཁོར།།

ཚ་བས་གདུང་བའི་གླང་བོ་ཆེ།།

མཚོ་མོའི་དབུས་སུ་གཟའ་སྐོར་རྒྱག །

སྲ་མཁྲེགས་འཁྱག་གི་གས་སྲུབས་སུ།།

ཉ་མོའི་མིག་ཆུ་དར་དུ་སྦྲུམ།།

བཙག་རླུང་ཁ་བའི་ཡང་ཤོད་དུ།།

ཕྱེ་ལེབ་ཁྲ་མོའི་གཤོག་པ་འཐོར།།

རྒྱུངས་པ་ལེབ་མོའི་ཡང་སྟེང་དུ།།

ལྕགས་ཀྱིས་དྲབས་ཤུལ་རྨ་ཡིས་བཟུང༌།།

མི་ཆེན་ཁྲོས་པའི་ཁ་ཕོ་དེ།།

སུམ་སྒྱེད་སྟེང་ནས་མེ་ཡིས་གཞིལ།།

ཕར་ལ་བརྩེ་བའི་གླུ་བླངས་པ།།

ཤ་འཁོན་སློག་པའི་དོ་ཡ་མིན།།

ཚུར་ལ་མདུང་མོས་འོ་བྱེད་པ།།

ཁྲག་དྲོན་གཞིབས་པའི་དོད་དུ་མིན།།

དེ་ཕོས་སྐད་ངག་འདར་བ་ལ།།

བུང་བུས་རྔ་འཚུབ་རྒྱུན་ཆད་མེད།།

ཁ་ཆར་དྲག་ཏུ་བྱོ་བ་ཡིས།།

འཇག་མ་སྐྱ་བོ་སྦངས་ནས་མིན།།

རྒྱ་སྟག་ངར་སྐད་སྒྲོག་པ་ཡིས།།

ནགས་ཀྱི་སིལ་ཏོག་གཏོར་ན་ཡང༌།།

འཕོང་འདྲེ་ཝ་རྔ་རྫོབ་པོ་འདིས།།

དོམ་ནག་ཁྲོས་པར་བཞད་གད་སློང༌།།

མཁའ་ཆེན་སྤྲིན་ནག་བམ་ཁས་བསྒྲིབས།།

འབྲུག་ལྡིར་དྲག་ཆར་རྔམ་གྱིས་འཇོ།།

མཛེས་པའི་འཇའ་ཁྲ་སྐ་རགས་སུ།།

རློམ་པའི་མི་ཡི་ཞེ་རྩ་གཉོམ།།

མོན་གྱི་ཁུ་བྱུག་ལྷང་ལྷིང་གྲགས།།

དྲན་པས་གདུང་ནས་ལྷང་ལྷིང་གྲགས།།

ལྷང་ལྷིང་གྲགས་པའི་འཇོལ་མོ་ཡང༌།།

བྱང་ཕྱོགས་ནགས་ན་ལྷང་ལྷིང་གྲགས།།

བྱང་བགྲོད་རྟ་མཆོག་རྨིག་སྒྲ་ཡིས།།

ས་གཞིའི་གདོང་ལ་ཁུ་ཚུར་བསྣུན།།

ཉི་མ་སེར་པོས་སྐྱོ་ཤས་ཀྱིས།།

སྤྲིན་པ་བཞུས་ཏེ་ཆར་དུ་བསྙིལ།།

བྲག་གི་གཤོག་པ་བརྐྱངས་པའི་རྩེར།།

བྱ་གླག་སྲེ་བོས་ལྡིང་སྐོར་རྒྱག །

ཧམ་ཅན་རྔོན་པའི་བོའུ་ཁ་ན།།

དུ་བ་སྔོན་པོས་ཀྱུ་ལོག་རྒྱག །

རྩོམ་ཁུངས། ངེད་དྲ་བ།