མངོན་གྱུར་རྟགས་ཀྱི་བདེན་པ་ངོ་སྤྲད་ཀྱང༌།།

ངམ་ནག་བཞིན་གྱི་གཉེར་མ་མི་སངས་པ།།

མདོར་ན་ཕྲག་དོག་ཅན་གྱི་སྐྱེས་བུ་དེའི།།

དགའ་བའི་དངོས་པོ་གཞན་གྱི་རྒུད་པ་ཉིད།།

ཕྲག་དོག་ཁྲག་གིས་མྱོས་པའི་ཨུ་ཚུགས་སྟག།

འཇིགས་པའི་ང་རོ་སྒྲོག་པའི་ཚང་ཚིང་ན།།

གཅིག་པུར་ལུས་པའི་བདེན་པའི་བུ་ཆུང་ལ།།

ཤེས་རབ་ཅན་གྱི་སྙིང་རྗེའི་ཡུལ་དུ་དགོངས།།

བླུན་པོ་རང་གི་རྗེས་སུ་མི་འབྲང་ཡང༌།།

རང་ཉིད་བླུན་པོའི་རྗེས་སུ་མི་འབྲང་བ།།

དེ་ནི་མཁས་པའི་དམ་ཚིག་དང་པོ་སྟེ།།

སྲོག་ལ་བབས་ཀྱང་འབད་པས་སྲུང་བར་གྱིས།།

སིངྒ་ལ་ཡི་གནས་བརྟན་སྡེ་པ་དང༌།།

གངས་རིའི་ཁྲོད་ཀྱི་ཡོད་པར་སྨྲ་བ་གཉིས།།

སྟོན་པ་གཅིག་གིས་བསྐྱངས་པའི་སློབ་མ་སྟེ།།

བཅོ་བརྒྱད་སྡེ་པ་ནུབ་པའི་ལྷག་མ་ཉིད། 

རྩོམ་ཁུངས། མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་བསྒྲིགས། པོད