ཁྲུང་ཁྲུང་ལ་རེ་བ།

སྨུག་པ་བན་བུན་རྫ་རིའི་མགུལ་ལ་འཁྱུད།།

ཆུ་ཕྲན་གྱ་གྱུ་མེ་ཏོག་གསེབ་ན་འཚེར།།

རྫི་གླུ་སྙན་མོ་བྲག་ཅ་བརྒྱུད་ནས་འོངས།།

སྤྲོ་དགའི་སྣང་བ་འཁྱམ་པོ་གང་དུ་སོང་།།

སྙན་ངག་ཁོ་ནས་མི་ཚེ་བསྐྱལ་བ་དེ།།

གྲགས་འབྱོར་དགའ་བའི་འདེབས་པའི་ས་བོན་མིན།།

སེམས་འདུན་རིང་ནས་བཅོལ་བའི་ལྷ་བྱ་ཁྱེད།།

ད་དུང་མ་བསླེབས་སེམས་པ་གདུངས་པས་ཡིན།།

  ལྷ་ལྡན་གཙུག་ལག་ཁང་གི་མདུན་དུ།

རྩམ་པའི་བསུང་ཞིམ་མཁའ་དབུགས་ཁྲོད་དུ་ཐིམ།།

རྒྱ་ཕིབས་སེར་པོས་ཉི་གཞོན་གྲོགས་སུ་བཀུག།

ལག་ཟུང་ཐལ་མོ་སྦྱར་ནས་ཕྱག་གསུམ་འཚལ།།

ཡིད་བཞིན་ནོར་བུས་བདག་ལ་གཟིགས་ཡོད་སྙམ།།

ཚོང་གྲོགས་བུ་མོས་ལན་གསུམ་བོས་པ་ན།།

ཨམ་ཕྲག་སྟོང་བ་ཡང་ཡང་སྔོག་འདོད་སྐྱེས།།

བར་སྐོར་མི་ཚོགས་གྲས་སུ་འཛུལ་བ་ན།།

ང་རང་ཆུ་ཁར་གཡེང་བའི་ལོ་མ་ཞིག།

  སྙན་ངག་པའི་སེམས་ཁམས།

མཛེས་མའི་ཞབས་རྗེས་བྲལ་བའི་ཁང་ཆུང་དུ།།

ནམ་ཟླ་དགུན་ལ་སླེབས་པའི་སྣང་བ་མེད།།

དུས་བཞིར་འཛུམ་པའི་བུམ་སྐྱེས་མེ་ཏོག་དེ།།

སེམས་ཀྱི་སྐྱོ་ངལ་སེལ་བའི་མཛའ་མོ་ཡིན།།

ཉིན་དཀར་རོལ་དབྱངས་ལྟ་བུའི་དཔེ་ཀློག་གིས།།

དབེན་འཇགས་སྟོང་གི་རྐུན་པོ་རྒྱང་དུ་བྱེར།།

མཚན་དུས་ཟླ་བས་རྟོག་ཚོར་གནང་བ་ན།།

ཝང་བེ་དབེན་པར་དགྱེས་པའི་སྙིང་བོ་རྟོགས།།

  དཔྱིད་མགོའི་ཁ་བ།

དཔྱིད་དུས་རྨི་ལམ་ཟ་ཟི་རྒྱུན་ཆད་མེད།།

སྐྱ་རེངས་སྣང་བ་དཀར་པོ་སླེབས་ན་ཡང་།།

བྱ་བྱེའུ་སྟོང་གི་སྐད་སྙན་མ་ཐོས་ཚེ།།

མལ་ལས་སད་པའི་གོ་སྐབས་སུ་ཡིས་གནང་།།

དྲ་མའི་ཡོལ་བ་མཐུག་པོ་ཕྱེས་པ་ན།།

སྐྱ་ཐིང་ཐིང་གི་་ས་གཞི་གང་ལ་བྲོས།།

ཁ་བའི་གོས་དཀར་བཀླུབས་པའི་ནོར་འཛིན་མ།།

བག་གསར་བཞིན་དུ་མིག་གི་བདུད་རྩིར་མངོན།།

རྩོམ་ཁུངས། ༢༠༠༦ལོའི་གངས་རྒྱན་མེ་ཏོག