ཁ་འཛིན་རྒྱབ་རྟེན་ལྷ་ཡི་སྟོབས་ལ་རེ།།

སེམས་སྦྱོང་ཤེས་རབ་རང་གི་རྩལ་ལས་དྲངས།།

བདེན་པའི་མྱུ་གུ་དྲང་མོའི་ཕྱོགས་ལ་གཟེད།།

རྭ་སྟོན་ཀུན་དགའ་སྐྱབས་ཀྱི་དྭངས་མར་འཛིན།།

དབེན་པའི་མལ་ན་ཏིང་འཛིན་མི་འདུག་པས།།

དྲན་པའི་འདུ་ཤེས་སྣང་ཡན་རྫ་ལ་བཏང་།།

དམར་སེར་མཚམས་སྤྲིན་འཚང་བའི་སྲུབས་ཀ་ནས།།

ང་ཡི་སེམས་ལ་ཞེན་ཆགས་དམར་པོ་བཀོད།།

གཙང་རིགས་ལྷ་ལ་མྱུར་མགྱོགས་མི་ཆེའམ།།

གསོལ་མཆོད་ཉུང་ངུས་ལྷ་སེམས་མི་ཚིམ་མམ།།

རངས་པའི་སྡེ་བ་ཞིག་གི་གཏམ་རྒྱུད་དེ།།

ཤི་གསོན་བྱེ་མའི་ལ་ཁའི་རྣམ་ཤེས་ཤིག།

བསམ་ཚད་ཐོབ་ན་སྙམ་པའི་ཧམ་སེམས་ཀྱིས།།

མུ་མེད་ཤེས་བྱ་ཆེན་པོའི་འདབས་ལ་བསྙབས།།

དྲན་ཚད་ཤོར་ཐལ་སྙམ་པའི་ཕམ་ཁ་འདིས།།

སྟོང་བ་སྟོང་རྐྱང་མཐར་གྱི་གནས་མལ་ལྷག།

ལྕི་མོའི་སེམས་པ་སྡུག་མོའི་མནར་གཅོད་ཅིག།

ཡང་མོའི་རླུང་ལ་བསིལ་བའི་རེག་བྱ་ཞིག།

འཇམ་པོའི་གོས་ལ་སེམས་པ་གླན་སྟངས་ཤིག།

འཇིག་རྟེན་མི་ཡུལ་མི་སེམས་ལད་མོ་ཞིག།

ཁྱོད་ནི་མཚམས་སྤྲིན་ཀློང་གི་འཛུམ་ལྡན་མ།།

འོད་ཟེར་སྟོང་གིས་བཟོས་པའི་མཁའ་སྤྱོད་ཅིག།

བདག་ནི་འདོད་ཆགས་བརྒྱ་ཡི་འདབ་མ་སྟེ།།

བརྩེ་བའི་འདབ་མ་མ་ལུས་ཁྱོད་ལ་བརྐྱངས།།

མི་ཚེའི་ཀྱོག་ལམ་ཕྲ་མོ་ཀླན་ཀས་བཟོས།།

མིག་ཆུའི་ཐིགས་པ་བར་དོའི་ཁམས་སུ་འཛར།།

སྣོད་འདིའི་ནང་རོལ་ནོངས་འགྱོད་བརྒྱ་ཡིས་གཅུན།།

བཅུད་འདིའི་རྟོག་འཁྲུལ་ཟ་ཟིའི་ཁམས་སུ་གཟེད།།

ཀྱི་ཧུད་ཡ་ཐོག་བསྐལ་བའི་བུ་ལོན་ཞིག།

བདག་ལ་སྙེག་ཏུ་ཡོང་བའི་སྲེད་ལེན་པའི།།

དོ་ནུབ་གཅེར་བུའི་ལུས་པོ་འདིར་ལྷགས་པས།།

དགའ་བའི་འཕྲུལ་གྱི་ནམ་མཁའ་སུ་ཡིས་འགེབས།།

ཁྱོད་ཀྱི་མཐའ་ལ་ལྷུང་བའི་མུ་སྟེགས་ང་།།

གཏན་ཚིགས་རིགས་པའི་སྒྱོགས་རྡོས་ཆེད་བསད་ཀྱང་།།

མཐའ་འདི་འགེམ་པའི་ཉི་མ་ཡོད་གྱུར་ན།།

འདི་ནས་མི་ལོ་སྟོང་གི་བགྲང་བྱ་དགོས།།

དེས་ན་འདི་སྣང་སྲིད་པའི་ཁམས་ཆེན་མོར།།

སེམས་ཀྱི་སྡུག་བསྔལ་སྐྱོབ་པའི་ལྷ་ཡོད་ན།།

རྨོངས་པའི་སེམས་ལས་རྐྱོང་བའི་མིག་ཆུ་འདི།།

སྙིང་གི་གྲོགས་ལ་ཁམ་གང་ལྡུད་རོགས་ཀྱིས།།

རྩོམ་ཁུངས། ༢༠༠༩ལོའི་གངས་རྒྱན་མེ་ཏོག