ལྷོ་སྤྲིན་ནག་པོས་ནམ་མཁའ་གློ་བུར་བསྒྲིབས།།
འཇགས་མེད་འཚུབ་མས་ཁོར་ཡུག་སྡུག་ལ་སྦྱར།།
སེམས་པ་ཡར་འགྲོ་ཞིག་གི་ནང་རོལ་ནས།།
འཇག་མའི་ཤུགས་གླུས་དོན་མེད་ཡིད་སེམས་དཀྲུགས།།

འཛིན་མའི་ལྟོ་བར་ཚན་རིག་མཚོན་གྱིས་གཤག།
ན་ཟུག་འཁུན་སྒྲས་ལྷ་ཀླུ་གཉན་གསུམ་དཀྲོགས།།
ཆུ་མོའི་ཀློང་ལ་ངེས་མེད་མདའ་མོ་འོ་འཕངས།།
ཁྲག་གི་ཐིགས་པས་གཙང་པོའི་བཞུར་རྒྱུན་བཅད།།

གྲམ་པའི་གཞུང་ན་ཕོ་རོག་སྟོང་སྐད་འབྱིན།།
བྱེ་མའི་ཐང་ལ་ཉ་མོས་གཤོག་རྗེས་དཔར།།
འབྲོང་ཁྱུ་གཤར་བའི་རི་ལམ་སྐྱ་བོ་ལ།།
ཤ་ཁྲག་གཞིབ་མཁན་དམུ་རྒོད་རྔོན་པ་སྐུང༌།།

རོ་བོའི་སུལ་ན་ནགས་ཚལ་མང་པོ་འགྱེལ།།
རི་སྒང་ཡོད་ཚད་བྲག་ཐེམ་སྟོང་བའི་གཟུགས།།
རི་བོ་རྒས་པའི་སྐྱོ་སྡུག་འཕྲང་ལམ་ནས།།
རི་དྭགས་སྐོར་ཁྱུ་བས་མཐའི་ཡུལ་ལ་དེད།།

ཧམ་སེམས་སོག་ལེ་ལྗོན་པའི་ཚལ་ན་འཁོར།།
རྣོ་གཅོད་སྟ་རེ་ནགས་མའི་ཀློང་ལ་གཏད།།
འཇིག་རྟེན་ཞི་བདེ་བཅོམ་པའི་སྲིན་པོ་འདིས།།
སྐྱེ་རྒུའི་སྙིང་ལ་སྡུག་གི་མུན་པ་བསླངས།།
གནའ་བོའི་རྐང་རྗེས་ནག་པོའི་ཉག་ག་ལ།།
རྗེས་དྲན་རྡེའུ་འབུམ་མཆོད་རྟེན་རི་ལྟར་བརྩིགས །།
ལྷ་ཀླུ་གནས་པའི་རི་བོའི་རྩེ་མོ་ན།།
ལྷིང་འཇགས་དཀྲོགས་པའི་མདའ་མོ་གྲི་ལྟར་འཛིངས།།

ཞིང་ཚིགས་ལོ་ཏོག་དུས་ཀྱི་ཚ་བས་བཅོམ།།ང
སྤང་ལྗོངས་སྔོན་མོ་དགུན་གྱི་བ་བོས་འགེམ།།
ཆུ་མིག་ལྟེང་ཀ་ཤ་འོད་རྦབ་རྡོས་ཕྱུངས།།
འཇིག་པའི་གསང་བ་ཕྱི་རུ་མངོན་ལ་ཁད།།

གསར་སྐྱེས་མྱུ་གུ་རང་བྱུང་ཐན་པས་གཙེས།།
ས་གཞིའི་གདོང་ལ་མི་སྡུག་གཉེར་མ་གྱོན།།
སྲིན་པོས་ནགས་ཚལ་བཏུལ་བའི་སྣེ་མོ་ན།
བྱ་བྱེའུ་གནས་ཚང་གནའ་བོའི་ལྷ་སྒྲུང་ཙམ།།

རྩོམ་ཁུངས། ༢༠༠༣ལོའི་གངས་རྒྱན་མེ་ཏོག་དེབ་བཞི་བ།