གདོད་ནས་མཛེས་པའི་ཞལ་གྱི་དཀྱིལ་འཁོར།།
ཡིད་ཀྱི་མཁའ་རུ་ཤར་བ་ཙམ་གྱིས།།
རྨོངས་པའི་མུན་འཕྲོག་དབྱངས་ཀྱི་རྒྱལ་མོས།།
རྣམ་དཔྱོད་ཀུན་ད་རྒྱས་པར་མཛོད་དང༌།།
 
རྒྱ་ཆེན་ཤེས་བྱའི་དེ་ཉིད་ངོ་མ།།
བྱིས་བློས་དཔྱོད་པའི་ཡུལ་ཙམ་མིན་པས།།
རིག་པའི་འོད་སྣང་འབུམ་གྱི་འཛུམ་ཟེར།།
བདག་གི་སྙིང་ལ་འཕོས་པར་མཛོད་དང༌།།
 
ཕྲ་རགས་འཇིག་རྟེན་གསང་བ་འཚོལ་བར།།
མི་ལས་འདས་པའི་མཁྱེན་རབ་དགོས་ན།།
དྲི་མེད་ཤེལ་གྱི་ཟླ་གཞོན་ལྟ་བུའི།།
རིག་ཁམས་དྭངས་མའི་གནས་ལུགས་སྟོན་དང༌།།
 
མཐའ་བྲལ་དབུ་མའི་གསང་ཚིག་ཕྲ་མོ།།
སྙན་འགྱུར་ངག་གིས་གླུ་རུ་ལེན་ན།།
ངག་ལ་ངག་གི་དངོས་གྲུབ་མཐའ་དག།
ད་ལྟ་ཉིད་ནས་བདག་ལ་སྩོལ་ཤོག།
 
སྣ་ཚོགས་སྣང་བའི་བསླུ་བྲིད་འོག་ཏུ།།
བདེན་འཛིན་ཐག་པས་བཅིངས་བའི་འགྲོ་རྣམས།།
རྟེན་འབྱུང་རིག་པའི་གྲོལ་སྟངས་འདི་ལ།།
མོས་པའི་ཡིད་ཆེས་སྙིང་ནས་སྐྱེད་དང༌།།
 
ཆགས་སྡང་རྟོག་པའི་འཕྲོ་འདུ་རེ་རེས།།
ངེས་འབྱུང་སྲབ་མོ་ཆུ་རུ་སྐྱུར་དུས།།
བདག་འཛིན་འགོག་པའི་ལྟ་སྟངས་རེ་རེས།།
ཞེན་པའི་འཆིང་བ་ནང་ནས་གཅོད་དགོས།།
 
སྣང་བའི་ཆ་ནས་ཡོད་ཡོད་འདྲ་བའི།།
ཤེས་བྱའི་འཇའ་ཚོན་ཇི་ལྟར་བཀྲ་ཡང༌།།
སྟོང་པའི་དབྱིངས་སུ་གྲོལ་བའི་ཁམས་དེས།།
བདེན་འཛིན་བུ་ཆུང་མཐའ་ལ་སྤྱུགས་ཐོངས།།
 
རྣམ་རྟོག་བདུད་ཀྱི་ཕ་བོང་རེ་རེས།།
བསམ་བློའི་སྒོ་མོ་འགེགས་པར་ནུས་ཀྱང༌།།
རྟེན་འབྱུང་རིག་པའི་རལ་གྲི་ངར་མས།།
མི་མངོན་དབྱིངས་སུ་རྒྱ་རུ་འདེབས་ཐུབ།།
 
མཐའ་མེད་འཁོར་བའི་གྲོང་ཁྱེར་ཟེར་བ།།
བག་ཆགས་ཤིག་གི་གནས་སྟངས་ལགས་ན།།
སྟོང་དང་རྟེན་འབྱུང་འབྲེལ་བའི་ལྟ་བས།།
ཐག་སྣེའི་མདུད་པ་འཁྲོལ་སྟངས་ཤེས་དགོས།།
 
སྣང་བ་ཡུལ་གྱི་རྩེད་མོ་རེ་རེས།།
འཛིན་པ་སེམས་ཀྱི་བུ་ཆུང་བསླུས་པའི།།
མ་ངེས་འཁོར་བའི་འཁྲབ་སྟོན་འདི་དག།
རིགས་པའི་ལམ་ནས་བརྫུན་དུ་མཐོང་སོང༌།།
 
རྟེན་འབྲེལ་དབང་གིས་སྣང་དུ་རུང་ཞིང༌།།
སྣང་བ་ལྟར་དུ་གྲུབ་པ་མེད་པའི།།
ངེས་དོན་རྒྱལ་བའི་དགོངས་བཅུད་ཟབ་མོ།།
རྟག་ཆད་མཁན་པོའི་གོ་ཡུལ་མ་ཡིན།།
 
མིང་དུ་བཏགས་པའི་ཤེས་བྱའི་ངོ་གདོང༌།།
ལས་སྣང་དབང་གིས་གྲུབ་པར་མཐོང་ཡང༌།།
མཐོང་མཁན་ཁོ་ཡང་བརྫུན་དུ་སོང་ན།།
རྟོག་དཔྱོད་མཁན་པོས་གཟབ་གཟབ་མཛོད་ཅིག།
 
ཕྱག་རྫོགས་དབུ་མའི་ལྟ་གྲུབ་མཐའ་དག།
ཆོས་ཉིད་ཀློང་དུ་རོ་གཅིག་གཞོལ་ན།།
རེ་དོགས་མང་བའི་རྩོད་པ་སྤངས་ནས།།
མཐར་འཛིན་ལྟ་བའི་ཞེན་ཡུལ་ཕྱུངས་ཤིག།
 
ས་དགེ་བཀའ་རྙིང་གྲུབ་མཐའི་འདོད་ཚུལ།།
སོ་སོར་གསུངས་ཀྱང་མིང་འདོགས་ཙམ་ལས།།
ཐར་པའི་ལམ་གྱི་ཚུགས་སོ་རེ་ནས།།
མཁས་པས་བལྟས་ན་གཅིག་ཏུ་གཞོལ་འོང།།
 
ཅི་ཡང་མི་ཤེས་བྱིས་པའི་ཚོགས་ཀྱིས།།
བླུན་པོའི་ལབ་རྡོལ་བདེན་པར་འཛིན་ཡང༌།།
རྣམ་དཔྱོད་ཅན་གྱི་བློ་མིག་ཡངས་པོས།།
ལེགས་པར་གཟིགས་དང་འདྲ་འདྲ་མིན་ནོ།།
 
འཁོར་བའི་ཀློང་གི་མི་ནག་ཅིག་གིས།།
དབུ་མའི་ལྟ་བར་འོལ་ཚོད་བྱས་ཀྱང༌།།
འཕགས་བོད་གཞུང་གི་དགོངས་པར་འགལ་ན།།
ལུང་དང་རིག་པས་རྩད་ནས་ཕྱུངས་ཤིག།
 
ཅི་སྟེ་འཐད་པའི་ཆ་ཞིག་མཆིས་ཤིང༌།།
རྟེན་འབྲེལ་མཐོང་བའི་ཐབས་སུ་འགྲོ་ན།།
རིག་བྱེད་ཚིག་གི་འཆད་སྟངས་རེ་རེས།།
ལམ་གྱི་བདེན་པ་རེ་རེ་ཐོབ་ཤོག།
                           ༢༠༡༠ལོའི་ཟླ་༢ཚེས་༢༥ཉིན་རང་ཤག་ཏུ་བྲིས།

རྩོམ་ཁུངས། ངེད་དྲ་བ།