གོ་ལ་ཟླུམ་པི་མི་རྟག་རང་བྱུང་གི་ཆོས་ཉིད།།
འཁོར་བོ་ཁབ་ཀྱི་རྩེ་ན་བདེ་བ་ཞིག་མི་འདུག།
ཡོད་ཚད་ཉིད་ནས་གདམས་པའི་འཇིག་རྟེན་གྱི་ཁྱིམ་གཞི།།
མི་སྐྱིད་སེམས་ཁམས་གླིང་གི་དུག་ཚེར་གྱི་མདའ་མོ།།

དགའ་སྐྱོ་ཆགས་སྡང་དུ་མའི་རྨི་ལམ་གྱི་འཕྲུལ་སྣང༌།།
འདི་ཕྱི་གཉིས་ན་རྒྱུ་བའི་སེམས་ཁོང་གི་སྡུག་བསྔལ།།
ཁ་སང་དེ་རིང་ཞེས་པའི་ཉིན་ཞག་གི་ཕྲེང་བ།།
མི་སྐྱིད་སེམས་ཁམས་གླིང་གི་སྡུག་བསྔལ་གྱི་ཁྲེས་པོ།།

ཁ་སང་སྐྱིད་པའི་ཚོར་བ་དགའ་སྤྲོ་ཡིས་བཟི་ཡང༌།།
དེ་རིང་སྡུག་པའི་སེམས་པ་སྐྱོ་སྣང་གིས་ཁེངས་འདུག།
སྐྱིད་སྡུག་རེས་སུ་འཁོར་བའི་མི་ཚེ་ཡི་འཚོ་བ།།
མི་སྐྱིད་སེམས་ཁམས་གླི་གི་སྐྱོ་སྣང་གི་གཞི་མ།།

སེམས་ཅན་འགྲོ་དྲུག་ཡོངས་ཀྱི་ལས་དོན་དེ་བསམ་ནས།།
སང་གི་ཉི་གཞོན་འདེགས་པའི་སྐྱ་རེངས་དེ་དྲངས་འདོད།།
ཤ་ཁྲག་རུས་སུ་གྲུབ་པའི་ལུས་རྟེན་གྱི་གསས་མཁར།།
མི་སྐྱིད་སེམས་ཁམས་གླིང་ནས་ཐར་ཐབས་ཤིག་མ་བྱུང༌།།

འདོད་པ་ཆུང་ཆུང་ཞིག་གི་བསླུ་བྲིད་དེའི་དབང་གིས།།
བདེ་སྐྱིད་འཚོ་བ་བདག་ལ་ཆུ་ནང་གི་མེ་ཕུང༌།།
འཇིག་རྟེན་ཟང་ཟིང་མྱུལ་བའི་ཉམ་ཆུང་གི་རྣམ་ཤེས།།
མི་སྐྱིད་སེམས་ཁམས་གླི་གི་ངུ་འབོད་ཀྱི་རོལ་དབྱངས།།

དྭངསས་གསལ་མུ་ཏིག་ལྟ་བུའི་མཆི་མ་ཞིག་འཛུམ་སྟེ།།
ཀོར་ཀོར་ཁྲ་ཆུང་མིག་ལས་ཆལ་ཆིལ་དུ་བཞུར་ན།།
སྐྱོ་སྡུག་སེམས་ལ་ཉར་བའི་ཁེར་རྐྱང་གི་བུ་ངས།།
ཉམ་ཆུང་རང་ལུགས་གང་ལ་འགྲེ་ལ་བ་ཞིག་མ་རྙེད།།

ལད་ཟློས་བྱེད་པའི་སེམས་པ་ཐོག་མ་ནས་མ་ཡོད།།
དེང་རབས་སྙན་ངག་པ་ཡི་ཆོ་ལོ་དེ་མ་བསམ།།
དམར་ཆུང་སེམས་པས་སྲིན་པོའི་སྡུག་བསྔལ་དེ་ཁྱེར་ནས།།
མི་སྐྱིད་སེམས་ཁམས་གླིང་ནས་རེ་འབོད་དེ་བསྒྲགས་སོང༌།།

རྩོམ་ཁུངས། མཚོ་སྔོན་པོའི་རྩོམ་རིག་སྒྱུ་རྩལ།༢༠༡ལོའི་དེབ་དང་པོ།