ལོ་མའི་གཡང་དཀར་སྟོན་རླུང་ཤུགས་ཀྱིས་འདེད།།
ཁྲུང་ཁྲུང་གཤོག་རྡང་གཅིག་གིས་ལྷོ་རུ་འཕུར།།
ཁོ་བོའི་དྲན་པ་གདུང་བའི་ཁུར་གྱིས་ནོན།།
ཀྱེ་མ་སྙིང་སྡུག་མི་སྡོད་གང་དུ་བཞུད།།

ཨ་སྔོན་མཐོན་པོ་མཛེས་པའི་གུར་དུ་ཕུབ།།
ཁྲ་ཚོན་མེ་ཏོག་འབོལ་པའི་གདན་དུ་བྱེད།།
རྩེ་དགའི་སྦྲང་ཆར་འཐུང་བའི་དམ་བཅའ་དག།
གློ་བུར་དབང་གཞུའུཧ་ཚུལ་དུ་ཇི་ལྟར་བཀོད།།

བརྩེ་བའི་ཞགས་པ་ཐེབས་ནས་ལོ་བཅུ་སོང༌།།
དུངས་པའི་སེམས་ངོ་བསྟན་ནས་ལོ་བཅུ་སོང༌།།
སྙིང་སྡུག་སྙིང་གི་ཐིག་ལེ་ཡིད་འོང་མ།།
འདུ་འབྲལ་རླབས་ཀྱིས་གང་གི་ཕྱོགས་སུ་དེད།།

སྙིང་གཏམ་ཆར་རྒྱུན་ཤག་ཤག་བབས་པ་ལས།།
དུངས་ཞེན་མྱུ་གུ་འབུས་པའི་སྒྱུ་འཕྲུལ་དག།
དྲན་པའི་གཞི་ལ་གློག་ལྟར་འཁྱུག་ཙམ་གྱིས།།
འདྲེན་བྱེད་རྫིང་བུའི་ཟེགས་མ་མཁའ་ལ་ཐོར།།

ཁེར་རྐྱང་གཟུགས་གཞི་མུན་པར་འགྲོགས་པའི་དུས།།
མཐོན་པོའི་དབྱིངས་སུ་རྒྱུ་སྐར་བྱེ་བ་མཐོང༌།།
གང་ཞིག་འོད་དཀར་ལམ་ལམ་འཚེར་བ་དག།
ཉིད་ཀྱི་ཀེམ་ཀེམ་སྤྱན་ཟུང་ཡིན་ནམ་སྙམ།།

དཔྱིད་གསུམ་ཁ་བ་ཡང་བའི་གཤོག་པ་ཅན།།
ལྷབ་ལྷབ་གར་གྱིས་འཛིན་མར་བབས་པ་ལས།།
ཡིད་འོང་དྭངས་གཙང་དངུལ་གྱི་ཞིང་ཁམས་དེ།།
མཛའ་མོའི་སེམས་ཀྱི་རང་མདངས་ཡིན་པར་སྙམ།།

དབྱར་གསུམ་མེ་ཏོག་འཛུམ་པའི་སོ་ཕྲེང་ཅན།།
བསིལ་བའི་རླུང་དང་བསྡེབས་ནས་ཤིག་ཤིག་གཡོ།།
དྲི་བསུང་སྤོས་ཀྱི་དུད་པ་ཕྱོགས་བཅུར་ལྡང༌།།
སྙིང་སྡུག་ཞལ་རས་ཡིན་པའི་འཁྲུལ་སྣང་བྱུང༌།།

དགུན་གསུམ་གཙང་བོ་དར་གྱི་ཕྱི་གོས་ཅན།།
དུང་འབྲུག་གར་དུ་རྩེན་པའི་རོལ་སྒེག་གིས།།
མཐོན་པོ་གངས་རིའི་སྙིང་དང་འབྲེལ་བ་དེ།།
ལྷ་མོ་བཞུད་པའི་བཤུལ་ལམ་ཡིན་སྣང་འཆར།།
སྔོན་ཆད་འཚོ་བའི་སྙིང་བོ་རྒྱུ་རུ་བསམས།།
རི་བའི་རྡོག་ཁྲེས་བསྣམས་ནས་ཕྱི་ཡུལ་འགྲིམས།།
ཁུག་མ་བརྒྱགས་ཚེ་རྒྱལ་ཁའི་སྣང་བ་ཡིས།།
རང་ཁྱིམ་དྲོན་མོའི་ངོ་སོ་བསྟོད་པར་བསམས།།

གཟུགས་ཀྱི་གྲིབ་མ་གཟུགས་དང་འགྲོགས་བྱེད་ཅིང༌།།
སེམས་ཀྱི་ལྷ་མོ་སེམས་དང་བྲལ་གྱུར་ཚེ།།
ལོ་གསུམ་སྡུག་ལས་བྱས་པའི་ཡོང་སྒོ་ཡང༌།།
རང་སེམས་མགོ་བོ་གནོན་པའི་གཉའ་ཤིང་འདྲ།།

སད་ན་སེམས་ཀྱི་མཚོ་མོ་འཁྱོམ་འགྱུར་ཞིང༌།།
གཉིད་ན་མཚན་གྱི་རྨི་ལམ་འཁྲུགས་འགྱུར་བ།།
འདུ་འབྲལ་སྤྲིན་པའི་ཀློང་ནས་ལྷུང་བ་ཡི།།
ཆག་སྒོ་གནམ་ལྕགས་ཡིད་ཀྱི་ཆོམ་པོར་གྲུབ།།

ད་ནི་མཆོག་གསུམ་བརྩེ་བའི་ཕོ་བྲང་ལ།།
རྣམ་དཀར་དགེ་བའི་ནོར་ཙམ་བསྐུར་བྱས་ཏེ།།
སྙིང་སྡུག་བགྲོད་པའི་ལམ་སྟོན་གནང་བ་ལ།།
ཡིད་ཀྱི་རེ་བ་ལྷུན་པོའི་དཔལ་ལས་ལྕི།།

ཀྱེ་མ་འདུ་འབྲལ་སྐད་ཅིག་གློག་དང་འདྲ།།
ཡིན་ཀྱང་བརྩེ་བའི་མེ་ཏོག་སྙིང་དུ་སྡུག།
འདབ་མ་ལྷུང་ནས་ལོ་གསུམ་འཁོར་ན་ཡང༌།།
མཛེས་པའི་ལང་ཚོ་སེམས་ཀྱི་ཞིང་ན་བཞད།།

བརྗེད་ངས་རྐུན་པོ་དུས་དང་འགྲོགས་བྱས་ཏེ།།
སྙིང་གི་ཁམས་ལ་འཇབ་བུས་ལྷགས་ན་ཡང༌།།
སྙིང་སྡུག་ལྷ་མོར་འགྲོགས་པའི་བརྙན་རིས་དག།
ཡིད་ཀྱི་མཁའ་ལ་རྟག་ཏུ་བཀྲ་བར་ངེས།།

རྩོམ་ཁུངས། ༢༠༡༠ལོའི་སྦྲང་ཆར་དེབ་དང་པོ།