ཆུང་མ་བླངས་ན་ཁྱིམ་མགོ་མི་ཐོན་གི།།

བྱིས་པ་ལས་ན་ཆད་པ་ཕོག་ཡོང་གི།།

ཁེར་འདུག་བྱས་ན་གཉིད་རྒྱུ་མི་ཡོང་གི།།

མི་རུ་སྐྱེས་ན་སྡུག་བསྔལ་མང་གི་ཡ།།

གཤིན་རྗེ་ཞེས་པའི་རྒན་པོ་ཚེ་རིང་བོ།།

ལས་མཁན་ཟེར་བའི་གསར་བུ་འཆི་མེད་ཚོ།།

དམྱལ་ཁམས་ཞེས་པའི་རྒྱུ་འབྲས་འཇལ་ས་བོ།།

གང་ནས་བལྟས་ཀྱང་བདེ་བ་ཅན་ཞིག་རེད།།

ཕྱི་མ་བསམ་ནས་བླ་མར་ཕྱག་གསུམ་འཚལ།།

ཚེ་འདི་བསམ་ནས་དཔོན་པོར་སྐུ་གཡོག་བསྒྲུབས།།

འདི་ཕྱི་གཉིས་ཀའི་དོན་ལ་འདུར་འདུར་ནས།།

བརླིག་རྩ་རྔུལ་ཆུས་བརླན་པ་སུ་ལ་གསང༌།།

གྲོང་གི་ཨ་མཆོད་ཡིན་ན་སྐྱིད་པ་ལ།།

ཉིན་དཀར་རྔ་སྦུབ་གཉིས་ཀ་རྡུང་རྐྱང་རེད།།

མཚན་མོ་མུན་ནག་བྱ་བ་ལས་རྐྱང་རེད།།

ཟས་གོས་གང་འདོད་གཉིས་ཀ་སྤྱོད་རྐྱང་རེད།།

ཁ་སང་ཤར་ལ་སོང་ནས་མེ་ཏོག་བཏུས།།

དེ་རིང་ནུབ་ཀྱི་ཕྱོགས་ལ་གཏོར་མ་འཕངས།།

ཤར་ནུབ་གཉིས་ཀྱི་མཚམས་ལ་རྡོ་ཞིག་བཙུགས།།

རྡོ་ཡི་སྟེང་ལ་འབྲུག་རིས་དགུ་འཁྱུད་བྲིས།།

ཐག་རིང་རྒྱང་ཞིག་མིག་གིས་མི་མཐོང་གི།།

ཐག་ཉེའི་མི་དེ་ཡང་མོ་རླུང་ཞིག་རེད།།

རླུང་དེའི་ཁ་ཕྱོགས་དུག་ཆུའི་གཙང་བོ་རེད།།

གཙང་བོ་འབབ་ས་ང་ཡི་རྩྭ་ཐང་རེད།།

བྱིས་པའི་དུས་ཀྱི་རྨི་ལམ་འཚར་བོ་དེ།།

ལོ་དང་ཟླ་བའི་གྲིབ་མས་བསྣོགས་ནས་ཐལ།།

གཞོན་པའི་དུས་ཀྱི་ཕུགས་འདུན་མཛེས་པོ་འདི།།

ནམ་ཞིག་རྒ་བའི་ཁུར་གྱིས་གནོན་ངེས་སོ།།

ཆང་རག་འཐུང་ན་སྣང་བ་སྐྱིད་ཡོང་གི།།

དུ་བ་འཐེན་ན་འཆར་སྒོ་ཕྱེས་ཡོང་གི།།

འཁོར་བ་གླེང་ན་སྐྲག་རྒྱུ་ཐོན་ཡོང་གི།།

ཨ་ལ་ཀུ་རེས་མིན་ན་དགེ་ཕྱོགས་བོ།།

2008-10-7

རྩོམ་ཁུངས། མཚན་ལམ་རིང་མོ།