གཟི་བྱིན་ཉི་ཟླ་ལ་སྙེམས་པའི།།
དབེན་གསུམ་གཙུག་ལག་གི་འདབས་ནས།།
རེ་བའི་གཤོག་ཟུང་གི་ཟློས་གར།།
བཅུ་ཕྲག་མེ་ཏོག་གིས་བརྒྱན་པའི།།
རིག་པའི་གླིང་ཀ་ལ་བསྒྱུར་ཚེ།།
དྲི་མེད་ཀུན་རྟོག་གི་ངོས་ལ།།
མེ་ཏོག་གང་བུ་ཞིག་ཆགས་འདུག།

ལེགས་བཤད་རི་མོ་ཡི་འཁྱིག་འགྲོས།།
ཞོགས་པའི་ཉི་ཟེར་དང་འགྲོགས་ནས།།
བློ་ལ་ངེས་ངེས་ཤིག་བྱེད་དུས།།
མཛའ་བཤེས་རི་དྭགས་གང་རྔོན་ནས།།
དུངས་སེམས་རྒྱུདསྐུད་ལས་ཤོར་བ།།
བཟོད་མེད་ཟུར་མིག་གིམདའ་མོ།།
སྙིང་གི་དཀྱིལ་དབུས་སུ་ཟུག་སོང༌།།

མྱོས་བྱེད་ལང་ཚོ་ཡི་མེ་ཏོག།
རབ་རྒྱས་ལྷུག་ལྷུག་ཏུ་དགོད་པའི།།
དྲི་ཟའི་ན་ཆུང་གི་ཚལ་ན།།
འཇོ་སྒེག་ཉམས་འགྱུར་གྱིས་ཕྱུག་པ།།
བརྩེ་བའི་སྒོ་གླེགས་དེ་ཕྱེས་དང༌།།
སྙིང་གཏམ་མུ་ཏིག་གི་ཕྲེང་བ།།
མཛེས་པའི་རྒྱན་ཆ་རུ་འབུལ་འདོད།།

ནོར་མེད་དབུལ་མོ་རེད་མ་བསམ།།
བརྩེ་འདང་དངུལ་དཀར་གྱི་བུམ་པ།།
ཕྱི་ཐག་དར་ཚོན་གྱིས་སྦྲེལ་ཏེ།།
བྱམས་བརྩེའི་ནོར་བུ་ཡིས་གང་ཡོད།།
ཞེ་སེམས་ལྷོད་ལྷོད་ཀྱི་ངང་དུ།།
དུངས་ཀའི་མཛུབ་རྩེ་ལས་ཤོར་བའི།།
ངག་གི་དབྱངས་རྟ་ལ་གསན་ཆོག།

མཐུན་པའི་དར་སྐུད་ཀྱི་སྣེ་མོ།།
དགའ་བའི་རྐང་སྟེགས་ལས་འཕོས་དང༌།།
སྟོང་བའི་རྨི་ལམ་ལ་འབྱམས་པའི།།
འཁོར་སྒྱུ་དབང་ཐང་གིས་བྲལ་ཡང༌།།
མ་བསླད་འགྱུར་མེད་ཀྱི་གཤིས་ལ།།
མཛའ་བ་ལྷོད་མེད་ཅིག་ཡིན་པས།།
འཚོ་བ་སྐྱིད་སྣང་གིས་བཞེངས་ཆོག།

རྩོམ་ཁུངས། ༢༠༠༥ལོའི་གངས་རྒྱན་མེ་ཏོག་དེབ་གསུམ་པ།