གཡི་མདོག་ལང་ཚོ་སྣུམ་པོ་ཡི།།
རྣམ་པར་ཕྱུག་པའི་ལྕུག་ཕྲན་རྩེར།།
དལ་གྱིས་ལྡེམ་པའི་ཁུ་བྱུག་གི།
མགྲིན་པའི་འགྱུར་ཁུགས་དབྱིངས་སུ་འཕྱོ།།

སྤྲིན་དཀར་འཕྱུར་བའི་རླབས་རྩེ་ནས།།
དལ་གྱིས་འཇོ་བའི་སྦྲང་ཆར་རྒྱུན།།
ས་རུ་ཟགས་པ་ཕྱིར་དགོས་ཞེས།།
འཇའ་ཚོནལག་པ་ས་གཞིར་བསྲིངས།།

བསུང་ཞིམ་འཁྱིལ་བའི་བར་སྣང་དུ།།
བསིལ་རླུང་དལ་བུར་ལྡང་བ་ན།།
ག་བུར་སྤྲོས་ཀྱི་རྗེས་འགྲོའི་དྲིས།།
ཡིད་ལ་དགའ་བ་འཇོ་བར་བྱེད།།

འཇམ་མཉེན་ཆུ་སྐྱེས་འདབ་མིའེ་ཁྲིར།།
ཅི་དགར་བབས་པའི་གསེར་སྦྲང་ཁྱུས།།
དཀར་དམར་ཟེའུ་འབྲུར་འོ་བྱས་པས།།
ཀུ་མུད་ངོ་ཚས་ཟིམ་པར་གྱུར།།

སྔོ་མེར་འཁྱིལ་བའི་དྭངས་གཙང་མཚོར།།
གསེར་མིག་འཁྱུག་པའི་གཤོག་རྩེ་ཡིས།།
སྒྱུ་འཕྲུལ་གར་སྟབས་སྒྱུར་བ་ན།།
ཆུ་གཉེར་རི་མོ་ཤིག་ཤིག་གཡོ།།

སྔོ་ལྗང་རྩྭ་ཡི་རླབས་རྩེ་རུ།།
ཅི་དགར་འཕྱོ་བའི་ཕྱུགས་ཀྱི་ཁྱུས།།
རྨིག་པས་འཛིན་མ་རྡུང་བའི་སྒྲས།།
ལྷ་ཡི་རྔ་ལ་སྐྱེངས་པ་སྟེར།།

རྫི་བོ་ཕོ་མོའི་སྙན་འཇེབས་གླུ།།
སྤྲིན་དཀར་འཕྱུར་བའི་བར་གསེང་ནས།།
སིང་སིང་བཞུར་བའི་གདངས་འགྲོས་ཀྱིས།།
ཁུ་བྱུག་ཞལ་ལ་དམར་མདངས་བྱིན།།

རྟ་མཆོག་མཆོངས་འགྲོས་རྨིག་རྗེས་སུ།།
མེ་ཏོག་མཆོད་པའི་ནོར་འཛིན་མའི།།
དཔལ་དུ་ལྷུང་བའི་མཐིང་སྨུག་སྦྲས།།
དུད་སྤྲིན་རྨུ་ཐག་མཁའ་རུ་འཐེན།།

སྒྱུ་རྩལ་སོར་མོའི་རྩེད་འཇོ་ལས།།
འོ་མ་བཞུར་བའི་ཤག་སྒྲ་དང༌།།
བཞོ་གླུ་འགུགས་པའི་གདངས་དབྱངས་ཀྱིས།།
མཚམས་སྤྲིན་གསར་བ་མགྲོན་དུ་བསུ།།

སྙན་པ་རྒྱ་མཚོའི་རླབས་ཀྱི་རྒྱུན།།
སྲིད་ན་ཤུགས་ཀྱིས་འཕྱོ་བ་ཡི།།
ཤེས་རིག་འོད་ཀྱི་ཞིང་ཁམས་ནས།།
སེམས་ཀྱི་འགྱུ་བ་རི་མོར་བྲིས།།

རྩོམ་ཁུངས། ༢༠༠༥ལོའི་གངས་རྒྱན་མེ་ཏོག་དེབ་གསུམ་པ།