སྟོད་ཀྱི་དབུས་ལམ་གྱ་གྱུ།།
འགྲོས་ཆུང་གོམ་པས་གཞལ་དུས།།
མོ་གཞོན་ཁྱོད་དང་འུ་གཉིས།།
ཚེ་སྔོན་ལས་ཀྱིས་བསྐོས་བྱུང༌།།

ཕ་མས་བཀའ་ནི་མ་བསྩལ།།
བླ་མས་ལུང་ནི་མ་བསྟན།།
རང་སེམས་ཨ་ལོང་གོར་མོ།།
སྐྱིད་ཆུའི་ཁ་ནས་མཐུན་སོང༌།།

ལམ་ཐུག་བུ་མོའི་མཆི་མ།།
གོད་མའི་ཆུ་མིག་དྭངས་མོ།།
ཧུབ་གསུམ་འཐུང་བའི་མོད་ལ།།
བདག་བློ་ཡོམ་ཡོམ་སྒུལ་བྱུང༌།།

བྱིན་ཅན་ཇོ་བོའི་མདུན་ལ།།
གཟིམ་མེད་གསེར་མཆོད་བསྒྲོན་ནས།།
འདི་ཕྱིའི་འཕྲེང་ལམ་ཀུན་ན།།
བར་བགེགས་མེད་པ་བྱས་ཡོད།།
 
ཚིག་མགོ་ལྷ་ལ་བཅོལ་ནས།།
ཚིག་རྩ་མནའ་ཡིས་བསྒགས་ཏེ།།
འགྱུར་མེད་སྙིང་གི་དམ་བཅའ།།
ལྕགས་པོ་རི་ལ་བརྐོས་ཡོད།།
 
ལྷ་སའི་དཀྲུག་ཇ་མངར་མོ།།
མཉམ་བཞེས་གནང་བའི་ལོ་ལ།།
ཁྱོད་དང་ང་ཡི་རྨི་ལམ།།
ལན་མང་འཁྲུལ་དོན་མི་འདུག།

མྱི་ཁར་མྱི་ཡིས་བསྐུར་ཆོག།
ཁྲེལ་དགོད་ན་ཟླས་བྱས་ཆོག།
ཁ་སེམས་མཐུན་པའི་འོ་མ།།
ཁྱོད་དང་ང་ཡིས་དཀྲོག་ཆོག།

དོག་ཅིང་ཆུང་བའི་ཁང་མིག།
བརྩེ་བའི་གཏམ་གྱིས་བཟི་སོང༌།།
སེམས་དང་སེམས་པའི་བར་ན།།
རླུང་བུ་རྒྱུ་ས་མི་འདུག།

གནམ་ལངས་སྨིན་དྲུག་ཁྲ་མོས།།
འཛུམ་ཆུང་ཤིག་ཤིག་མ་གནངས།།
ང་དང་བྱམས་པའི་ལས་ལ།།
ཐུགས་རྗེས་གཟིགས་པ་གནོངས་དང༌།།

ཡ་ཆུང་ཁོག་གི་སྙིང་ཆུང༌།།
སིག་སིག་འདར་དགོས་བྱུང་སོང༌།།
གློ་དང་མཆིན་པའི་སྟེང་འོག།
གློ་བུར་གློ་བུར་བརྗེས་བྱུང།།

མགྲིན་པའི་བླ་གཡུ་སྔོ་ཆུང༌།།
ཕ་ལོའི་སྙིང་གི་ཚེ་ནོར།།
ང་རང་དགའ་བའི་བྱམས་པར།།
དྲན་པའི་རྟེན་དུ་ཕུལ་ཡོད།།

ཤི་ན་བླ་མ་ཁྱོད་ཡིན།།
གསོན་ཚེ་སྐྲ་བདག་ཁྱོད་ཡིན།།
བུ་མོས་དེ་སྐད་སྨྲ་བཞིན།།
རྒྱང་བཞུད་ལམ་ལ་བཞུགས་སོང༌།།

ལག་པ་ཕར་ལ་བསྲིངས་ཀྱང༌།།
བུ་མོའི་ལག་མགོའི་མ་ཟིན།།
གོམ་གསུམ་རྒྱང་ལ་གྱེས་པས།།
སེམས་པ་རྨང་ནས་འཁྲུགས་བྱུང༌།།

ནོར་གླིང་མཚོ་ཆུང་ཁ་ཡི།།
ངང་ངུར་ཡིན་ན་སྐྱིད་པ།།
དུས་བཞིའི་འགྱུར་བག་རྒོད་ཀྱང༌།།
གཤོག་རྡང་འཐོར་བའི་དཔེ་མེད།།

བུ་མོའི་ལྷུམས་སུ་བཏབ་པའི།།
ཚེ་སྲོག་གསར་བའི་ས་བོན།།
སྐལ་བ་སྟག་གི་ལོ་ལ།།
སྨིན་རྒྱུ་བྱུང་ན་དགའ་བ།།

ནང་མ་ཁང་གི་རྒུན་ཆང༌།།
རིན་གོང་གསེར་ལས་མཐོ་རུང༌།།
ཁྱོད་རང་མོས་པ་བྱུང་ཚེ།།
ལན་མང་བཏུང་བ་དྲན་ནམ།།

འདུ་བྲལ་སྒྱུ་མའི་རོལ་རྩེད།།
ང་ཡིས་མངོན་གསུམ་མཐོང་བྱུང༌།།
སང་ལོར་མཇལ་བའི་སྨོན་ལམ།།
སྙིང་ནས་ལན་གསུམ་ཞུས་ཡོད།།
                              2009—6--8

རྩོམ་ཁུངས། མཚན་ལམ་རིང་མོ།