ལས་ཉོན་སྨག་རུམ་འཐིབ་པའི་འཇིག་རྟེན་དུ།།
བྱས་བསགས་གནམ་གྱི་རྒྱལ་མོའི་མཐུ་བཙན་པས།།
དབང་མེད་རྣམ་ཤེས་གཉོམ་པོ་བདས་བདས་ནས།།
འཇིགས་རུང་སྐྱེས་རྫོང་འདི་ལ་བཙོན་དུ་བཅུག།

མི་སྡུག་གཉེར་མའི་རི་མོ་ཐོད་ལ་བརྩེགས།།
མ་རྒས་ཀུན་རྟོག་བུ་ཆུང་ཁྲོམ་ལ་ཤོར།།
ལས་དང་སྣང་བ་འཐབ་པའི་གཡུལ་ས་ནས།།
སྡུག་གི་སྨྲེ་བ་ཤོག་དཀར་ཐང་ལ་བཀྲམ།།

ཕྱི་ཚུལ་སྤྱོད་པ་མཛེས་པར་སྣང་ནའང༌།།
ནང་གི་དུག་གསུམ་རྒྱ་མཚོའི་རླབས་བཞིན་འཕྱུར།།
དད་ལྡན་དང་བ་འདྲེན་ཕྱིར་གཡོ་འཕྲུལ་བསླབས།།
ཆོས་བརྒྱད་ཟློས་གར་འཁྲབ་ལ་བྱང་ཆ་ལྡན།།

ཁྱིམ་པས་རྩེ་གཅིག་དད་ཕྱག་མང་དུ་འཚལ།།
འབྱུང་འགྱུར་བདེ་སྡུག་ལུང་བསྟན་མང་དུ་ཞུ།།
ཡིན་ཡང་རང་སྣང་རྟོག་བཏགས་སྙི་ལ་ཚུད།།
འདི་ཕྱིའི་བདེ་སྡུག་ཕ་མཐའ་ཇི་ལྟར་གཞལ།།

གང་སྣང་ལྷ་སྐུར་འཆར་བའི་སྒོམ་སྒྲུབ་མེད།།
ཀུན་རྫོབ་རྫུན་དུ་མཐོང་བའི་སོར་རྟོག་མེད།།
བྱང་སེམས་བསྔགས་ལ་སློབ་པའི་སྐལ་བ་མེད།།
མེད་པ་གསུམ་གྱི་ཀློང་ན་རྨོངས་པས་མནར།།

ཡིད་སེམས་ཆོས་ཀྱིས་འཚོ་བའི་མངར་ཁས་དབེན།།
གཞུང་ལུགས་རྒྱ་མཚོར་འཇུག་པར་བརྩོན་པས་དབེན།།
འགྲོ་ཀུན་བདེ་ལ་འགོད་པར་རྟོགས་པས་དབེན།།
བདེན་གསུམ་འཇིག་རྟེན་འདི་ན་སྐྱོ་བས་མནར།།

ཀུན་ལ་དག་སྣང་སྦྱོང་བའི་དད་སྟོབས་ཆུང༌།།
ཡོངས་ལ་དམའ་འབེབས་བྱེད་པའི་སྤོབས་པ་ཆུང༌།།
ཡོད་ཚད་ཁུར་དུ་འཁྱེར་བའི་སེམས་སྐྱེད་ཆུང༌།།
ཆུང་གསུམ་མ་བཅོས་སེམས་ཀྱི་གཤིས་སུ་གྲུབ།།

དྲི་མེད་ཞྭ་སེར་བླ་མའི་ཆོས་སྒོར་ཞུགས།།
གཞི་ལམ་འབྲས་བུའི་ཚུལ་ལ་སྦྱོང་ཙམ་བྱས།།
སྔོན་གྱི་བག་ཆགས་ད་དུང་མ་སད་པས།།
རང་སེམས་བྱ་རྒོད་མུན་པའི་དབྱིངས་སུ་འཕུར།།

རྩོམ་ཁུངས། ༢༠༠༥ལོའི་གངས་རྒྱན་མེ་ཏོག་དེབ་གསུམ་པ།