ཁམས་གསུམ་ཁ་ལོ་མི་ཡིས་བསྒྱུར་ནུས།།
དུས་གསུམ་གདོང་འབག་མི་ཡིས་བཤུ་ནུས།།
དུག་གསུམ་དབང་རྩ་མི་ཡིས་འཇོམ་ནུས།།
མི་ནི་འཛད་མེད་སྟོབས་ཀྱི་མངའ་བདག།

སྟེང་གི་ལྷ་ནི་མི་ལས་བྱུང་ཞིང༌།།
ཐ་ཤལ་འདྲེ་འང་མི་ལས་ཆད་སྐད།།
མི་ལ་འདྲ་མིན་སྣ་དགུ་འདུ་བས།།
ཅུང་ཟད་དཔྱད་པའི་ངལ་བ་ངས་བསྟེན།།

ལ་ལའི་སེམས་ཀྱི་གཞལ་ཡས་ཁང་ན།།
འགྲོ་དྲུག་འདྲེན་པའི་གདམས་ངག་བཞུགས་ཡོད།།
རིས་མེད་བྱམས་བརྩེའི་བསིལ་གདུགས་ཕུབ་ཡོད།།
ཟོལ་མེད་དུང་བའི་བདུད་རྩི་འཁྱིལ་ཡོད།།

འགའ་རེའི་སྙིང་གི་དཀར་ནག་མཚམས་ལ།།
མི་སེམས་གཤག་པའི་ཚིག་མཚོན་སྦས་ཡོད།།
མི་ཡུལ་དཀྲུག་པའི་ཇུས་གཞི་འཐེན་ཡོད།།
མི་ཆོས་བརླག་པའི་ཐབས་འཕྲུལ་བཀོད་ཡོད།།

ལ་ལ་འབྱོར་ཚེ་རིགས་རུས་བརྗེད་འགྲོ།།
ཕ་དང་ཕུ་ནུའི་བརྩེ་བ་དོར་འགྲོ།།
སྐད་དང་ཡི་གེའི་གོ་ཐོབ་འཁྲུལ་འགྲོ།།
རྒྱུ་འབྲས་རྒྱ་མ་རིང་དུ་སྤྱུགས་འགྲོ།།

འགའ་ཞིག་རྒུད་ཚེ་མི་གཞི་བོར་འགྲོ།།
བརྐུ་འཕྲོག་བཅོམ་གསུམ་ལས་ལ་ཕྱོགས་འགྲོ།།
ཤོ་རྒྱག་རྒྱལ་འཇོག་བྱ་བར་གོམས་འགྲོ།།
ཡིད་ཀྱི་ཕུགས་འདུན་འཇའ་ལྟར་ཡལ་འགྲོ།།

མི་ནི་འཁོར་བའི་བདག་པོར་མཐོང་ཡང༌།།
དོན་དམ་མི་ནི་འཁོར་བའི་བྲན་གཡོག།
མི་ཡི་བསམ་འདུན་བདེ་སྐྱིད་ཡིན་ཡང༌།།
སྡུག་གི་མཚོ་མོའི་ནང་ད་ལྷུང་ཡོད།།
                                     2009-5-6

རྩོམ་ཁུངས། མཚན་ལམ་རིང་མོ།