ཕྱི་རོལ་ཁ་བ་ལེབ་མོ་མཐུག་ཏུ་ཕྱིན།།
ལྷགས་རླུང་རེག་བྱ་རྩུབ་མོའི་ཤུགས་གླུ་འཐོར།།
སྣང་བ་དར་ལ་འབྱར་བའི་མི་རྐྱང་གིས།།
ན་ཟུག་སྟོང་གི་འཁུན་སྒྲ་ཐོལ་གྱིས་ཤོར།།

སྦྲ་ནག་རལ་བོ་གྲང་རླུང་ངར་མོས་སྐྱོམ།།
ནང་གི་ཟུངས་ཁྲག་དོན་མོ་ཁ་བས་བལྡགས།།
ཆག་ཀྲུམ་སེམས་ལ་ཤོར་བའི་ཁྱིམ་གཞི་ལ།།
བཟོད་མེད་རུས་རྐང་གཅོག་པིའེ་ན་ཟུག་འཁོར།།

སྟོབས་ཤུགས་མངའ་ཐང་དར་བའི་འདབ་ལྡན་ཚོགས།།
གོ་ལ་ཟླུམ་པོའི་རྩེ་ལ་ལྷོད་ཀྱིས་འཕུར།།
འཇིགས་རྔམ་ངོ་གདོང་ཁྲོས་པའི་མཆེ་བར་ན།།
སྦྲ་ནག་རལ་བོ་རྨི་ལམ་ཀློང་ན་འཁྱམས།།

གྲང་རླུང་གདུག་རྩུབ་ངར་མའི་ཐུ་འོག་ན།།
ཁ་བ་ནག་པོའི་ན་ཟུག་སེམས་ལ་ལྷུང༌།།
མཚན་ཐུབ་མར་མེ་སྦར་བའི་འགྲམ་ངོགས་སུ།།
གཟུགས་མེད་གཞན་ཞིག་སླེབས་ནས་སྐྱོབ་པར་སྒུག།

ཕྱུག་པོར་ཡོད་ཚད་ཐོབ་པའི་ང་རྒྱལ་ཞིག།
སྤྲང་པོར་འདོད་བློ་མེད་པའི་ཡིད་ཆད་ཅིག།
ནད་པར་རེ་བ་བྲལ་བའི་ཡིད་མུག་ཅིག།
ཀུན་གྱི་ཁ་སྒོ་ལས་དབང་གཅིག་པོས་ཆོད།།

སྐྱེས་པའི་འཇིག་རྟེན་དེ་ན་བྱིས་པ་ཚོ།།
རི་བོང་ཅལ་འདྲོགས་ཡིན་པའི་འགྲོ་སྟངས་ཀྱིས།།
ཀུནགྱི་ངུར་སྨྲིག་ཐོད་ལ་ལེན་པ་འདི།།
ཆོལགསུམ་གྲངས་ལ་མང་ཉུང་མེད་པ་འདྲ།།

གཞུང་ལུགས་གསར་རྙིང་ཕྲག་དོག་དུག་གིས་མྱོས།།
ཕུ་ནུ་ཕན་ཚུན་དམར་པོ་ཁྲག་གིས་འཐབ།།
བརྩེ་སེམས་སྦྲེལ་ཐག་གཏོར་བའི་བྱེད་ལུགས་འདིས།།
ཡོད་ཚད་འཐོབ་ཀྱང་ཆོག་པའི་སྒོ་མོ་བརྒྱབ།།

ཁྲམ་པ་གཡོ་སྒྱུ་རྒོད་པའི་མི་དྲག་ཚོར།།
ཕྱི་ཕྱག་ཚད་མེད་བགྱིས་པའི་མཐའ་འབྲས་སུ།།
མཛེས་སྡུག་སྙིང་ལ་ལྷུང་བའི་བར་སྣང་ལ།།
 འདབ་ལྡན་གཞན་དག་ལྡིང་བའི་རྣམ་སྨིན་འཁོར།།

བླ་སྤྲུལ་དར་མའི་མིག་གིས་ལྷ་མོ་འཚོལ།།
སྐུ་དྲག་མིག་ཟུང་སྒོར་མོ་དྲོད་ལ་འབྱར།།
རྒོད་པོ་རྒྱང་ལ་འཕུར་བའི་གོད་ཆག་བྱུང༌།།
འདི་ན་ཞེན་ཆགས་ལྕི་བའི་བྱ་ཚོགས་ཉུང༌།།

དགུན་གྱི་བཙག་རླུང་ངར་མའི་སྟོབས་ཤུགས་དར།།
གངས་རིའི་ཁྱིམ་ལ་ཁ་བ་ནག་པོ་བབས།།
སེམས་པ་ཆུ་ལ་བསྐྱུར་བའི་འཁྱམས་པོ་ལ།།
སེམས་གསོ་ཅུང་ཙམ་བགྱིད་པའི་མེ་རླབས་གང༌།།

ལོ་ཟླའི་གཙང་ཆེན་རྒྱང་ནས་རྒྱང་དུ་བཞུར།།
སྦྲ་ནག་ཀླུང་རྟ་རྒུད་ནས་རྒུད་དུ་ཕྱོགས།།
གངས་རིར་དུངས་ཞེན་ཟབ་པའི་མི་རྐྱང་གིས།།
ན་ཟུག་ཁྲག་གི་ཟེགས་མ་འདི་ཙམ་ཐོར།།

རྩོམ་ཁུངས། ༢༠༠༣ལོའི་གངས་རྒྱན་མེ་ཏོག་དེབ་དང་པོ།