ཚེར་མ་སྙིང་ལ་ཟུག་པའི་མུར་ཅོར་གྱིས།།
གནམ་ས་གདན་དུ་ལེན་པའི་བྱེད་པ་པོ།།
སེམས་ཀྱི་མྱ་ངན་དཔུང་ཤུགས་ཆག་པའི་རོ།།
སླར་ཡང་སྒྱུ་འཕྲུལ་ཞིང་ན་བཀོད་པས་འཛུམ།།
མེ་ཏོག་ནག་པོ་བརྩེགས་པའི་གཡང་གཟར་ན།།
སེམས་ཀྱི་གླང་བོ་འདོད་པས་རབ་མྱོས་ཏེ།།
པདྨའི་རྫིང་བུ་རྙོག་པའི་དཀའ་ཐུབ་ལས།།
གྲུབ་བདག་བུ་མོ་མཆོག་གི་བྱེད་མ་ཡིན།།
ཁྱོད་ཀྱིས་གདོང་འབག་གཡོན་མའི་ཟེར་མ་ཡིས།།
ཁོ་བོའི་གཟུགས་ཕུང་བསིལ་བའི་ཚལ་དུ་བསྐྱུར།།
སིལ་སིལ་གདུབ་ཀོར་འབྱིན་པའི་སྒྲ་རླབས་གང༌།།
སྐྲ་ལོའི་གསེབ་ཏུ་འཐོར་བ་ཅི་ཡིས་ལན།།
ཕྱི་མིག་ཁྲོད་ན་རབ་རིབ་གཟུགས་ཤིག་མཐོང༌།།
ཤཱཀྱའི་དགེ་སྦྱོང་གོ་ཏ་མ་དེ་ཡིས།།
གདུལ་བྱའི་དོན་དུ་ཟབ་མོའི་བསྟན་བཅོས་གསུངས།།
ཀྱེ་མ་དྭངས་བསིལ་བེཌར་ཞུན་མའི་མཚོར།།
ཆུ་བྱ་ཕོ་མོ་གདུང་བའི་སྨྲེང་གླུ་འཁོར།།
གསེར་ཚོན་ཟེགས་མ་འཕྱོ་བཱ་རྡུལ་ཕྲེང་ལ།།
མི་སྡུག་ཉམས་ཀྱིས་རོལ་དབྱངས་སྣ་ཚོགས་འཁྲོལ།།
བསླུ་བྲིད་སྐར་ཚོམ་འཚེར་བའི་གཡོ་སྒྱུའི་ལས།།
སྒེག་པའི་གདོང་གི་རྒྱན་དུ་འཕྱང་བ་འདི།།
ཚེ་རབས་སྔ་མའི་བསུང་ཞིམ་འཕུར་བའི་རྒྱན།།
འོད་གསལ་བདག་མོའི་ངོ་བོར་གྲུབ་པ་ལགས།།
གངས་རིའི་ཁ་དོག་མཛེས་པའི་རྒྱུད་མངས་སྒྲ།།
སེམས་ཀྱི་གཡང་གཞིར་འཕོས་པ་འདི་ལྟ་སྟེ།།
བརྩེ་ཆེན་རྒྱལ་བའི་གཟུགས་སུ་བྱོན་མིན་ན།།
ཟུངས་ཁྲག་ཚོས་ཀྱིས་བསྒྱུར་བའི་ཐབས་འདི་ཅི།།
བཙུན་པ་མགོ་རིལ་འདི་ལ་ཚོར་སྣང་ཞིག།
སྨྲ་བསམ་བརྗོད་དུ་མེད་པའི་སྐྱོ་ཤས་རྫོགས།།
མི་གཙང་དྲི་མས་བསྒོས་པའི་བསམ་བློ་དེ།།
མངོན་མཐོའི་མི་ལ་སྤྲད་པའི་གཡུལ་འཐབ་ཉིད།།
སྦྲང་ཆུང་གཤོག་པའི་འགྱུར་ཁུགས་འཇམ་ཞིང་མཉེན།།
སྤོབས་པས་ནགས་ཚལ་ཉུལ་བཱ་རབ་ཁ་རྙེད།།
ཀོ་གྲུ་གཙང་པོས་བརྡོལ་བའི་བུ་ག་ལས།།
སླར་ཡང་རྒྱལ་ཁམས་འགྲིམ་པར་སྟ་གོན་བརྩམས།།
དེས་ན་དོ་ཤལ་རྒྱན་གྱིས་རབ་སྒེག་པའི།།
མཁའ་སྤྱོད་བདག་མོ་མདའ་ཡི་ཟུར་མིག་ཅན།།
ཉི་ཟླའི་ཁྱིམ་ལ་རྩེན་པའི་དཀྱིལ་འཁོར་དུ།།
ཉིན་མཚན་སྤྱོད་པའི་སྐལ་བཟང་སྩོལ་ཅིག་ཀྱེ།།

རྩོམ་ཁུངས། ༢༠༠༣ལོའི་གངས་རྒྱན་མེ་ཏོག་དེབ་བཞི་བ།