སྨུག་སྤྲིན་གྱི་ན་བུན་འཐིབས་པའི་རི།།
གླེགས་བམ་གྱི་པོ་ཏི་བརྩེགས་པ་འདྲ།།
འཁོར་འདུས་ཀྱི་མགྲོན་པོ་མེད་པའི་གནས།།
འབྲོག་ལྗོངས་ཀྱི་དབེན་པའི་རི་གྲོང་འདྲ།།
                   
ནང་སེམས་ཀྱི་སྒྲིབ་པ་མ་དག་པར།།
ཕྱི་འཛེས་འཛེས་བྱེད་པའི་རྫུ་བག་གིས།།
ཚེ་འདི་ཕྱི་གཉིས་ཀྱི་གང་ལ་ཕན།།
དེ་གསུང་དང་སྙིང་གི་བླ་མ་ལགས།།
 
རྒྱུ་མི་རྟག་རྩྭ་མགོའི་ཟིལ་བ་རེད།།
སྐྱིད་མི་རྟག་ཕ་ཕྱུག་བུ་མོ་རེད།།
རྒྱབ་བརྟེན་ས་མེད་པའི་རི་ཁྲོད་པར།།
སེམས་བདེ་བའི་བཀང་བ་ཨེ་བདེན་ནམ།།
 
ཐུགས་བརྩེ་བ་ལྡན་པའི་བླ་མ་ཡིས།།
ཤ་ཁྲག་གི་འབྲེལ་བ་མི་འཛིན་པར།།
ཁོང་སྙིང་ནས་གཅེས་པའི་བཀའ་དྲིན་ལ།།
བསམ་ཤེས་ན་དྲིན་ལན་ད་རེས་འཇོལ།།
 
རི་བྲག་དཀར་མཐོན་པོའི་རྩེ་མོ་ན།།
ཕ་ཁྱེད་ཀྱི་མཛད་འཕྲིན་མཁའ་རུ་འཕགས།།
ཆུ་དགུ་ཀླུང་སྔོན་མོའི་འགྲམ་ངོགས་ན།།
བུ་ང་ཡི་བྱས་ཉེས་ཡིད་རེ་སྐྱོ།།
 
དུས་སྙིགས་ཀྱི་བླ་རྒན་ང་འདྲ་ལ།།
ལོངས་སྤྱོད་ཀྱི་བསླུ་བྲིད་ཐེབས་པ་འདྲ།།
སྔ་ཤར་གྱི་ཉི་རྩེ་དང་འགྲོགས་ནས།།
ཁོམ་མེད་ཀྱི་ངང་ཚུལ་དེ་ལ་བལྟས།།
 
ཉེ་འབྲེལ་གྱི་བར་ཐག་ཇེ་ཉེ་རེད།།
རིགས་ཞེན་གྱི་ཞེ་འཁོན་ཇེ་ཆེ་རེད།།
བདག་འཛིན་གྱི་ཐག་པ་མ་ཆོད་ན།།
སྟོང་ཉིད་ཀྱི་གླུ་ཆུང་ག་རེ་ལེན།།
 
གནས་དབེན་པའི་བྲག་ལ་རྒྱབ་གཏད་ནས།།
བློ་རྩེ་གཅིག་ཆོས་ལ་ཉམས་ལེན་པ།།
ཕ་ཡབ་རྗེ་སྐལ་ལྡན་རྒྱ་མཚོ་ལ།།
དུས་རྟག་ཏུ་སྙིང་ནས་གསོལ་བ་འདེབས།།
 
སྙིགས་མ་ཡི་བླ་མཚོ་བརྡོལ་དུས་འདིར།།
ཆོས་བྱེད་པའི་ནང་སེམས་ཁྲ་ཁྲ་རེད།།
གཡོ་སེམས་ཀྱིས་མི་མགོ་བསྐོར་བ་ཡིས།།
ཕྱི་མ་འདི་བསམ་མཁན་ཉུང་ཉུང་རེད།།
 
གྲུབ་མཐའ་ཡི་རྒྱུ་མ་དེད་དེད་ནས།།
དབུ་མ་ཡི་དབྱུག་པ་གཅོག་དུས་སུ།།
འཆི་ཁ་རུ་འགྱོད་པས་རབ་དགུང་ན།།
ལམ་བུ་དེ་རང་ཉིད་ནོར་བ་ཤེས།།
 
མི་རྟག་གི་མགུར་དབྱངས་འཐེན་པ་དང་།།
གསོག་འཇོག་གི་ནོར་ལ་འབད་པ་གཉིས།།
མེ་ཆུ་བཞིན་འགལ་བ་ཡིན་ནའང་།།
འཆི་བདག་དང་འགྲོགས་ནས་ད་རག་བར།།
 
འཁོར་བ་ཡི་གཞི་འཛིན་གྲོང་བ་ཚོའི།།
ཨ་གསར་གྱི་བློ་ཕུགས་ཐུང་ཐུང་གིས།།
ཉམས་ལེན་གྱི་ཕྱོགས་ལ་འབད་བསམ་པ།།
སྟོང་སེམས་ཀྱི་འཁྲུལ་ལོ་ཡིན་པར་ངེས།།
 
ལང་ཚོ་ཡིས་བརྟས་པའི་གཞོན་ནུ་ཟུང་།།
བརྩེ་དུང་གི་ཐག་པ་གཅིག་ཏུ་བརྒྱུས།།
འཁོར་བ་ཡི་རྒྱ་མཚོའི་འཇིང་ངོགས་སུ།།
ཆོས་སྲིད་ཀྱི་མེ་ཏོག་རྣམ་གཉིས་བཏབ།།
 
ལུས་བཅུད་ཀྱི་ཐིག་ལེ་གཏོར་ས་ན།།
ཆགས་སེམས་ཀྱི་ཉེས་འབྲས་དེ་རུ་འཐིམས།།
ང་རྒྱལ་གྱི་མགོ་བོ་ཕྱིར་འབུར་ནས།།
མགོ་མཐོ་མཐོ་བྱེད་རྒྱུ་ང་ལ་མེད།།
 
དེང་སང་གི་སྒྱུ་མའི་གཡོ་གར་ལ།།
ཚེ་སྲོག་གིས་མཆོད་འབུལ་བྱེད་པ་རྣམས།།
དམྱལ་ཁམས་ཀྱི་མགྲོན་པོ་ཡིན་ལགས་ན།།
མགོན་ཉིད་ཀྱིས་ཐུགས་རྗེ་གཟིགས་ཤིག་ཀྱེ།།
         
ཚེ་འདི་ཡི་རང་གི་ཉེ་འབྲེལ་ཀུན།།
བློས་ཐོངས་ན་ཕྱི་མའི་ལམ་བུ་བདེ།།
དེ་མིན་པར་སྣང་རྟོག་ཆེ་སྐྱེས་ན།།
ཤི་ཁ་རུ་ཆགས་པའི་སྡུག་བསྔལ་ཡིན།
 
མཚམས་ལན་རེ་འཇིགས་པ་དྲན་གྱུར་ན།།
རྣམ་དཀར་གྱི་དགེ་བའི་ལས་ལ་བསམ།།
བར་བར་ནས་འཆི་བ་དྲན་དུས་སུ།།
སྐྱོ་ཤས་ཀྱི་སྙིང་རླུང་ཡང་ཡང་ལྡང་།།
 
འདུ་བྲལ་གྱི་སྙིང་བོ་མཚོན་པའི་གླུ།།
གཏན་བྲལ་གྱི་གྱེས་གདུང་དེ་ཡིས་བཞག།
བདག་གཞན་གྱི་ཞེན་ཁོག་ཡོད་མེད་ལ།།
ད་ལན་ཡང་ཉམས་ཚོད་ཐེངས་གཅིག་ཐོབ།།
 
བདག་འཛིན་གྱི་སྣོད་ཁ་ཆེ་བཟེད་ནས།།
འདུས་བྱས་ལ་སྙིང་བོ་མེད་ཚུལ་གྱི།།
སྟོང་གཏམ་གྱི་མགུར་དབྱངས་འཐེན་པ་རྣམས།།
བསམ་གཞིགས་རེ་ཐོངས་དང་རང་ངོ་ཤེས།།
 
ཆོས་ས་ལ་བློ་ཕུགས་ཐུང་བ་ཡི།།
མགར་ཚང་གི་གཉིད་ཀྱི་རྨི་ལམ་འདི།།
ཁྱེད་རྣམ་པའི་ཐུགས་ལ་གནོད་གྱུར་ན།།
བཟོད་པ་ཡི་ཐ་སྙད་དེ་ལ་སོམས།།
 
གནས་དབེན་པའི་སྒྲིབ་ཕུག་མ་སྙེགས་པར།།
ཁྱིམ་མལ་སའི་ནང་གི་སྐྱིད་མགུར་འདི།།
བློ་ཆོས་ལ་བསྒྱུར་བྱེད་མ་ལགས་ཀྱང་།།
མི་གཤིས་ཀྱི་གདུང་འབོད་དེ་ཡིན་ལགས།།
 
ཡུལ་རྩེ་གཞུང་སྐྱིད་པའི་སྨན་ལྗོངས་ལ།།
ནང་སེམས་ཀྱི་རྟ་ཕོ་ཡང་ཡང་འཁྲེང་།།
ས་གསེར་ལྗོངས་རིག་པའི་གྲོང་ཁྱེར་ནས།།
དྲིན་ཕ་མ་དྲན་པའི་མགུར་འདི་བཞེངས།།
 
           ༢༠༡༡ལོའི་ཟླ་༤པའི་ཚེས་༡༥ལ་རེབ་གོང་ནས།

རྩོམ་ཁུངས། ངེད་དྲ་བ།