ཕ་ཡུལ་རྒྱང་ནས་བཞག་སྟེ།།
        རྒྱང་རིང་ས་མཐའི་ཡུལ་ན།།
        རིག་པའི་གནས་ལ་འབད་པའི།།
        སེམས་ཀྱི་གཡང་དཀར་མཚོ་མོ།།
       
        ལས་དབང་འཁོར་ཕྱོགས་ཞིག་གིས།།
        དྲ་རྒྱའི་སྐུད་ལམ་བར་ནས།།
        རླུང་བུ་རྒྱུ་ཕྱོགས་ཞིག་གིས།།
        བརྩེ་བར་མདུད་པ་མཐུད་སོང་།།
       
        51པར་ཁུག་ནང་ནས།།
        ཁྱེད་ཀྱི་འདྲ་རིས་མཐོང་དུས།།
        ཅང་མེད་ཅོལ་ཆུང་སེམས་པ།།
        དབང་མེད་ཁྱོད་རྗེས་སྙེགས་སོང་།།
       
        སྙིང་གི་གཡང་དཀར་མཚོ་མོ།།
        བརྩེ་བ་ཁྱེད་ལ་བཅོལ་ཡང་།།
        ལང་ཚོའི་བདག་པོ་མིན་པའི།།
        སེམས་ཀྱི་སྡུག་བསྔལ་དགུ་བརྩེགས།།
       
        ཁྱེད་ལ་བརྩེ་བ་སྦྱིན་པའི།།
        ལས་སྐལ་ང་ལ་མེད་ཀྱང།།
        སྙིང་གཏམ་ཤུབ་ཤུབ་བཤད་པའི།།
        སྐལ་བ་སྐུད་ལམ་ཡིན་ཆོག།
 
        སྙན་ཞིང་འཇེབས་པའི་གླུ་ལ།།
        ཉན་འདོད་ཁྱོད་རང་སྤྲོ་བས།།
        ངག་བདེ་ངག་སྙན་མིན་ཡང་།།
        བལྟ་བ་ང་ཡིས་བྱས་ཆོག།
 
        ད་ནི་རྒྱང་རིང་ཡུལ་ནས།།
        དྲན་པའི་གདུང་བ་ཁུར་བཞིན།།
        ཁྱོད་ནི་བདེ་ཞིང་སྐྱིད་པར།།
        བདག་གིས་སྨོན་པ་གཏོང་འདོད།།
       
        སློབ་གྲྭ་ཆེན་མོ་འགྲིམ་རྒྱུ།།
        ཁྱེད་ཀྱི་མདུན་ལམ་ཡིན་པས།།
        ཁྱེད་ཀྱི་རེ་མདུན་མཐའ་དག།
        འགྲུབ་པའི་སྨོན་པ་ངས་གཏོང་།།
       
        འདོར་ན་འདོད་དོན་ཐམས་ཅད།།
        བར་ཆད་མེད་པར་འགྲུབ་ཆེད།།
        ལྷ་སའི་ཇོ་བོའི་འདུན་ནས།།
        སྨོན་པ་བསྐྱར་དུ་བཏང་ཆོག།
 
        ཉི་མའི་དྲོད་ཁོལ་ཀློང་ནས།།
        མེ་ཏོག་ཞལ་ཁ་ཕྱེས་སོང་།།
        ཁྱེད་ཀྱི་བརྩེ་བ་དྲོད་མོའི།།
        བདག་གི་སེམས་པ་སྒུལ་སོང་།།
       
        ཡིད་སེམས་འཕྲོག་པའི་མེ་ཏོག།
        པདྨ་དཀར་པོ་ཡིན་ཀྱང་།།
        ཁྱེད་ཞལ་འཛུམ་གྱིས་ཁེངས་ན།།
        མེ་ཏོག་ལས་ཀྱང་མཛེས་པ།།
       
        རོང་བོ་དགུ་ཆུའི་འགྲམ་ནས།།
        སེམས་པ་ཁྱེད་ལ་འཁོར་ཡང་།།
        ལུས་སེམས་ཁ་ཐག་རིང་རྐྱེན།།
        ལས་སྐལ་མེད་པར་སྙམ་ཐལ།།
       
        སྐལ་བ་བསྐལ་བའི་བར་དུ།།
        ཁྱེད་དང་མཉམ་དུ་འཚོ་བའི།།
        སྐབས་ཞིག་མ་མཆིས་ན་འང་།།
        ཁྱེད་ཉིད་སེམས་པས་མི་བརྗེད།།
                              ༢༠༡༡.༠༦.༢༨ཉིན།

རྩོམ་ཁུངས། ངེད་དྲ་བ།