དྲན་པའི་རླུང་བུ་དལ་གྱིས་ཕྱིར་ཕྱིར་དུ་གཡུགས་པས།།
སེམས་ཀྱི་མཁའ་ལ་བཀྲ་བའི་ནག་ནག་གི་ཆུ་འཛིན།།
དལ་མེད་དྲག་ཏུ་ནམ་ཡང་ཟབ་ཟབ་ཏུ་འཕྱུར་བས།།
བུ་ཆུང་བདག་ལ་སྤྲོ་བའི་གནས་སྐབས་ཤིག་མེད་སོང༌།།

ལྷ་ལམ་ཡངས་པོར་བགྲོད་པའི་རབ་དཀར་གྱི་ཆུ་འཛིན།།
རྣོ་ངར་བདུད་ཀྱི་རླུང་གིས་ཕྱོགས་ཕྱོགས་སུ་སྟོར་བས།།
ཆུང་ནས་འདྲིས་པའི་སྙིང་སྡུག་གྲོགས་མཆོག་གི་ཕྱོགས་ལ།།
བུ་ཆུང་བདག་ལ་བདེ་བའི་ཞེ་བློ་ཞིག་མེད་སོང༌།།

དབྱར་གྱི་མཛེས་པ་བདོ་བའི་མེ་ཏོག་གི་ལང་ཚོ།།
དྲག་པོ་གནམ་ལྕགས་སེར་བོས་ཐལ་ཐལ་དུ་བཅོམ་པས།།
བུང་བ་བདག་ནི་མྱ་ངན་ཁུར་ཆེན་གྱིས་རྨས་པས།།
སྐྱོ་བའི་སྣང་བ་སངས་པའི་གོ་སྐབས་ཤིག་མེད་སོང༌།།

སྐྱོ་བའི་མིག་ཆུ་གདོང་ན་ལྷུག་ལྷུག་ཏུ་འཐོར་དུས།།
སྐྱིད་པའི་བཞུསག་ཁྲིར་རོལ་བའི་རྩེ་དགའ་ལ་གནས་པའི།།
སེམས་ཀྱི་དམར་པོ་བཅོལ་བའི་བརྩེ་སེམས་ཀྱི་བླ་མ།།
ཉམ་ཐག་བདག་ལ་རེ་བའི་ཕུགས་མདུན་ཞིག་སྐྱེས་སོང༌།།

གངས་ཀྱི་འདབ་མའི་མེ་ཏོག་བར་སྣང་ནས་འཕུར་བཞིན།།
དྲེ་མེད་དུང་གི་གོས་ཀྱིས་འཇིག་རྟེན་འདི་བཀླུབས་དུས།།
དཔལ་དང་སྟོབས་ཀྱི་ཁྲག་རྩ་འགོག་མེད་དུ་འཕྱུར་ཏེ།།
བུ་ཆུང་བདག་གི་འདྲེན་བྱེད་མཆི་མས་ནི་བཀང་སོང༌།།

རྔམ་ནག་དགུན་གྱི་བཙག་རླུང་འུར་འུར་དུ་གཡུག་པས།།
སྔོ་ལྗང་སེམས་པ་དྲོ་བའི་དཔྱིད་དཔལ་གྱི་བུ་མོ།།
ཡངས་པའི་རྒྱལ་ཁམས་འགྲིམས་ནས་སྡུག་རུས་ཀྱིས་བཙལ་ཡང༌།།
བུ་ཆུང་བདག་ལ་རྙེད་པའི་སྐལ་བ་ཞིག་མེད་སོང༌།།

དད་པ་སྟོང་གིས་སྨོན་ལམ་ཡང་ཡང་ནི་བཏབས་ཀྱང༌།།
འབྱམས་ཀླས་སྡུག་གི་རྒྱ་མཚོ་རྐང་འོག་ཏུ་ལྷུང་པས།།
གུས་རྟག་སྦྱོར་བའི་གཤོག་ཟུང་ཕྱི་ནང་དུ་བཀླུབས་ཀྱང༌།།
ལས་ངན་བུ་ཆུང་འདི་ལས་ཐར་དུས་ཤིག་མེད་སོང༌།།

སྐྱོ་བའི་དབྱངས་རྟ་མཐའ་བྲལ་མི་ཡུལ་ལ་བཏང་ཡང༌།།
འབྲས་མེད་སྙིང་གི་དབང་བོ་གང་ཞིག་ནས་གནས་སམ།།
སྟོང་བའི་མི་ཚེ་ཁྱོག་ཁྱོག་བར་མེད་དུ་འཁོར་བཞིན།།
རྒ་བའི་གཉེར་རིས་མང་པོ་ཚང་ཚིང་གིས་སླེབས་བྱུང༌།།

རྩོམ་ཁུངས། སེམས་ཀྱི་བཞུར་རྒྱུན།