རྣ༵མ་དག་ཡིད་ཀྱི་ཟླ་ཤེལ་ཁར།།

རྣ༵མ་པར་རྩེན་པའི་དབྱངས་ཅན་མས།།

རྣ༵མ་བཀྲ་སྙན་ཚིག་ནོར་བུའི་མཆོག།།

རྣ༵མ་དཔྱོད་དར་བའི་སྐྱེས་སུ་སྩོལ།།

བསླབ་ཁྲིམས་ནོར་བུའི་ཏོག་མཛེས་པའི།།

སྡོམ་གསུམ་གོས་ཀྱི་ཤམ་བུ་ཅན།།

རིམ་གཉིས་ཕྱག་གིས་འཁྲི་ཤིང་གིས།།

རྒྱལ་བསྟན་གདུ༵གས་དཀ༵ར་བསྒྲེང་གྱུར་ཅིག།།

ཤེས་རིག་འོ་མཚོའི་ཀློང་ཡངས་ལས།།

ཐབས་ཤེས་གཤོག་ཟུང་ལྡེམ་པ་ཡི།།

རྣམ་དཔྱོད་དར་བབས་གསེ༵ར་གྱི་ཉ༵།།

འཁྱུག་འགྲོས་གར་ལ་རོལ་གྱུར་ཅིག།།

སྔོན་མཁས་ལེགས་བཤད་གངྒའི་རྒྱུན།།

བཅུད་དུ་རྫོགས་པའི་བུམ༵་བཟ༵ང་ལས།།

འཛད་མེད་མན་ངག་བདུད་རྩིའི་ཆབ།།

ལུས་ཅན་གདུང་བ་སེལ་གྱུར་ཅིག།།

རྒྱལ་བསྟན་པ༵ད་མ༵འི་དགའ་ཚལ་ལ།།

རེ་བའི་མཁས་གྲུབ་བུང་ཚོགས་ཀྱིས།།

གསེར་མདོག་ཅོད་པན་འཆང་བའི་སྡེ།།

རྫོགས་ལྡན་དཔལ་ལ་འགོད་གྱུར་ཅིག།།

ཆོས་ཕུང་བརྒྱད་ཁྲིའི་ཡང་སྙིང་ཀུན།།

སྟོབས་སུ་དྲངས་པའི་མཁས་གྲུབ་ཀྱི།།

གྲགས་པ་སྙན་པའི་དུ༵ང་དཀ༵ར་དབྱངས།།

སྲིད་པའི་ཁྱོན་ལས་བརྒལ་གྱུར་ཅིག།།

མཁས་དབང་རྒྱུ་སྐར་ཕྲེང་ཚོགས་དབུས།།

རྒྱལ་བསྟན་འཛིན་པའི་བཤེས་གཉེན་གྱི།།

ཞལ་གསུང་བདུད་རྩིའི་འོད་དཀར་རླབས།།

སྙིང་གི་དཔ༵ལ་བེ༵འུར་སིམ་གྱུར་ཅིག།།

ཕྱག་ན་པད་མོའི་ཐབས་འཕྲུལ་ལས།།

བྱམས་ལྡན་གདོང་དམར་བོད་རྣམས་ཀྱི།།

འགྱུར་མེད་དད་གསུམ་གཙང་མའི་རིས།།

རྒྱ༵ལ་མཚ༵ན་ཏོག་ལྟར་བརྟན་གྱུར་ཅིག།།

བསོད་ནམས་མརྒད་ཞུན་མའི་ལྟོར།།

ལུགས་གཉིས་གསེ༵ར་འཁོ༵ར་རྩིབས་སྟོང་ཅན།།

མི་དབང་ཐུགས་འཕྲུལ་གྱིས་བསྒྱུར་བས།།

སྡེ་བཞིའི་མངའ་ཐང་རྒྱས་གྱུར་ཅིག།།

ཅེས་བཀྲ་ཤིས་རྟགས་བརྒྱད་ལ་སྦྱར་བའི་ཤིས་ཚིག་པད་དཀར་ཆུན་པོ་འདི་ནི། གངས་ལྗོངས་སྤྱིའི་ཆོས་སྲིད་རིག་གནས་རྣམས་ཉམས་པ་སླར་གསོ་དང་གནས་པ་གོང་འཕེལ་དུ་འགྲོ་བ་དང་། དེ་འཛིན་སྐྱོང་སྤེལ་གསུམ་བྱེད་པའི་སྐྱེས་བུ་དམ་པ་དག་གི་སྐུ་ཚེ་བརྟན་པ་དང་ཐུགས་བཞེད་མཐའ་དག་འགྲུབ་པའི་ཐབས་ལ་དམིགས་ཁུལ་གྱིས་བྲིས་སོ།།

རྩོམ་ཁུངས། ངེད་དྲ་བ།