ཚོགས་གཉིས་འོ་མཚོའི་རླབས་ཕྲེང་འཕྱོ་བ་ཡི།།
སྟོང་ལྡན་པད་མ་ཟླ་བའི་གདན་དཀར་དབུས།།
བརྒྱད་ཟུང་ལང་ཚོ་བརྟས་པའི་ཡིད་འཕྲོག་མ།།
མ་གཡེལ་དྲན་པ་ཙམ་གྱིས་དུས་ཀུན་སྐྱོངས།།

གནག་སྣུམ་སྐྲ་ལོ་མཛེས་སྡུག་བཀྲ་བའི་རྩེར།།
ཟླ་བྱེད་རིན་ཆེན་མདངས་བཟང་སྣ་ལྔ་ཡིས།།
ཕྲ་ཚོམ་བཏབ་པའི་སྒེག་ལྡན་ཚངས་སྲས་མ།།
འཛད་མེད་ངག་གི་དངོས་གྲུབ་སྦྱིན་པར་མཛོད།།

རབ་དཀར་མུ་ཏིག་ཞུན་མའི་ལེ་ལོང་ངོར།།
སྨིན་ལེགས་འཁྲི་ཤིང་སྡུག་གུར་བཀྲ་བ་ཡི།།
མཁུར་ཚོས་བིམ་པའི་མེ་ཏོག་འཛུམ་པ་ཅན།།
དབྱངས་ལྡན་ལྷ་མོས་ཤེས་རབ་སྣང་བ་སྩོལ།།

དབྱིབས་ལེགས་སྙན་ཟུང་གཡས་འཁྱིལ་དུང་ཟླ་ལ།།
མདོག་བཟང་རིན་བྲལ་གསེར་གྱི་རྣ་ཆ་སྦྲན།།
ཨུཏྤལ་ཟུར་མིག་གཡོ་བའི་བརྩེ་ལྡན་མས།།
ཤེས་རིག་ནོར་བུའི་སྦྲང་ཆར་ལྷུག་པོར་སྩོལ།།

འདོད་པའི་མྱོས་བུམ་ཁུར་གྱིས་དུད་པ་ཡི།།
ངུར་བའི་འགྲོས་ལྡན་ཟླ་སྲིང་ལུས་ཕྲ་མས།།
འགག་མེད་ཡན་ལག་དྲུག་ཅུ་འཇེབས་པའི་དབྱངས།།
མགྲིན་པ་ལོངས་སྤྱོད་འཁོར་ལོའི་རྒྱན་དུ་སྩོལ།།

དྲི་བྲལ་བདག་སྙིང་འདབ་བརྒྱ་བཞད་པའི་ལྟོར།།
དཀར་གསལ་ལང་ཚོ་དཔལ་རྫོགས་མཚོ་བྱུང་མ།།
ལན་གཅིག་ཙམ་མིན་ཉིན་མཚན་དུས་ཀུན་ཏུ།།
བསྟེན་ནོ་ཐུགས་རྗེས་གཟིགས་པ་ལྷོད་མེད་ཞུ།།

དམིགས་མེད་བརྩེ་བ་ཆེན་པོའི་དབྱིངས་རུམ་ནས།།
མཐའ་མེད་འཁོར་བར་གཟིགས་པའི་དབྱངས་ཅན་མ།།
རིས་མེད་འགྲོ་ལ་མ་ལྟར་བརྩེ་བ་ཡིས།།
མགོན་མེད་ཉམ་ཐག་དབུགས་དབྱུང་མཛད་པར་ཤོག།

ལྷ་ཁྱོད་བརྩེ་བས་གཟིགས་པ་མི་ལྷོད་པར།།
པཱ་ར་མི་ཏཱའི་གཞུང་ལུགས་མཐའ་དག་ལ།།
ལ་འུར་སྦྱང་བའི་གོ་སྐབས་དམན་ན་ཡང༌།།
ཡང་དག་ལྟ་བའི་ལམ་སྣ་ཟིན་པར་ཤོག།

རྩོམ་ཁུངས། ༢༠༠༣ལོའི་གངས་རྒྱན་མེ་ཏོག་དེབ་གཉིས་པ།