མ་སྨད་མཚན་དཔེ་འཛུམ་པའི་སྒེག་འཆང་མ།།
མ་ཆགས་པདྨའི་སྤྱན་ལྡན་མཁྱེན་ཡངས་མ།།
མ་གྱུར་འགྲོ་བའི་དཔུང་གཉེན་བརྩེ་ལྡན་མ།།
མ་ཐོས་དངོས་གྲུབ་སྩོལ་མཛད་དབྱངས་ཅན་མ།།
ཀ་མ་ལ་ལྟར་དཀར་བའི་སེམས་འཆང་མ།།
ཁ་ཚིག་སྙན་མོ་སྨྲ་བའི་གཞུང་དྲང་མ།།
ག་ལེར་སྐྱོང་གཉོར་བྱེད་པའི་ཐབས་མཁས་མ།།
ང་རྒྱལ་ཁེངས་པ་བྲལ་བའི་ཞི་དུལ་མ།།
ཅ་ཅོ་ལོང་གཏམ་ཉུང་བའི་བག་ཡོད་མ།།
ཆ་ཤས་ཡོངས་སུ་རྫོགས་པའི་བྱམས་ལྡན་མ།།
ཇ་ཁུ་མངར་མོ་ལྡན་པའི་དྲིན་ཆེན་མ།།
ཉ་རྒྱས་དཔལ་ལྟར་འཚེར་བའི་སེམས་བཟང་མ།།
ཏཱ་རེ་དབྱངས་སུ་གྱེར་བའི་ངག་སྙན་མ།།
ཐ་སྙད་སྐད་ཆ་སློབ་མཁན་མཁྱེན་ཡངས་མ།།
ད་ལྟའི་དྲིན་ཆེན་ཀུན་གྱིས་གཙུག་རྒྱན་མ།།
ན་ཚོད་བུ་ལ་བསྟིམས་པས་གཞན་གཅེས་མ།།
པ་སངས་མདངས་ལྟར་བཀྲ་བའི་སེམས་བཟང་མ།།
ཕ་གཞིས་བུ་ལ་གནང་བའི་རིག་བཟང་མ།།
བ་ཞོ་མངར་མོ་འདྲེན་པའི་མཉེསགཤིན་མ།།
མ་ལུས་བུ་ལ་སྩོལ་བའི་གཏོང་ཕོད་མ།།
ཙ་རིའི་སྨྱུག་ལས་དྲང་བའི་སེམས་བཟང་མ།།
ཚ་གྲང་སྡུག་ལས་ཕེར་བའིཀུན་གཟོད་མ།།
ཛ་ལང་རྩུབ་སྤྱོད་སྤང་བའི་སེམས་འཇམ་མ།།
ཝ་སྐྱེས་གཡོ་འཕྲུལ་དོར་བའི་གཤིས་དྲང་མ།།
ཞྭ་གོས་འཚོ་རྟེན་འཚོལ་བའི་བརྩོན་ལྡན་མ།།
ཟ་མ་ངན་ངོན་བཞེས་པའི་སྡུག་བཟོད་མ།།
འ་ཅག་བུ་ཕྲུག་ཁུར་བའི་ལུས་ལྕི་མ།།
ཡ་མཚར་གནའ་གཏམ་འཆད་པའི་མཁས་མཛངས་མ།།
ར་རིའི་དྲི་མས་མ་གོས་ཡིད་འོང་མ།།
ལ་མོར་གཞན་དོན་སྒྲུབ་མཁན་འདུན་ལེགས་མ།།
ཤ་རུས་གདུང་རྒྱུད་བསྐྲུན་པའི་རྐང་འཛིན་མ།།
ས་སྟེང་དོ་ཟླ་དབེན་པའིབྱང་སེམས་མ།།
ཧ་རི་ཙན་དན་ལས་བསིལ་བདེ་སྟེར་མ།།
ཨ་མ་ཕན་བདེ་སྒྲུབ་པའི་དབང་ཕྱུག་མ།།
དེ་ལྟར་སྐྱེད་ཡུམ་བསྟོད་པའི་སྦྲང་རྩིའི་གཏེར།།
ལྷག་བསམ་པདྨོ་འཛུམ་པའི་ཀློང་ལས་འཕྱུར།།

རྩོམ་ཁུངས། ཚེ་སྲོག་ལ་འཁྱིལ་བའི་ཟུངས་ཁྲག