གང་ལ་བརྟེན་ན་སྡུག་བསྔལ་རྒྱ་མཚོ་ལས།།
གསང་གསུམ་ནོར་བུའི་མཛོད་ལ་དབང་འབྱོར་བའི།།
བདེ་ཆེན་གླིང་དུ་བདེ་བླག་སྒྲོལ་བའི་གྲུ།།
ཕྱིན་དྲུག་སེམས་དཔའི་སྤྱོད་ལ་ཕྱག་འཚལ་ལོ།།

ཆོས་དང་མི་འཇིགས་ཟང་ཟིང་གཏོང་བའི་ནོར།།
གཅེས་འཛིན་སེར་སྣའི་འཆིང་བ་ལྷོད་གྱུར་ཏེ།།
ཀུན་གྱི་རེ་སྐོང་འདོད་པའི་དངོས་གྲུབ་ཏུ།།
གཏོང་བ་སྦྱིན་པའི་ལེགས་ཚོགས་རྨད་དུ་བྱུང༌།།

སྒོ་གསུམ་ཚུལ་མིན་སྤྱོད་པ་ཡོངས་སྡོམ་པའི།།
སོ་བྱང་སྔགས་ཀྱི་སྡོམ་ཁྲིམས་བདུད་རྩིའི་ཆབ།།
ཉོན་མོངས་ཉེས་སྤྱོད་དྲི་མ་འཁྲུད་པའི་དཔྱིད།།
ལེགས་ཚོགས་རྩ་བ་འཛུགས་པའི་རྟེན་གྱི་མཆོག།

མི་བཟད་འཇིགས་རུང་དམྱལ་བའི་སྒོ་འབྱེད་པའི།།
ཞེ་སྡང་སྦྲུལ་གདུག་ཁྲོས་པའི་གཡུལ་གྱི་ངོར།།
ཕྱིར་བཟློག་གཅིག་ཆོག་དཔའ་བོའི་དཔུང་གི་གཏེར།།
རྒྱན་གྱི་མཆོག་གྱུར་བཟོད་པའི་གོ་ཆ་རྨད།།

ལས་དང་འབྲས་བུར་ཡིད་ཆེས་དད་པ་ན།།
གཏན་བདེ་བླ་ན་མེད་པའི་གོ་འཕང་བར།།
བདེ་བླག་སྒྲུབ་བྱེད་དགེ་བ་ལ་སྤྲོ་བའི།།
བརྩོན་འགྲུས་རྨད་བྱུང་སྤྱོད་པ་ཀུན་གྱི་སྒོ།།

ཉེས་པ་ལྔ་སྤོང་འདུ་ཤེས་བརྒྱད་བསྟེན་པའི།།
དགེ་བའིདམིགས་པར་རྩེ་གཅིག་སེམས་འཇོག་སྒོམ།།
ལུས་སེམས་ཤིན་སྦྱངས་བདེ་ཆེན་འདྲེན་པའི་གྲོགས།།
རྣམ་གཡེང་དགྲ་འཇོམས་ཏིང་ངེ་འཛིན་གྱི་མཆོག།

ཉེས་བརྒྱའི་རྩ་བ་འཇིག་ཚོགས་ལྟ་བའི་གདོན།།
ལྷག་མེད་དྲུངས་ནས་འའབྱིན་པའི་དཔུང་གི་མཆོག།
ཆོས་ཀུན་དེ་ཉིད་མཐོང་བའི་རྣམ་འབྱེད་བློ།།
རྟག་ཆད་གཡང་ལས་སྒྲོལ་བའི་འཇུག་ངོགས་ཉིད།།

སྐུ་བཞིའི་དབང་ཐང་བདེ་བླག་སྤྱོད་པའི་ཐབས།།
དུས་གསུམ་རྒྱལ་རྣམས་བགྲོལ་པ་གཅིག་པའི་ལམ།།
དོན་གཉིས་རྫོགས་པར་སྒྲུབ་བྱེད་རྒྱལ་སྲས་སྤྱོད།།
ལྷ་གཅིག་སྟོན་པའི་རྣམ་ཐར་མྱུར་འགྲུབ་ཤོག།

རྩོམ་ཁུངས། ཚེ་སྲོག་ལ་འཁྱིལ་བའི་ཟུངས་ཁྲག